Karoa 64

Dika Gwauatao Karana

KAPERANAUM dekenai, Iesu bona ena hahediba taudia be ruma lalonai idia do noho. Ia ese kerere hamaoromaorodia dalana ia herevalaia, bena Petro ese ia nanadaia, ia gwau: “Lohiabada e, lauegu tadikakana do ia hadikaia lau dekenai, bona ena dika do lau gwauatao ela bona nega hida?” Iuda tomadiho hadibaia taudia idia gwau nega toi, unai dainai reana Petro ia laloa “nega 7” ia gwauraia be namo.

To ta ena kerere negadia ta ta duahia karana be maoro lasi. Unai dainai Iesu ese Petro ena lalohadai ia hamaoromaoroa, ia gwau: “Umui lau hamaoroa, nega 7 sibona lasi, to nega 70 × 7.” Unai amo ia hahedinaraia, Petro ese ena tadikaka ena dika gwauatao negadia be mai hetoana lasi.

Iesu ia ura ena hahediba taudia idia diba kara dika idia gwauatao be namo, unai dainai inai parabole ia henidia: Pavapava ta ia ura ena hesiai taudia edia abitorehai ia nanadailaidia. Hesiai tauna ta be ia dekenai idia hakaua vareai. Ena abitorehai be 1,000,000 kina. Dala be lasi unai moni do ia haloua. Unai dainai pavapava ia gwau, unai tau mai ena adavana bona edia natudia danu do idia hoidia, ena abitorehai ena davana totona.

Bena unai hesiai tauna be ena biaguna ena vairanai ia goru diho, ia noia mai goada ida, ia gwau: “Nega sisina do oi henia lau dekenai, vadaeni ena davana ibounai do lau henia oi dekenai.”

Ena biaguna ese ia bogaia hisi, ena abitorehai ena davana ia gwauatao. To unai hesiai tauna ia raka lasi neganai, ena bamona ta ia davaria, guna 5 kina ia henia torehai. Ena bamona ia dogoatao, ena aiona ia gigia, ia gwau: “Lau dekenai moni oi abitorehai ena davana oi henia lau dekenai.”

To ena bamona be moni lasi dainai ia vairanai ia goru diho, ia noia, ia gwau: “Nega sisina do oi henia lau dekenai, vadaeni ena davana ibounai do lau henia oi dekenai.” Hesiai tauna ese ena biaguna ena hebogahisi karana ia tohotohoa lasi, to ena bamona be dibura ruma naria taudia imadia ai ia atoa dibura rumana lalonai idia doria vareai totona.

Vadaeni, hesiai taudia oredia ese unai kara idia itaia bena idia lao edia biaguna idia hadibaia. Mai ena badu ida ia ese unai hesiai tauna ia boiria, ia gwau: “Oi be hesiai tauna dikana, oi noinoi dainai oiemu abitorehai ena davana ibounai lau gwauatao. Ia maoro lasi, a, bema oi bogahisihisi oiemu bamona dekenai, oi dekenai lau bogahisihisi bamona?” Ia badu dikadika dainai, ia ese unai hebogahisi lasi hesiai tauna be dibura ruma naria taudia imadia ai ia atoa dibura rumana ai idia doria vareai totona, unuseniai do ia noho ela bona ena abitorehai davana ibounai do ia haorea.

Bena Iesu ia gwau: “Unai dainai, egu Tamana guba dekenai ia noho be unai bamona do ia karaia umui dekenai, umui ta ta emui lalona dekenai emui tadikakana edia dika do umui gwauatao lasi neganai.”

Unai be hadibaia herevana namona, dika gwauatao karana dekenai, ani? Bema Keristen tadikakana ta ese ita ia kara dika henia, unai dika be maragi, to iseda kara dika Dirava vairanai be bada herea, bona ia ese iseda kara dika be nega momo herea ia gwauatao vadaeni. Nega momo ita diba lasi ita kara dika henia. Unai dainai, iseda tadikaka ena kara dika ita dekenai ita gwauatao loulou be namo ani? Danu, namona be Iesu ena hereva ita laloatao, ia gwau Dirava ita noia diba, ‘iseda dika do ia gwauatao, badina be ita dekenai idia hadikaia taudia edia dika ita gwauatao’ dainai. Mataio 18:​21-35; 6:12; Kolose 3:13.

▪ Dahaka dainai Petro ese ena tadikaka ena dika gwauatao karana ia nanadailaia, bona dahaka dainai ia laloa “nega 7” ia gwauatao be namo?

▪ Pavapava ena kara bona ena hesiai tauna ena kara be edena bamona idia idau?

▪ Iesu ena parabole amo dahaka ita diba?