Karoa 56

Dahaka ese Tau ta Ia Hadikaia?

IESU badu henia karana ia bada ia lao. Ena hahediba taudia momo ese idia rakatania, bona Iudea taudia ese hamasea dalana idia tahua, lagani 31 C.E. ai Paseka Ariana ai Ierusalem dekenai ia noho neganai idia karaia bamona.

Dirava ena taravatu hegeregerena, lagani 32 C.E. ai, Iesu be Ierusalem dekenai ia lao Paseka Ariana totona. Ia naria namonamo, badina haida idia ura idia hamasea. Paseka murinai ia lou lao Galilea dekenai.

Farisea taudia bona taravatu hadibaia taudia haida Ierusalem amo idia mai Iesu dekenai, reana unai be Kaperanaum ai ia noho neganai. Iena kerere ta, tomadiho ena taravatu utua karana unai, idia tahua, do idia samania totona. Idia nanadaia, idia gwau: “Badina be dahaka oiemu diba tahua taudia ese sene taudia edia taravatu idia makohia, edia imana idia huria lasi, idia aniani?” Unai be Dirava ena taravatu lasi, to Farisea taudia idia gwau bema ta ese ena imana ia huria lasi ela bona ena diuna, unai be kerere bada herea.

Iesu ese edia henanadai ia haerelaia lasi, to edia kara dika, Dirava ena Taravatu utua karana unai, ia nanadailaidia, ia gwau: “Badina be dahaka umui ese Dirava ena taravatu umui makohia, umui emui sene taudia edia taravatu karaia totona? Badina be Dirava ia hereva vadaeni iena taravatu dekenai, ia gwau, ‘Oiemu tamana, oiemu sinana oi matauraia, bona, sinana o tamana do ia hereva dika henia tauna do umui alaia mase.’ To umui be umui gwau, ‘Tau ta ese ena tamana o ena sinana dekenai do ia hamaoroa, do ia gwau, “Lau ura be lau hanamoa oi, kohu dekena amo, to dala lasi, badina inai kohu be lau gwauhamata vadaeni Dirava do lau henia.” Unai dainai [ena] tamana bona [ena] sinana do [ia] durua lasi.’ ”

Farisea taudia idia gwau, bema ta ese moni, kohu, o ma gau ta ia gwauhamatalaia Dirava dekenai, unai be dubu ena dainai, ia gaukaralaia diba lasi ma gaukara ta totona, to ia dogoatao be taravatu lasi. Unai dala amo bema ta ia gwau ena moni o kohu be “Kobana”​—Dirava o dubu dekenai do ia henia gauna​—bena unai dainai ena tamana sinana burukadia ia durudia lasi, ia be kerere lasi; idia ogogami be herevana.

Farisea taudia ese Dirava ena Taravatu idia hagagevaia dainai Iesu ia badu, idia dekenai ia gwau: “Emui taravatu dekenai Dirava ena hereva umui hadikaia.” Ma ia gwau: “Umui koikoi taudia e, momokani Isaia ese umui ia herevalaia, ia gwau, ‘Inai bese taudia edia uduna sibona idia hanamoa lau, to edia lalona be daudau masemase. Idia tomadiho lau dekenai, to anina lasi. Idia edia hadibaia hereva be taunimanima edia taravatu mo.’ ”

Reana hutuma idia raka oho sisina, Farisea taudia ese Iesu idia henanadai henia diba totona. To Farisea taudia ese Iesu ena samani herevana idia haerelaia diba lasi neganai, iboudiai ia boiridia lou ia dekenai. Ia gwau: “Umui ibounai lauegu hereva kamonai namonamo, bona diba. Murimuri dekenai noho gauna ia vareai tau lalonai ese unai tau ia hadikaia lasi, to lalona dekena amo mai gauna ese ia hadikaia.”

Gabeai, Iesu be ruma lalonai ia vareai neganai, ena hahediba taudia ese idia nanadaia, idia gwau: “Oi diba Farisea taudia be oiemu hereva idia kamonai, vadaeni edia lalona idia hisihisi, a?”

Iesu ia haere, ia gwau: “Lauegu Tamana gubai ia noho be mai ena uma. Ia ese ia hadoa lasi audia ibounai be do ia kokia. Idia umui laloa lasi! Idia be matakepulu taudia, bona matakepulu taudia idia hakaua lao noho. Bema matakepulu tauna ese matakepulu tauna do ia hakaua, idia ruaosi guri dekenai do idia moru.”

Hahediba taudia ese Iesu ena hereva ena anina idia diba lasi dainai, Petro ese ia nanadailaia. Iesu ese ia haere henidia, ia gwau: “Umui danu umui diba lasi, a? Umui diba lasi ena uduna dekena amo ia ania gauna be ena bogana dekenai sibona ia vareai, bona negea gabuna dekena amo ia lao murimuri dekenai. To iena uduna dekena amo idia mai gaudia be ena lalona dekena amo idia mai, unai gaudia ese taunimanima idia hamiroa. Badina be tau ena lalona dekena amo idia mai gaudia be inai: laloa dikadia, taunimanima alaia, heudahanai, mata bodaga, henaoa, samania koikoi, hereva dikadia. Inai be taunimanima idia hadikaia gaudia. To edia imana idia huria lasi, ma idia aniani, unai be taunimanima idia hamiroa lasi.”

Inai hereva amo Iesu ia gwau lasi, ta ese aniani ia hegaegaelaia o ia ania gwauraia neganai ena imana ia huria guna be anina lasi. To ia ese tomadiho gunalaia taudia ia gwau henidia edia koikoi dainai. Dirava ena taravatu maorodia idia laloa maragi, Baibel ia gwauraia lasi taravatudia idia laloa bada. Oibe, kara dikadia ese tau ta ia hadikaia, bona Iesu ia gwau idia be ta ena lalona dekenai idia matamaia. Ioane 7:1; Deuteronomi 16:16; Mataio 15:​1-20; Mareko 7:​1-23; Esodo 20:12; 21:17; Isaia 29:13.

▪ Iesu idia badu henia dainai dahaka idia karaia?

▪ Farisea taudia ese dahaka samani herevana idia gwauraia, to Iesu ia gwau, edena dala amo Farisea taudia ese Dirava ena Taravatu idia utua?

▪ Iesu ia gwau dahaka ese tau ta ia hadikaia?