Karoa 79

Bese ta Ia Boio, to Bese Taudia Iboudiai Lasi

IESU ese Farisea tauna ta ena ruma murimurinai idia hebou taudia ia hereva henidia murinai, haida idia hamaoroa, Roma ena gavana, Pontio “Pilato ese Galilea taudia haida ia aladia boubou patana dekenai, boubou idia henia neganai.” Reana unai be Iuda taudia tausen momo ese Pilato ena kara idia maumauraia neganai. Pilato ese dubu ena moni ia gaukaralaia, ranu be Ierusalem dekenai do ia aru lao dalana karaia totona. Unai sivarai be Iesu idia hadibaia taudia be reana idia laloa, unai Galilea taudia ese unai dika idia davaria sibodia edia kara kerere dainai.

To, Iesu ese edia lalohadai ia hamaoromaoroa; ia gwau: “Umui gwau be unai Galilea taudia haida sibona edia dika be Galilea taudia oredia edia dika ia hanaia, unai dainai unai bamona idia mase haraga? Lau hamaoroa umui dekenai, lasi momokani!” Bena unai sivarai amo Iuda taudia ia sisiba henidia, ia gwau: “To umui emui lalona bema umui giroa lasi, umui ibounai unai bamona do umui mase.”

Unai murinai, Iesu ese unai gabu dekenai ia vara kererena ma ta ia herevalaia. Reana unai danu be ranu dalana idia karaia neganai ia vara gauna. Iesu ia henanadai, ia gwau: “Bona Siloama kohoro ese taudia 18 latanai ia moru, vadaeni idia mase. Inai taudia 18, umui be umui gwau idia edia dika be Ierusalema taudia oredia edia dika ia hanaia?” Lasi, Iesu ia gwau idia edia kara dika dainai idia mase lasi. Unai bamona kerere idia “vara kava” sibona. To unai sivarai amo ia hadibadia lou, ia gwau: “To umui emui lalona bema umui giroa lasi, umui ibounai unai bamona do umui mase.”

Unai murinai parabole ta ia henidia, ia gwau: “Tau ta ena vain uma gabu dekenai fig auna ta ia hadoa. Gabeai ena huahua tahua totona ia lao, to ia davaria lasi. Vadaeni ia ese uma gabu naria tauna dekenai ia hamaoroa, ia gwau, ‘Lagani toi be inai fig auna ena huahua lau tahua, to lau davaria lasi. Do oi utua, ia ese tano ia gaukaralaia kava be anina lasi.’ To ia ese ia haere, ia gwau, ‘Egu biaguna e, hari inai lagani tamona sibona do ia noho, tano do lau makohia maragimaragi, ena badina dekenai muramura do lau atoa. Vadaeni bema huahua ia havaraia be do ia namo, to bema lasi do oi utua.’ ”

Lagani toi mai kahana lalodiai, Iesu ese Iuda bese taudia edia abidadama ia habadaia toho vadaeni. To idia handred haida sibodia be ena hahediba taudia ai idia lao, ena gaukara ena huahua unai. Ena haroro laganina namba foa ai, iena gaukara ia habadaia. Mai ena goada ibounai ida Iudea bona Perea dekenai ia haroro bona ia hadibaia, hegeregere tano ia makohia bona fig auna badinai muramura ia atoa bamona. To anina ia vara lasi! Iuda bese taudia idia ura lasi idia helalo-kerehai, unai dainai mase dalana dekenai idia raka lao. Idia amo ta ta sibona idia helalo-kerehai.

Unai murinai, Sabati dinana ta ai, Iesu be dubu lalonai ia haroro. Unuseniai be hahine ta, lauma dikana ta ese ia abia dainai, lagani 18 lalodiai ena doruna ia maoromaoro lasi. Mai ena hebogahisi ida Iesu ese ia hereva henia, ia gwau: “Hahine e, oiemu gorere be ia ore vadaeni.” Ena imana be hahine latanai ia atoa, bena nega tamona hahine ena doruna ia maoromaoro, bona Dirava ia hanamoa.

To, dubu biaguna ia badu. Ia gwau: “Dina be 6 idia noho, taunimanima edia gaukara dinana. Unai dina lalonai hanamoa totona do umui mai, to Dina Helaga neganai do umui mai lasi.” Ia diba Iesu be mai ena siahu taunimanima hanamodia totona, to taunimanima ia gwau henidia, badina be Sabati dinana ai idia mai Iesu ese edia gorere hanamoa totona!

Iesu ese ia haere henia, ia gwau: “Koikoi tauna e, Sabati dinana dekenai emui boromakau o emui doniki umui ruhaia lasi, ranu henia totona umui hakaua lao lasi, a? To inai hahine, Aberahamo ena bese hahinena, lagani 18 Satani ese ia guia, be Sabati dinana dekenai do lau ruhaia lasi, a?”

Vadaeni, Iesu idia badu henia taudia be unai hereva idia kamonai neganai idia hemarai. To hutuma ese Iesu ena kara namo hereadia idia moalelaia. Unai murinai Iesu ese sivarai hegeregeredia rua amo Dirava ena Basileia ia gwauraia, lagani ta gunanai vanagi ta amo ia harorolaia sivaraidia unai. Luka 13:​1-21; Kohelete 9:11; Mataio 13:​31-33.

▪ Edena kerere idia herevalaidia, bona idia amo Iesu ese dahaka ia hadibadia?

▪ Huahua ia atoa lasi fig auna ese dahaka ia laulaulaia, bona ta ese tano ia makohia bona muramura ia henia ese dahaka ia laulaulaia?

▪ Dubu biaguna be edena bamona ia hahedinaraia ia laloa Iesu ese gorere ia hanamoa diba, bona Iesu ese ena koikoi edena bamona ia hahedinaraia?