Karoa 85

Boio Taudia Ia Tahudia

IESU ia ura bada, mai edia manau ida Dirava do idia hesiai henia taudia ia davaridia. Unai dainai taunimanima iboudiai, kara dika taudia danu, ia tahudia bona Basileia ena sivarai ia gwauraia idia dekediai. Vadaeni, kara dika taudia haida be ia dekenai idia lao ena hereva kamonai totona.

Farisea taudia bona taravatu hadibaia taudia ese unai idia itaia neganai, Iesu idia gwauraia dika, taunimanima dikadia ia bamodia dainai. Idia gwau: “Unai tau be dika taudia ia abia dae bona idia danu ia aniani hebou.” Farisea taudia be hekokoroku taudia dainai, unai bamona idia karaia diba lasi! Ladana maragi taudia idia moidia, tano idia moia bamona. Heberu gado ai idia gwauraidia ‛am ha·’aʹrets, anina be “tano taudia.” Unai amo idia hahedinaraia unai taudia idia ura henidia lasi.

Iesu be idau; taunimanima iboudiai ia kara namo henidia bona ia bogadia hisi. Unai dainai unai ladana maragi taudia momo, kara dika taudia danu, idia ura ena hereva idia kamonai. To Iesu ese unai kara dika taudia ia durudia toho neganai, Farisea taudia ese idia maumauraia be maoro eiava?

Edia maumau herevana dainai Iesu ese parabole ta ia henidia. Farisea taudia edia lalohadai hegeregerena ia hereva. Edia lalohadai be inai: Idia be kara maoromaoro taudia bona Dirava ena magu lalonai idia noho namo, to idia ura henidia lasi ‛am ha·’aʹrets taudia idia raka siri bona idia boio bamona. Vadaeni, ia nanadaidia, ia gwau:

“Umui daika ena mamoe bema 100, to tamona bema ia boio, ia be 99 taunimanima idia noho lasi tano dekenai do ia rakatania, ia boio mamoena do ia tahua ia lao bona do ia davaria? Do ia davaria neganai, ia ese mamoe do ia huaia, mai moale danu. Do ia ginidae, ena ruma dekenai do ia daekau, vadaeni ena turana bona ena badibadinai taudia do ia haboua, do ia gwau, ‘Ita moale hebou, badina be lauegu mamoe, ia boio gauna, lau davaria vadaeni.’ ”

Bena Iesu ese ena parabole ena anina ia gwauraia, ia gwau: “Lau hamaoroa umui dekenai, inai bamona dika tauna ta ena lalona ia giroa dainai guba dekenai moale do ia bada. To kara maromaoro taudia 99, edia lalona idia giroa lasi dainai guba dekenai moale do ia maragi.”

Lagani rua bamona idia lao vadaeni, Iesu be takisi gogoa taudia bona kara dika taudia ida ia aniani hebou neganai, haida ese idia maumauraia, bena ia hamaorodia, ia gwau: “Kara maoromaoro taudia boiridia totona lau mai lasi, to kara dika taudia boiria totona lau mai.” Farisea taudia idia laloa idia be kara maoromaoro taudia dainai idia helalo-kerehai be anina lasi; unai dainai guba dekenai moale idia havaraia lasi. To kara dika taudia idia helalo-kerehai momokani neganai, guba dekenai moale bada idia havaraia.

Unai ia hahedinaraia lou totona Iesu ese ma parabole ta ia gwauraia. Ia gwau: “Edena hahine, bema ena siliva moni be 10, to tamona bema ia boio, ia be lamepa do ia gabua, ruma do ia daroa, do ia tahua namonamo, ela bona do ia davaria, a? Do ia davaria neganai, ia ese ena turana bona ena badibadinai hahine taudia do ia haboua, do ia gwau, ‘Ita moale hebou, badina be lauegu moni, ia boio gauna, lau davaria vadaeni.’ ”

Bena Iesu ese ena parabole ena anina ia gwauraia, ia gwau: “Lau hamaoroa umui dekenai, dika tauna ta ena lalona ia giroa dainai Dirava ena aneru unai bamona do idia moale.”

Hoa gauna be inai: Idia boio kara dika taudia idia helalo-kerehai neganai, Dirava ena aneru ese edia kara idia laloa bada! Hoa gauna ma ta be inai: Unai ladana maragi ‛am ha·’aʹrets taudia danu be mai edia dala, Dirava ena guba Basileiana lalonai do idia noho. Unai dainai, aneru edia dagi ia hanaia dagina guba dekenai do idia abia! To aneru idia mama lasi o idia badu lasi, badina idia diba unai kara dika taudia ese mauri dalana dikana idia mamia bena edia dika amo idia helalo-kerehai dainai, pavapava bona hahelaga gaukaradia guba dekenai do idia karaia diba mai edia hebogahisi ida. Luka 15:​1-10; Mataio 9:13; 1 Korinto 6:​2, 3; Apokalupo 20:6.

▪ Dahaka dainai Iesu ese kara dika taudia ia bamodia, bona dahaka dainai Farisea taudia ese idia gwauraia dika?

▪ Farisea taudia ese ladana maragi taudia edena bamona idia lalodia?

▪ Iesu ese edena parabole rua ia gwauraidia, bona idia amo dahaka ita diba?

▪ Dahaka dainai aneru edia moale ita hoalaia?