Karoa 104

Dirava ena Gadona Nega Ihatoina Idia Kamonai

DUBU dekenai ia noho neganai, Iesu ese do ia abia masena ia lalo-hekwarahilaia. Ia gari, ena mase ese ena Tamana ena ladana do ia hadikaia garina. Unai dainai ia guriguri, ia gwau: “Egu Tamana e, oiemu ladana oi hanamoa.”

Unai neganai gado badana ta guba amo ia mai, ia gwau: “Lau hanamoa vadaeni, ma do lau hanamoa lou.”

Unuseniai idia gini taudia hutuma idia daradara. Haida idia gwau: “Aneru ta ese ia hereva henia noho.” Ma haida idia gwau guba ia boiboi. To lasi, Iehova Dirava ia hereva unai! Unai be nega ihatoina taunimanima ese Dirava ena gado idia kamonai, Iesu ia herevalaia o ia hereva henia negadiai.

Lagani toi mai kahana idia lao vadaeni, Iesu ia bapatiso neganai, Ioane Bapatiso ese Dirava ena gadona ia kamonai, Iesu ia herevalaia, ia gwau: “Inai be lauegu Natuna, egu lalokau, lau moale bada ia dekenai.” Bena lagani ta ia lao vadaeni, Paseka Ariana murinai, Iakobo, Ioane, bona Petro vairadiai Iesu ena oromana ia idau neganai, Dirava ena gadona idia kamonai, ia gwau: “Egu Natuna be inai, lauegu lalokau tauna. Lauegu lalona ia moale ia dekenai. Iena hereva do umui kamonai henia.” Bona hari, Nisan 10 ai, dina hani idia do noho ela bona Iesu do ia mase neganai, taunimanima hutuma ese Dirava ena gadona idia kamonai! Nega ihatoina unai.

Iesu ia gwau: “Unai gado be lau totona lasi, to umui totona ia mai.” Unai gado ese ia hamomokania Iesu be Dirava ena Natuna, gwauhamata Mesiana. Iesu ma ia gwau: “Harihari inai tanobada taudia be Dirava ese ia kota henia, harihari ia ese inai tanobada ena lohia do ia lulua murimuri dekenai.” Iesu ena kamonai karana ese ia hamomokania, tanobada ena lohia, Satana Diabolo, do ia “lulua murimuri dekenai” be maoro, anina be do ia hamasea.

Iesu ese ena mase dainai do idia vara gaudia ia hahedinaraia, ia gwau: “Tanobada dekenai lau do idia abia isi neganai taunimanima ibounai be lau dekenai do lau veria.” Ena be do ia mase, to do ia lusi lasi, badina ena mase amo taunimanima be ia dekenai do ia veridia, mauri hanaihanai do idia abia totona.

To hutuma ese unai hereva idia abia dae lasi, idia gwau: “Ai be taravatu dekena amo ai kamonai vadaeni, Keriso be do ia noho hanaihanai. Badina dahaka oi gwau Taunimanina ena Natuna be do idia abia isi? Inai Taunimanima ena Natuna be daika?”

Ena be Dirava ena gadona idia kamonai vadaeni bona gau momo ese idia hamomokania Iesu be taunimanima ena Natuna korikorina, Dirava ese ia gwauhamatalaia Mesiana, to momo ese Iesu idia abia dae lasi. Hua 6 idia ore vadaeni, Kalaga Ariana dekenai ia hereva vadaeni bamona, Iesu ia gwau lou ia be “diari,” bona ena hereva idia kamonai taudia ia hamaorodia, ia gwau: “Diari umui abia noho neganai, diari dekenai do umui abidadama henia, diari taudia do umui halaoa totona.” Iesu be unai bamona ia hereva, bena ia raka oho, ia komu, badina haida ese idia hamasea gwauraia.

Iuda taudia ese Iesu idia abidadama henia lasi neganai, Isaia ena peroveta herevana idia hagugurua. Ia gwau: “Dirava ese edia matana ia hakepulua vadaeni. Edia lalona danu ia hadiburaia . . . edia lalona do idia giroa, bona Dirava ese idia do ia hamauria garina.” Matahanai lalonai Isaia ese Iehova ena guba rumana ia itaia, unuseniai Iesu be Dirava dekenai ia noho mai ena hairai bada, tanobada dekenai ia do mai lasi neganai ia abia hairaina. To, Isaia ena hereva hegeregerena, Iuda taudia ese edia lalona idia ha-aukaia bona ena be gau momo ese idia hahedinaraia Iesu be edia Hahemauri Tauna, to unai idia dadaraia.

To hanua lohiadia momo danu ese Iesu idia abidadama henia (Iuda edia kota badana, Sanhedrin, taudia unai). Idia rua be Nikodemo bona Iosef, Arimatea tauna. Unai neganai unai hanua lohiadia ese Iesu idia abidadama henia, to idia gwauraia hedinarai lasi, edia dubu dagidia amo do idia luludia garina. Gau namodia momo idia reaia unai!

Bena Iesu ia gwau: “Lau dekenai ia abidadama henia tauna ese lau sibona lasi, to lau ia siaia Diravana danu ia abidadama henia. Bona lau ia itaia tauna ese lau ia siaia Diravana danu ia itaia. . . . Tau ta ese egu hereva do ia kamonai to do ia badinaia lasi, lau be do lau kota henia lasi, badina lau be tanobada hamauria totona lau mai. . . . Lau gwauraia herevadia ese do idia kota henia dokona dina dekenai.”

Iehova ese tanobada taudia ia lalokau henidia dainai Iesu ia siaia, idia abidadama henia taudia ese mauri do idia davaria totona. Iesu ena hereva, Dirava ese ia hadibaia herevadia, idia badinaia taudia sibodia ese mauri do idia davaria. “Dokona dina dekenai,” Keriso ena Lohia Laganidia 1,000 lalodiai, edia kara hegeregeredia do idia kota henidia.

Ena hereva dokonai Iesu ia gwau: “Lau sibona egu siahu dekenai hereva lau gwauraia lasi, to lauegu Tamana, lau ia siaia Diravana, ese ia hereva lau dekenai dahaka hereva dahaka hereva do lau gwauraia, bona edena bamona do lau hereva. Lau diba danu lauegu Tamana ena hereva be mauri hanaihanai. Unai dainai, lauegu hereva be lauegu Tamana ese ia henia lau dekenai hegeregerena lau gwauraia noho.” Ioane 12:​28-50; 19:​38, 39; Mataio 3:17; 17:5; Isaia 6:​1, 8-10.

▪ Edena nega toiosi ai taunimanima ese Dirava ena gadona idia kamonai, Iesu ia herevalaia o ia hereva henia negadiai?

▪ Peroveta tauna Isaia be edena dala amo Iesu ena hairai ia itaia?

▪ Iesu idia abidadama henia lohiadia be daidia, bona dahaka dainai ia idia gwauraia hedinarai lasi?

▪ “Dokona dina” be dahaka, bona dahaka do idia laloa, taunimanima do idia kota henidia neganai?