Karoa 132

Dirava ena Idibana Kahanai

PENTEKOSTE dinanai Iesu be lauma helaga ia bubua diho neganai, unai ese ia hamomokania guba ai ia ginidae vadaeni. Nega sisina murinai, Stefano ia matahanai neganai ia itaia gauna danu ese unai ia hamomokania. Ena haroro dainai nadi amo idia hodoa noho neganai, ia gwau: “Inai, lau itaia guba ia kehoa, Taunimanima ena Natuna danu lau itaia, Dirava ena idiba kahanai ia gini noho.”

Unuseniai Iesu ia naria noho, ela bona ena Tamana ese do ia oda henia, do ia gwau: “Oi lao, oiemu inai taudia bogaragidiai oi kwalimu.” Ia naria noho lalonai, dahaka ia karaia? Ia ese ena hahediba taudia, Dirava ese ia horodia taudia, ia lohiadia, edia haroro gaukarana lalonai ia hakaudia, bona ia hahegaegaedia, toreisi lou amo pavapava ai do idia lao bona ia ida do idia lohia hebou iena Tamana ena Basileia lalonai.

Unai hegeregerena, Iesu ese Saulo (Roma gado ai ena ladana be Paulo) ia abia hidi, hahediba taudia karadia gaukarana tano idaudia ai do ia gunalaia totona. Saulo ese Dirava ena Taravatu ia badinaia goadagoada, to Iuda tomadiho gunalaia taudia ese idia hakaua kerere dainai, ia ese Stefano alaia mase karana ia hanamoa sibona lasi, to ia ese danu hahelaga tauna badana Kaiafa ena amo revareva ia abia, bena Damasko dekenai ia lao, Iesu badinaia taudia haida unuseniai bema ia davaridia, tatau eiava hahine, do ia guidia bena mai guidia ida do ia abidia lao Ierusalem dekenai. To Saulo be dala ai ia raka neganai diari badana ta ese ia gegea ahu, bena ia be tano ai ia keto.

Gado ta ia kamonai, ia gwau: “Saulo e, Saulo e, badina dahaka lau dekenai oi dagedage noho?” Saulo ia haere, ia gwau: “Lohiabada e, oi be daika?”

Ia gwau: “Lau be Iesu, oi ese lau dekenai oi dagedage noho.”

Unai diari, hoa dalanai ia vara gauna, ese Saulo ena matana ia hakepulua vadaeni. Iesu ese ia hamaoroa Damasko ai do ia raka vareai bena do ia hamaoroa edena bamona do ia karaia. Bena matahanai ai Iesu ese ena hahediba taudia ta ladana Anania dekenai ia hedinarai. Saulo ia hamaorolaia, ia gwau: “Inai tau be lau ese lau abia hidi vadaeni, idau bese taudia bona king bona Israela taudia vairanai lauegu ladana do ia gwauraia.”

Unai murinai, Iesu ese ia durudia noho lalonai, Saulo (Paulo) bona ma haroro taudia haida be edia haroro bona hadibaia gaukarana dekenai idia kwalimu momokani. Lagani 25 bamona idia ore murinai, Paulo be ena revareva ta lalonai ia gwau: “Sivarai Namona . . . ai ese tanobada ibounai dekenai ai harorolaia vadaeni.”

Ma lagani momo idia ore murinai, Iesu ese matahanai haida be iena lalokau aposetolona Ioane ia henia, bena Ioane ese Apokalupo bukana lalonai ia toredia. Unai matahanai amo Ioane ese Iesu be mai ena Basileia siahuna do ia mai negana ia itaia. Ioane ia gwau “Lauma Helaga” amo “Lohiabada ena dina” dekenai ia ginidae. Unai “dina” be dahaka?

Iesu ena peroveta herevana, dina gabedia herevana unai, bona Baibel ena peroveta herevadia ma haida danu idia stadilaia neganai, idia davaria “Lohiabada ena dina” be lagani 1914 ai ia matamaia, oibe, inai uru ena nega lalonai! Iesu be lagani 1914 ai ia lou mai neganai taunimanima ese idia itaia lasi, bona ena hesiai taudia mai edia kamonai sibodia be idia diba ia lou mai vadaeni. Unai lagani ai Iehova ese Iesu ia hagania, do ia lao bona iena inai taudia bogaragidiai do ia kwalimu!

Iena Tamana ena oda hegeregerena, Iesu ese Satana bona ena demoni guba amo ia negedia diho tanobada dekenai. Matahanai ai Ioane ese unai ia itaia murinai, ia kamonai, gado ta guba ai ia boiboi, ia gwau: “Harihari iseda Dirava ena hahemauri ia ginidae vadaeni. Harihari iena Keriso ese iena siahu ia hedinaraia vadaeni.” Oibe, lagani 1914 ai Keriso be ena King dagina ai ia lohia matamaia!

Guba ai Iehova tomadiho henia taudia ese unai idia moalelaia bada. Unai gado ese ia hamaorodia, ia gwau: “Guba e, bona gubai noho taudia e! Unai kara dainai do umui moale bada!” To tanobada noholaia taudia be edena bamona? Unai gado be ma ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina be ia diba iena nega be ia kwadogi sibona.”

Keriso ese ia haganidia hegeregerena, iena orea taudia ese Dirava ena Basileia ena Sivarai Namona tanobada ibounai dekenai idia harorolaia noho. Unai amo ia ese taunimanima ia hapararadia noho; unai sivarai idia abia dae taudia be Dirava ena nega matamatana ai do idia vareai, bona idia dadaraia taudia be do ia hamasedia ore. Momokani, Keriso ese oi danu unai bamona ia hahemaoro henia noho.

Taunimanima hapararadia gaukarana do ia ore murinai, Dirava ena ladanai Iesu Keriso ese Satana ena orea ibounai tanobada dekenai do ia haorea. Kara dika ibounai be tuari ta ladana Aramagedono amo do ia haorea. Unai murinai Iesu ese Satana bona ena demoni do ia dogodia tao bona “guri dobu masemase” lalonai do ia koudia ela bona lagani 1,000 do idia ore; anina be unai nega lalonai mase taudia hegeregeredia do idia noho dainai kara ta do idia karaia diba lasi. Kara 7:​55-60; 8:​1-3; 9:​1-19; 16:​6-10; Salamo 110:​1, 2; Heberu 10:​12, 13; 1 Petero 3:22; Luka 22:​28-30; Kolose 1:​13, 23; Apokalupo 1:​1, 10; 12:​7-12; Apokalupo 16:​14-16; 20:​1-3; Mataio 24:14; 25:​31-33.

▪ Iesu be guba dekenai ia daekau murinai, edeseniai ia noho, bona dahaka ia naria?

▪ Iesu ia daekau murinai daidia ia lohiadia, bona ena lohia siahuna be edena bamona ia hahedinaraia?

▪ “Lohiabada ena dina” be edena negai ia matamaia, bona ena matamana neganai dahaka ia vara?

▪ Dahaka hapararaia gaukarana be mai anina ita ta ta ibounai dekenai, bona Keriso ese unai hapararaia gaukarana edena bamona ia karaia?

▪ Unai gaukara do ia ore murinai, dahaka do ia vara?