Karoa 3

Dala Ia Lailaia Tauna Ia Vara

MARIA be hua toi Elisabeta ida ia noho, bena ia rakatania, ia lou lao ena hanua Nasaret dekenai. Elisabeta ena mara negana be kahirakahira, to hua 6 idia do noho ela bona Maria do ia mara.

Elisabeta ia mara neganai moale bada ia vara, badina be ia mara namo bona ia bona ena beibi idia namo! Ia ese ena natuna merona be ena dekena taudia bona ena varavara dekediai ia hahedinaraia neganai, iboudiai be ia ida idia moale hebou.

Bena, Dirava ese Israel taudia ia henidia taravatuna hegeregerena, dina namba 8 ai mero ena kopina idia utua. Unai dainai edia turadia bona edia varavara be unai dina ai idia vadivadi henidia. Idia gwau namona be mero ena ladana do idia hatoa Sekaria, ena tamana ena ladana hegeregerena. To Elisabeta ia haere, ia gwau: “Lasi, iena ladana be Ioane.” Aneru Gabriel ese ia gwauraia ladana unai.

To idia gwau: “Be, unai be oiemu iduhu tauna ta ena ladana, a?” Bena toa amo beibi ena tamana idia nanadaia, mero ena ladana be edena bamona do ia hatoa. Sekaria ese toretore gauna ta ia gwauraia, bena inai bamona ia torea: “Iena ladana be Ioane.” Bena iboudiai idia hoa bada.

Unai neganai Dirava ese hoa dalanai Sekaria ena uduna ia kehoa lou. Guna, ena uduna be hoa dalanai ia koua badina be aneru ena hereva ia abia dae lasi, Elisabeta be natuna do ia abia herevana ia gwauraia neganai. Sekaria ia hereva neganai ena dekena taudia iboudiai idia hoa, idia gwau: “Inai mero ese edena bamona kara do ia karaia?”

Unai neganai lauma helaga ese Sekaria ena lalona ia hahonua, bena ia gwau: “Lohiabada, Israel ena Dirava, ita hanamoa. Badina be ia ese ena bese taudia ia durua vadaeni, bona idia dekenai ia hamauria vadaeni. Hahemauri Tauna ia ese ia haginia vadaeni ita totona. Ia be ena hesiai tauna Davida ena iduhu dekena amo.” Unai “Hahemauri Tauna” be Lohiabada Iesu, do ia vara tauna. Sekaria ia gwau, unai tau ena amo Dirava ese “ita dekenai idia tuari henia taudia dekena amo ita do ia hamauria. . . . Ena hesiai gaukara do ita karaia, bona ita gari lasi. Mai helaga danu bona mai maoromaoro danu ia vairana dekenai do ita raka, iseda mauri dina ibounai lalonai.”

Bena Sekaria ese ena natuna Ioane ia perovetalaia, ia gwau: “Egu natuna e, Ataiai Momokani Diravana ena peroveta tauna do idia gwauraia oi, badina oi be Lohiabada ena vairana dekenai do oi raka. Ena dala do oi kehoa. Mauri dalana oi ese iena bese taudia dekenai do oi hadibaia, edia dika gwauatao totona. Badina be iseda Dirava ena bogahisihisi ia bada ita dekenai. Ena hahemauri do ia siaia ita dekenai, daba rere ia siaia bamona. Dibura lalonai bona mase ena gari lalonai idia noho taudia dekenai, diari do ia henia bona iseda maino ena dala dekenai do ia hakaudia.”

Unai neganai Maria be ena hanua Nasaret dekenai ia ginidae vadaeni. Ia do headava lasi. Iena rogorogo toana do ia hedinarai neganai, dahaka do ia vara ia dekenai? Luka 1:​56-80; Levitiko 12:​2, 3.

▪ Ioane ia vara guna bena hua hida murinai Iesu ia vara?

▪ Ioane ena mauri dinadia be 8 neganai, dahaka ia vara?

▪ Dirava ese ena bese taudia edena bamona ia durudia?

▪ Ena tamana ia gwau Ioane be dahaka gaukara do ia karaia?