Karoa 133

Dirava ena Ura Ia Hagugurua

TUARI Pavapavana Iesu Keriso ese Satana bona ena tanobada oromana dikana do ia kokidia neganai, moale bada herea do ia vara! Iesu ena Lohia Laganidia 1,000 edia maino negana ia matamaia unai!

Iesu bona ia ida idia lohia hebou taudia ese do idia haganidia hegeregerena, Aramagedono amo idia roho mauri taudia ese unai tuari ena momoru do idia kokia. Natudia do idia havaradia reana, bena idia danu ese tano do idia biru henia mai edia moale ida, bona imea mai hairaina ai do idia halaoa.

Unai nega lalonai Iesu ese taunimanima milion momo be edia gara amo do ia hatoredia isi, unai Paradaiso do idia moalelaia totona. Unai bamona do ia karaia ia sibona ena gwauhamata hamomokania totona; guna ia gwau: “Nega ta do ia mai, mase guria gabu dekenai idia noho taudia ibounai . . . do idia toreisi.”

Iesu ese ia badinai satauro ai ia mase tauna danu do ia hatorea isi. Guna Iesu ese ia gwauhamata henia, ia gwau: “Momokani lau hamaoroa oi dekenai . . . ita ruaosi Paradaisa dekenai do ita ginidae.” Iesu ese unai tau be guba dekenai do ia abia lao lasi ia ida ia lohia totona, bona Iesu be tanobada tauna ai do ia lao lasi Paradaiso tanobadana dekenai ia ida do ia noho totona. Iesu be unai tau ida do ia noho, anina be do ia hatorea isi bona Paradaiso ai do ia hanohoa bona tauanina dalana ai bona lauma dalana ai do ia naria, rau gabena ena laulau ai ia hedinarai bamona.

Iesu ese do ia naridia noho mai ena lalokau ida lalonai, taunimanima iboudiai​—Aramagedono amo idia roho mauri taudia mai edia natudia ida, bona mase amo ia hatoredia isi bena idia kamonai henia taudia milion momo danu​—be taunimanima goevadaedia ai do idia lao. Iena Natuna Iesu Keriso ena amo, Iehova be taunimanima ida do ia noho lauma dalana ai. “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” Ta do ia hisihisi lasi bona do ia gorere lasi.

Iesu ena Lohia Negana ena dokonai, kara maoromaoro taudia goevadaedia ese tanobada do idia hahonua. Unai be Dirava ena palani hegeregerena, unai palani ia gwauraia, Adam bona Eva ia hamaorodia edia bese do idia havaraia bona tanobada do idia hahonua neganai. Unai do ia vara, badina be Iesu ena boubou gauna ena anina ese taunimanima iboudiai do ia hanamodia dainai. Adam ena kara dika dainai ia vara masena do ia ore vaitani!

Unai dala amo Iesu ese ena gaukara, Iehova ese ia henia gaukarana, do ia hagugurua. Unai dainai, lagani 1,000 do idia ore neganai, ia ese Basileia bona taunimanima goevadaedia be ena Tamana do ia henia. Bena Dirava ese Satana bona ena demoni danu guri dobu masemasena amo do ia ruhadia. Dahaka totona?

Lagani 1,000 idia ore neganai, Paradaiso idia noholaia taudia momo herea be toreisi lou taudia, Satana ese edia abidadama ia do tohoa lasi taudia unai. Guna, idia do mase lasi neganai, Dirava ena gwauhamata idia diba lasi, unai dainai idia hahedinaraia diba lasi idia abidadama henidia. Bena, idia toreisi lou bona Baibel ena hereva momokanidia idia diba murinai, Paradaiso lalonai Dirava idia badinaia be haraga, badina be koudia taudia be lasi. To bema Satana ese tohodia dalana ia davaria, Dirava do idia badinaia noho eiava? Unai henanadai haerelaia totona, Dirava ese Satana do ia ruhaia.

Iesu ese Ioane ia haheitalaia gauna ese ia hahedinaraia, unai lagani 1,000 do idia ore murinai, Satana ese taunimanima do ia tohodia neganai momo ese Dirava do idia dadaraia. Bena unai hahetoho ginigabena ia ore neganai, Satana mai ena demoni bona ia hakereredia taudia iboudiai danu be Dirava ese do ia hamasedia ore. To unai hahetoho ai idia kwalimu mai edia kamonai taudia do idia mauri noho, bona edia Tamana guba ai ia noho ena hahenamo do idia moalelaia ela bona hanaihanai.

Momokani, Iesu ese gaukara bada ia karaia vadaeni Dirava ena palani hagugurua totona, bona unai bamona do ia karaia noho. Nega vairai hahenamo badadia do ita moalelaia diba, Dirava ena guba Pavapavana badana dagina ai do ia karaia karadia iboudiai dainai. To tanobada ai ia karaia gaukarana ita laloaboio diba lasi.

Iesu be mai ena ura ida tanobada dekenai ia mai bona ena Tamana ia gwauraia hedinarai bona ena kara namodia ia hahedinaraia. Iesu ena boga-auka, ena aonega hereadaena, ena hadibaia karana namo hereana, ena gari lasi hakaua karana, ena lalokau bona ena hebogahisi ita laloa neganai, unai ese iseda lalona ia hamarerea. Iseda mauri davana ia henia neganai hisihisi bada herea ia ania, bona unai dala tamona amo mauri ita davaria diba. Unai dainai, iena hisihisi ita laloa neganai, iseda lalona amo ita tanikiu henia!

Momokani, Iesu ena mauri sivaraina ita tahua neganai ita davaria ia be tau idauna ta! Ia hedinarai goevagoeva ia be tau hereadaena. Roma gavana Pontio Pilato ia hereva hegeregerena, ita danu ita hereva, ita gwau: “Itaia! Tauna be inai!” Oibe, Iesu be tau hereadaena, tanobada taudia iboudiai ia hereadia!

Bema Iesu ena boubou gauna ena heduru ita abia dae, Adam ena amo ita abia gaudia, kara dika bona mase unai, be ita eda amo do ia kokia, bena iseda “Tamana Hanaihanai” ai do ia lao. Mauri hanaihanai idia abia gwauraia taudia ese Dirava mo sibona idia diba be hegeregere lasi, to iena Natuna Iesu Keriso danu idia diba be gau badana. Ai ura inai buka oi duahia karana ese oi do ia durua, unai diba do oi abia totona! 1 Ioane 2:17; 1:7; Ioane 5:​28, 29; 3:16; 17:3; 19:5; Luka 23:43; Genese 1:28; 1 Korinto 15:​24-28; Apokalupo 20:​1-3, 6-10; 21:​3, 4; Isaia 9:6.

▪ Aramagedono amo idia roho mauri taudia bona edia natudia ese dahaka gaukara namona do idia karaia?

▪ Daidia danu be Paradaiso ai do idia noho, bona Iesu be idia ida do ia noho ena anina be dahaka?

▪ Lagani 1,000 idia ore neganai taunimanima edia noho be edena bamona, bona unai negai Iesu ese dahaka do ia karaia?

▪ Dahaka dainai Dirava ese Satana guri dobu masemasena amo do ia ruhaia, bona gabeai dahaka do ia vara ia bona idia badinaia taudia dekediai?

▪ Edena dala amo Iesu be iseda “Tamana Hanaihanai” ai do ia lao diba?