Karoa 13

Diabolo ese Iesu Ia Dibagania

IESU ese bapatiso ia abia, bena maoromaoro Dirava ena lauma ese ia hakaua lao, Iudea ena tano gagaena dekenai. Gau momo ia lalohadailaia gwauraia, badina be bapatiso ia abia neganai, “guba be ia kehoa” iena, guba gaudia ia lalo-pararalaia totona.

Iesu be dina 40 bona hanuaboi 40 tano gagaena ai ia noho neganai, ia aniani lasi. Bena ia hitolo mase neganai, Diabolo be ia dekenai ia lao, ia gwau: “Bema oi be Dirava ena Natuna neganai inai nadi dekenai oi hereva henia, vadaeni aniani gaudia dekenai do idia halaoa.” To Iesu ia diba, ia abia siahuna be sibona ena ura totona ia gaukaralaia be maoro lasi. Unai dainai unai hedibagani ia dadaraia.

Bena Diabolo ese ma dala ta amo ia dibagania lou. Ia hamaoroa, dubu helaga ena atai amo do ia roho diho bena Dirava ena aneru ese ia do idia naria. To Iesu ese unai hedibagani danu ia dadaraia. Buka Helaga ena hereva ia gwauraia, ia gwau unai dala amo Dirava ia dibagania be maoro lasi.

Hedibagani ihatoina ai Diabolo ese hoa dalana amo tanobada ena basileia iboudiai Iesu ia hahedinarai henia, bena ia gwau: “Bema lau dekenai oi tomadiho, vadaeni inai ibounai be oi dekenai do lau henia.” Iesu ese unai hedibagani danu ia dadaraia, badina be ia ura Dirava ia badinaia.

Unai hedibagani edia sivarai ese ita ia hadibaia. Ia hahedinaraia Diabolo be kara dika ena siahu sibona lasi, taunimanima haida idia hereva bamona, to ia be lauma tauna korikorina ta. Danu, ia hahedinaraia tanobada ena gavamani iboudiai be Diabolo ena. Bema idia be iena lasi, edena bamona Keriso ia henia gwauraia diba?

Inai danu mani oi laloa: Diabolo ia gwau, bema nega tamona mo Iesu ese ia tomadiho henia, ia ese davana namona, tanobada ena basileia iboudiai unai, do ia henia. Reana unai bamona dala amo Diabolo ese ita danu do ia dibagania toho; dala do ia kehoa, moni o kohu o siahu o dagi bada do ita abia totona. To herevana dahaka dahaka hedibagani do ita davaria, namona be Dirava do ita badinaia noho, Iesu ia kara hegeregerena! Mataio 3:16; 4:​1-11; Mareko 1:​12, 13; Luka 4:​1-13.

▪ Dina 40 tano gagaena ai ia noho negana lalonai, Iesu ese dahaka ia lalohadailaia?

▪ Edena dala amo Diabolo ese Iesu ia dibagania toho?

▪ Iesu dekenai idia vara hedibaganidia edia sivarai ese dahaka ia hadibaia ita dekenai?