Karoa 8

Dagedage Pavapavana Idia Heautania

HANUABOI ai Iosef ese Maria ia haoa, badina be unai negai nihi amo Iehova ena aneru ese Iosef ia hamaoroa, ia gwau: “Oi toreisi, mero maragina, ena sinana danu oi abia, Aigupito dekenai umui heau lao, unuseni do umui noho ela bona do lau hereva lou oi dekenai. Badina be Heroda ese mero maragina ia tahua noho, ia alaia mase gwauraia.”

Kara haraga, idia toiosi idia heau mauri. Unai neganai Herod ia diba unai hisiu edia toana tahua taudia ese idia koia bona unai tano idia rakatania vadaeni. Ia badu dikadika, badina be guna ia hamaorodia Iesu do idia davaria neganai ia do idia hadibaia. Iesu hamasea totona ena tuari taudia ia haganidia, lagani rua bona murinai idia vara memerodia iboudiai Betelehem ai bona badina tanodia ai do idia aladia mase. Hisiu edia toana tahua taudia edia hereva dainai ia diba Iesu be unai nega lalonai ia vara.

Unai ala-ala be dika rohoroho! Herod ena tuari taudia be ruma iboudiai lalodiai idia vareai. Mero maragina ta idia davaria neganai, ena sinana ena imana amo idia dadia bena idia alaia mase. Ita diba lasi memero hida idia hamasedia, to unai hahine momo edia taitai bada ese peroveta tauna Ieremia ena hereva ia hamomokania.

Iosef mai ena adavana bona natuna ida be Aigupito dekenai idia ginidae bena unuseniai idia noho. Hanuaboi ta lalonai, Iehova ena aneru be nihi dekenai ia hedinarai lou Iosef dekenai, ia gwau: “Oi toreisi, mero maragina, ena sinana danu oi abia, Israela tano dekenai umui lao, badina be mero maragi alaia mase totona idia tahua taudia be idia mase vadaeni.” Unai murinai idia lou lao edia tano korikori dekenai. Baibel ena peroveta herevana ma ta, Dirava ese ena Natuna Aigupito amo do ia boiria herevana, ia momokani unai.

Iosef ia laloa Iudea dekenai do idia noho, badina guna Aigupito idia do lao henia lasi neganai unuseniai idia noho. To sivarai ia kamonai Herod ena natuna dikana, Akelao, ese Iudea ia lohiaia, bona ma nihi ta amo Iehova ese ia hadibaia dainai, ia mai ena adavana bona natuna ida idia raka hanai, idia lao mirigini kahanai ela bona Nasaret, bena unuseniai idia noho. Unai hanua bona Ierusalem edia padana be daudau. Unuseniai Iesu ia tubu daekau. Mataio 2:​13-23; Ieremia 31:15; Hosea 11:1.

▪ Hisiu edia toana tahua taudia be Herod dekenai idia giroa lasi neganai, dahaka kara dika rohorohona ia karaia? To Dirava ese Iesu edena bamona ia hamauria?

▪ Dahaka dainai Iosef be Betelehem dekenai ia noho lasi, Aigupito amo ia giroa lao neganai?

▪ Unai nega lalonai edena peroveta herevadia idia guguru?