Karoa 116

Do Ia Rakatanidia Dainai Edia Lalona Ia Hagoadaia

MEMORIAL ariana murinai, Iesu bona ena aposetolo be atai daiutuna lalonai idia helai noho. Bena nega sisina lalonai gau momo ia hamaorolaidia. Edia lalona hagoadaia totona ia gwau: “Umui laloa hekwarahi lasi, Dirava dekenai umui abidadama henia, lau dekenai danu umui abidadama henia.”

Ma ia gwau: “Egu Tamana ena ruma dekenai noho gabudia be momo herea, . . . do lau lao, gabu ta do lau karaia hegaegae umui emui . . . Vadaeni lau noho gabuna dekenai be umui danu unuseni do umui noho. Do lau lao gabuna ena dala danu umui diba.” Aposetolo idia diba lasi guba dekenai do ia lao herevana ia gwauraia unai, unai dainai Toma ese ia nanadaia, ia gwau: “Lohiabada e, do oi lao gabuna be ai diba lasi, dala be edena bamona do ai diba?”

Iesu ia haere, ia gwau: “Dala be lau, hereva momokani be lau, mauri danu lau.” Ta be Tamana ena guba rumana dekenai ia vareai dalana tamona be inai: Iesu ia abidadama henia bona iena mauri dalana ia tohotohoa. Badina be, Iesu ia hereva hegeregerena, “Tamana dekenai do idia lao taudia ibounai edia dala ta be lasi, lau sibona.”

Filipo ese ia noia, ia gwau: “Aiemai ura tamona be inai, Tamana do oi hedinaraia ai dekenai.” Filipo ia ura Iesu ese Dirava do ia haheitalaidia, gunaguna Dirava be matahanai ai Mose, Elia, bona Isaia vairadiai ia hedinarai hegeregerena. To aposetolo ese unai matahanai ia hanaidia gauna idia itaia vadaeni; Iesu ia gwau: “Filipo e, lau be nega daudau umui danu lau noho vadaeni, umui diba lasi lau, a? Lau ia itaia tauna ese egu Tamana danu ia itaia.”

Iesu ese ena Tamana ena kara ia hahedinaraia goevagoeva dainai, ia ida noho hebou bona iena kara itaia karana be ena Tamana itaia karana hegeregerena. To, Iesu ese ia hahedinaraia iena Tamana ese ia hereaia, ia gwau: “Umui dekenai lau henia herevadia ibounai be lau sibona lau gwauraia lasi, egu Tamana lauegu lalona dekenai ia noho be iena gaukara ia karaia noho.”

Bena Iesu ese ena aposetolo edia lalona ma ia hagoadaia lou, ia gwau: “Lau dekenai ia abidadama henia tauna ese lau karaia karadia ibounai be do ia karaia, bona inai kara do idia hanaia karadia danu do ia karaia”! Anina be, edia hoa karadia karaia siahuna ese iena siahu do ia hereaia lasi, to nega daudau lalonai gabu momo herea dekenai taunimanima momo herea do idia haroro henidia neganai, edia gaukara ena bada ese iena gaukara ena bada do ia hanaia.

Iesu do ia mase murinai ena hahediba taudia do ia negedia lasi. Ia gwauhamata henidia, ia gwau: “Egu ladana dekenai do umui noia gaudia ibounai do lau karaia.” Ma ia gwau: “Lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai, hereva momokani Laumana unai.” Gabeai, Iesu be guba dekenai ia lou lao neganai, unai lauma helaga be idia latadiai ia bubua diho.

Iesu ena mase be kahirakahira dainai, ia gwau: “Nega daudau lasi tanobada taudia ese lau do idia itaia lou lasi,” badina be lauma tauna ai do ia lao. To ena aposetolo ia gwauhamata henidia lou, ia gwau: “Umui ese lau do umui itaia. Lau mauri dainai umui danu do umui mauri.” Anina be, do ia toreisi lou murinai idia vairadiai tauanina ai do ia hedinarai, bena gabeai, do ia hatoredia isi lou neganai, idia be lauma taudia ai do idia lao bona ia ida guba ai do idia noho hebou.

Bena ia gwau: “Lauegu taravatu ia abia dae bona ia badinaia tauna, inai tau ese lau ia lalokau henia. Lau ia lalokau henia tauna be lauegu Tamana ese ia do ia lalokau henia, lau danu do lau lalokau henia, bona ia dekenai do lau hedinarai.”

Bena aposetolo Iuda, ladana ma ta Tadeo, ese Iesu ia nanadaia, ia gwau: “Lohiabada e, badina dahaka ai dekenai do oi hedinarai, to tanobada taudia dekenai do oi hedinarai lasi?”

Iesu ia gwau: “Lau ia lalokau henia tauna ese lauegu hereva do ia badinaia, vadaeni egu Tamana ese do ia lalokau henia . . . To lau ia lalokau henia lasi tauna ese lauegu hereva ia badinaia diba lasi.” Tanobada taudia be Keriso idia badinaia taudia hegeregeredia lasi; iena hahediba herevadia idia dadaraia. Unai dainai idia dekenai ia hedinarai lasi.

Iesu ese ena aposetolo gau momo herea ia hadibadia vadaeni, to edia anina idia do lalo-pararalaia lasi. Vadaeni, unai gau be edena bamona do idia laloatao? Iesu ia gwauhamata henidia, ia gwau: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai be ia ese umui emui lalona dekenai do ia hedinaraia lou.”

Bena ia gwau: “Maino umui dekenai lau rakatania, lauegu maino lau henia umui dekenai. . . . Umui laloa hekwarahi lasi bona umui gari lasi.” Momokani, ia rakatanidia gwauraia, to ia gwau: “Bema lau umui lalokau henia, egu Tamana dekenai do lau lao herevana do umui moalelaia, badina be egu Tamana ese lau ia hanaia.”

Ia diba nega sisina mo idia dekenai do ia noho. Ia hamaorodia, ia gwau: “Harihari ia lao, hereva momo do lau henia lasi umui dekenai, badina be tanobada ena lohia ia mai noho vadaeni. Ia be lau dekenai mai ena siahu lasi.” Satana Diabolo, Iuda Iskariote ena lalona ai ia vareai bena ia biagua tauna, be tanobada ena lohia. To Iesu be mai ena manoka lasi, unai dainai Satana be dala lasi Dirava ena hesiai gaukarana amo do ia veria oho.

Hetura Karana Namona

Iesu ese ena aposetolo edia lalona unai bamona ia hagoadaia murinai, hanuaboi momokani ai ia hamaorodia, ia gwau: “Umui toreisi. Ita lao.” To idia do raka lasi neganai, hereva hegeregerena ta ia hamaorolaidia, ia lalokau henidia dainai.

Ia gwau: “Lau be vain korikori, egu Tamana be vain edia uma gabu naria tauna.” Uma Naria Tauna Badana, Iehova Dirava, ese unai vain ia hadoa lagani 29 C.E. ai, Iesu ia bapatiso neganai ena lauma helaga amo ia horoa neganai. To Iesu ese ia hahedinaraia unai vain ese ma haida danu ia laulaulaidia; ia gwau: “Lauegu rigi ibounai bema huahua idia atoa lasi be egu Tamana ese ia kokia. Mai huahua rigi ibounai be ia ese ia utua do idia goeva bona huahua momo do idia atoa totona. . . . Rigi be sibona huahua do ia atoa lasi, to bema vain auna do ia badinaia, be huahua do ia atoa. Vadaeni unai bamona bema umui badinaia lasi lau dekenai, umui emui huahua do ia atoa lasi. Vain be lau, ena rigi be umui.”

Dina 51 murinai, Pentekoste dinana ai, aposetolo bona ma haida be unai vain ena rigi ai idia lao, Iesu ese lauma helaga idia latadiai ia bubua neganai. Unai murinai ma haida be unai vain ena rigi ai idia lao​—iboudiai be 144,000. Unai vain ena badina, Iesu Keriso, bona idia danu ese Dirava ena Basileia ena huahua idia havaraia.

Iesu ese huahua havaraia dalana ia gwauraia, ia gwau: “Lau dekenai ia badinaia bona ia dekenai lau badinaia tauna be ena huahua momo ia atoa, badina be lau dekenai bema umui badinaia lasi umui be gau ta do umui karaia diba lasi.” Ma ia gwau, bema ta ese huahua ia atoa lasi, “do idia negea momokani, rigi bamona, vadaeni do ia kakoro. Rigi unai bamona be do idia haboua, lahi dekenai do idia negea daekau, do idia araia ore.” Bena ia gwauhamata henidia, ia gwau: “Bema lau do umui badinaia, bona lauegu hereva be emui lalona dekenai ia noho neganai emui ura gaudia dekenai do umui noinoi, vadaeni unai bamona do ia karaia umui dekenai.”

Unai murinai Iesu ese ia hamaorodia, ia gwau: “Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao.” Dirava ia ura unai rigi ese inai bamona huahua do idia atoa: Lalokau bona Keriso ena kara unai bamodia ma haida do idia hahedinaraia, bona ia hegeregerena, Dirava ena Basileia do idia harorolaia bona taunimanima be hahediba taudia ai do idia halaodia.

Bena Iesu ia gwau: “Egu lalokau dekenai do umui noho hanaihanai.” Edena dala amo? Ia gwau: “Bema umui ese lauegu taravatu do umui badinaia, vadaeni egu lalokau dekenai do umui noho.” Ma ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena. Lalokau namo herea momokani be inai, tau ta ena mauri do ia atoa diho, ena turana totona.”

Hora haida murinai, Iesu ese unai lalokau hereadaena do ia hahedinaraia. Iena mauri do ia henia, ena aposetolo dainai bona ia do idia abidadama henia taudia iboudiai dainai danu. Namona be iena kara tohotohoa totona unai bamona do idia lalokau heheni. Guna, Iesu ia gwau unai bamona lalokau be toa ta, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”

Bena Iesu ia gwau: “Lauegu taravatu do umui badinaia, unai dekena amo lauegu turana do umui lao. Harihari ia lao, umui be hesiai taudia do lau gwauraia lasi, badina hesiai tauna be ena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.”

Iesu ena turana korikori ai idia lao be hahenamo hereadaena, ani? To Iesu ese do ia tura henidia noho totona, namona be “huahua do idia atoa” noho. Iesu ia hamaorodia, ia gwau: “Unai amo lauegu ladana dekenai Tamana do umui noia gaudia ibounai be ia ese do ia henia umui dekenai.” Momokani, unai be Basileia ena huahua havaraia karana ena davana namo hereana, ani? Iesu ia hamaorodia lou ‘idia ta ta do idia lalokau henia,’ bena ia hamaorodia tanobada taudia ese do idia inai henidia. Edia lalona hagoadaia totona ia gwau: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni.” Bena edia badu ena badina ia gwauraia, ia gwau: “Umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.”

Ma ia gwau: “Inai kara ibounai do idia karaia umui dekenai umui be lauegu dainai, badina be lau ia siaia Diravana [Iehova] be idia diba lasi.” Iesu ena hoa karadia ese ia idia inai henia taudia idia kota henidia bamona; ia gwau: “Tau ta ese do ia karaia lasi hoa karadia be idia edia huanai lau karaia vadaeni. Inai kara bema lau karaia lasi, idia be do idia kerere lasi. To momokani inai kara idia itaia, bona idia ese lau bona egu Tamana danu dekenai idia badu henia vadaeni.” Iesu ia gwau unai amo Buka Helaga ena hereva ta ia momokani, ia gwau: “Idia ese lau dekenai idia badu henia vadaeni anina ta lasi.”

Bena Iesu ese ia gwauhamata henidia lou, heduru gauna do ia siaia idia dekenai; gauna be lauma helaga, Dirava ena gaukara siahuna unai. Ia gwau: “Ia ese lau do ia gwauraia hedinarai. Umui danu lau do umui gwauraia hedinarai.”

Edia Lalona Ma Ia Hagoadaia Lou

Iesu bona aposetolo be daiutu idia rakatania gwauraia neganai, ia gwau: “Inai hereva lau gwauraia umui dekenai, emui abidadama do umui rakatania garina.” Bena ia hamaorodia, ia gwau: “Dubu dekena amo umui do idia lulua murimuri dekenai. Oibe, nega do ia mai, umui do ia alaia mase tauna be do ia laloa ia be Dirava ena hesiai gaukara ia karaia.”

Unai hereva ese aposetolo edia lalona ia hahisia, badina be, ena be guna Iesu ese ia hamaorodia tanobada taudia ese do idia inai henidia, to ia hahedinaraia lasi do idia hamasedia. Bena ia hamaorodia, ia gwau: “Gunaguna neganai inai gaudia lau hamaoroa lasi umui dekenai, badina be unai neganai lau be umui danu ita noho.” Ia do rakatanidia lasi neganai unai ia hadibadia be namo herea, ani?

Iesu ma ia gwau: “To harihari do lau lao, lau ia siaia Diravana dekenai, to umui ta ese umui nanadaia lasi lau dekenai, umui gwau lasi, ‘Edeseni do oi lao?’ ” Unai hanuaboi ai idia ese Iesu idia nanadaia vadaeni edeseniai do ia lao, to hari iena hereva idia lalohisihisilaia dainai idia nanadailaia lou lasi. Ia gwau: “Inai hereva be lau gwauraia vadaeni umui dekenai dainai umui emui lalona be idia hisihisi momokani.” Aposetolo edia lalohisihisi ena badina be rua​—idia diba taunimanima ese do idia dagedage henidia bona do idia hamasedia, bona edia Biaguna ese ia rakatanidia gwauraia.

Unai dainai Iesu ia gwau: “Umui dekenai hanamoa totona do lau rakatania umui, badina be umui bema lau rakatania lasi, Durua Tauna be umui dekenai do ia mai lasi, to do lau lao, vadaeni ia do lau siaia umui dekenai.” Iesu be taunimanima ta neganai gabu rua dekenai nega tamona ia noho diba lasi, to do ia rakatanidia murinai, heduru gauna, lauma helaga, be guba amo do ia siaia diba ena orea taudia dekenai, herevana edeseniai idia noho tanobada dekenai.

Iesu ia gwau, lauma helaga be “kara dika bona kara maoromaoro bona kota henia be tanobada taudia dekenai do ia hedinarai henia.” Edia kara dika, Dirava ena Natuna abidadama henia lasi karana, be do ia hahedinaraia. Danu, Iesu be ena Tamana dekenai do ia daekau neganai iena kara maoromaoro do ia hedinarai goevagoeva. Bona Satana bona ena tanobada taudia dikadia ese Iesu ena lalo-maoromaoro idia hadikaia diba lasi; unai ese ia hahedinaraia tanobada ena lohia be kota dekenai ia lusi vadaeni.

Iesu ma ia gwau: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi.” Unai dainai ia gwauhamata henidia, lauma helaga be idia latanai do ia bubua diho neganai, unai hereva edia anina do ia hadibalaidia.

Aposetolo idia do lalo-parara lasi, Iesu do ia mase murinai do ia toreisi lou bena idia vairadiai do ia hedinarai lou. Unai dainai idia henanadai heheni, idia gwau: “Inai be dahaka ia ese ia hamaoroa ita dekenai, ia gwau, ‘Nega sisina lau do umui itaia lasi, ma nega sisina lau do umui itaia,’ bona, ‘Badina be egu Tamana dekenai do lau lao?’ ”

Iesu ia diba idia ura idia nanadaia, unai dainai ia gwau: “Momokani, momokani umui lau hamaoroa, umui be do umui tai mai hisihisi danu, to tanobada taudia be do idia moale. Umui be do umui lalohisihisi, to emui lalohisihisi be moale dekenai do ia lao.” Gabeai, unai dina adorahina ai Iesu idia hamasea neganai, tanobada ena tomadiho gunalaia taudia idia moale, to ena hahediba taudia idia lalohisihisi. To Iesu ia toreisi lou neganai edia lalohisihisi be moale ai ia lao! Bena Pentekoste dinanai idia moale noho, badina be unai dina ai Dirava ena lauma helaga be idia latanai ia bubua diho, ia hasiahudia iena ladana gwauraia hedinarai taudia ai idia lao totona!

Iesu ese edia lalohisihisi be ia mara hahinena ena hisihisi ida ia hahegeregerea, ia gwau: “Hahine ta be ena natuna ia vara neganai hisihisi bada ia abia, badina be ena nega ia ginidae vadaeni, to ena natuna ia abia, vadaeni iena hisihisi be ia laloa lasi . . . Umui danu, inai harihari be emui lalona idia hisihisi vadaeni, to lau be umui do lau itaia lou [do lau toreisi lou neganai], vadaeni emui lalona be idia moale, bona tau ta ese umui emui moale do ia kokia diba lasi.”

Ela bona unai negai aposetolo be Iesu ena ladanai idia noinoi lasi. To unai negai ia hamaorodia, ia gwau: “Bema gau ta do umui noinoi lauegu Tamana dekenai, ia ese do ia henia, badina lauegu ladana umui gwauraia dainai. . . . Badina be Tamana sibona ese umui ia ura henia, umui ese lau umui ura henia dainai, bona umui hamomokania vadaeni lau be Tamana dekena amo lau mai dainai. Lau be Tamana lau rakatania inai tanobada dekenai lau mai, ma tanobada do lau rakatania, Tamana dekenai do lau giroa lao.”

Unai hereva amo aposetolo edia lalona ia hagoadaia bada. Idia gwau: “Ai abia dae vadaeni oi be Dirava dekena amo oi mai.” Iesu ia gwau: “Harihari umui abidadama henia lau dekenai, a? Umui kamonai, negana do ia mai, oibe, ia ginidae vadaeni, umui ibounai do umui heau idau gabu idau gabu, lau do umui rakatania, umui ta ta ena gabu dekenai do umui lao. Vadaeni lau be sibona do lau noho.” Daba ia do rere lasi neganai unai bamona ia vara!

Iesu be ena hereva ena dokonai ia gwau: “Inai hereva lau hamaoroa vadaeni umui dekenai, egu lalona dekenai maino do umui abia totona. Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.” Ena be Satana bona iena tanobada ese Iesu ena lalo-maoromaoro idia hadikaia toho, to Iesu ese Dirava ena ura ia hagugurua, unai amo tanobada ia halusia.

Guriguri Dokona Atai Daiutuna Ai

Iesu ese ena aposetolo ia lalokau henidia bada dainai, edia lalona ia hagoadaia, iena mase do idia haheaukalaia diba totona. Unai murinai ia gaga dae, ena Tamana guba dekenai be ia noia, ia gwau: “Emu Natuna do oi hanamoa, vadaeni emu Natuna ese oi do ia hanamoa. Badina be oi ese siahu oi henia vadaeni, ia ese taunimanima ibounai do ia biagua karaia, bona oi ese ia dekenai oi henia taudia ibounai be ia ese mauri hanaihanai do ia henia idia dekenai.”

Iesu ese hereva namo hereana​—mauri hanaihanai herevana​—ia gwauraia unai! Dirava ese ‘siahu ia henia taunimanima ibounai do ia biagua’ totona dainai, ena boubou gauna amo idia iboudiai ia hamauridia diba. To, ena Tamana ese ia lalo-namo henidia taudia sibodia be “mauri hanaihanai” do ia henidia. Bena iena guriguri lalonai Iesu be ma ia gwau:

“Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.” Oibe, hahemauri do ita abia totona, namona be Dirava bona ena Natuna ita dibadia.

Unai ena anina bada be inai: Idia ruaosi do ita diba goevagoeva bona do ita hetura henidia; gau idauidau idia laloa hegeregerena ita danu do ita laloa; bona edia kara hereadaedia, taunimanima idia kara henidia karadia unai, do ita tohotohoa.

Iesu be ma ia gwau: “Lau ese tanobada dekenai oi lau hanamoa vadaeni, lau dekenai gaukara oi henia danu lau karaia haorea vadaeni.” Unai dainai ia diba gabeai danu do ia kwalimu; ia noinoi, ia gwau: “Egu Tamana e, harihari oiemu hairai dekena amo do oi hanamoa lau dekenai, tanobada do ia vara lasi neganai, oiemu vairana dekenai lau abia hairaina.” Oibe, ia noia, toreisi lou dalana amo unai hairai do ia henia lou.

Bena Iesu ese ena gaukara badana tanobada ai ia gwauraia, ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai. Idia be oiemu, oi ese oi henidia lau dekenai, idia danu oiemu hereva idia badinaia vadaeni.” Ia haroro neganai, Dirava ena ladana, Iehova, ia hatoa maoromaoro bona ma dala haida amo danu ena aposetolo ia hadibalaidia. Iehova ena kara bona ena palani ia hadibalaidia, unai amo edia diba bona edia lalokau Iehova dekenai ia habadaia.

Iesu ia diba Iehova be iena Biaguna, unai dainai mai ena manau ida ia gwau: “Lau dekenai oi henia herevadia lau henia vadaeni idia dekenai, vadaeni idia ese idia abia dae, bona idia diba momokani lau be oi dekena amo lau mai, ma idia hamomokania danu oi ese lau oi siaia.”

Unai murinai Iesu ia hahedinaraia iena orea taudia be idau bona taunimanima oredia be ma idau. Ia guriguri, ia gwau: “Tanobada taudia totona lau noinoi lasi oi dekenai. Lau dekenai oi henia taudia totona lau noinoi oi dekenai . . . Idia danu ai noho neganai, lau oi henia taudia lau naria . . . Lau naridia namonamo, idia ta ia boio lasi, dika ia davaria tauna sibona mo,” Iuda Iskariote unai. Iesu ia guriguri noho lalonai, Iuda ese ena mase dalana ia lailaia. Ena be ia diba lasi, to ia ese Buka Helaga ena hereva ia hamomokania unai.

Iesu ia guriguri noho, ia gwau: “Tanobada ese ia badu henia vadaeni idia dekenai . . . Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” Ena be Iesu ena orea taudia be Satana ese ia biagudia taudia bogaragidiai idia noho, to namona be nega ibounai edia kara dika amo idia siri.

Iesu ma ia gwau: “Hereva momokani dekenai idia do oi hahelagaia, oiemu hereva be hereva momokani.” Lauma helaga amo idia torea Heberu Revarevadia, Iesu ese ia gwauraia loulou herevadia, be “hereva momokani” ia gwauraia unai. Bona ia ese ena hahediba taudia ia hadibadia herevadia danu, gabeai lauma helaga amo Keristen Greek Revarevadia lalodiai idia torea herevadia, be “hereva momokani.” Unai hereva ese taunimanima idia hahelagadia diba, edia mauri dalana idia haidaua diba, bona inai tanobada amo idia hasiridia diba.

Bena Iesu ese “idia sibona totona [ia] noinoi lasi, to edia hereva dekena amo [ia] do idia abidadama henia taudia totona danu [ia] noinoi.” Iena hahediba taudia ai do idia lao taudia dainai ia guriguri unai, horoa taudia bona ‘orea tamona’ lalonai do ia gogodia taudia ma haida danu. Idia iboudiai dainai ia ese ena Tamana dahaka ia noilaia?

Ia gwau: “Do idia tamona, oi be lauegu lalona dekenai oi noho bona lau be oiemu lalona dekenai lau noho hegeregerena . . . Do idia tamona, ita ruaosi ita tamona hegeregerena.” Iesu bona ena Tamana be lauma anina tamona lasi, to gau iboudiai dekenai idia lalo-tamona. Iesu ese ia noia, ena orea taudia danu be unai bamona do idia lalo-tamona, bena “tanobada taudia be do idia diba, oi ese lau oi siaia vadaeni, bona oi ese idia oi ura henia, lau oi ura henia hegeregerena.”

Bena Iesu be horoa taudia dainai ena Tamana ia noia, ia gwau: “Lau ura be do lau noho gabuna dekenai be oi henia lau dekenai taudia danu do idia noho, vadaeni lau dekenai oi henia hairaina be do idia itaia, badina be tanobada do oi karaia lasi neganai oi ese lau dekenai oi lalokau henia.” Gunaguna, nega daudau herea ia do noho ela bona Adam bona Eva ese edia natudia idia havaradia neganai, Dirava ese ia sibona ia havaraia Natuna, gabeai Iesu Keriso ai ia lao tauna, ia lalokau henia.

Iesu be ena guriguri dokonai ia gwau lou: “Oiemu ladana danu lau hadibaia vadaeni idia dekenai, bona do lau hadibaia noho, vadaeni lau dekenai oi henia lalokau badana be idia edia lalona dekenai do ia noho. Bona lau danu idia edia lalona dekenai do lau noho.” Aposetolo ese Dirava ena ladana idia dibaia neganai iena lalokau danu idia dibaia. Ioane 14:1–17:26; 13:​27, 35, 36; 10:16; Luka 22:​3, 4; Esodo 24:10; 1 Hanua Pavapavadia 19:​9-13; Isaia 6:​1-5; Galatia 6:16; Salamo 35:19; 69:4; Hereva Lada-isidia 8:​22, 30.

▪ Iesu be edeseniai ia lao gwauraia, bona Toma ese unai gabu lao henia dalana ia nanadailaia neganai, Iesu ese dahaka ia hamaoroa?

▪ Filipo ese Iesu dahaka ia noilaia?

▪ Dahaka dainai Iesu ia itaia tauna ese Tamana danu ia itaia?

▪ Edena dala ai Iesu ena hahediba taudia edia kara ese iena kara do idia hanaia?

▪ Satana be mai ena siahu lasi Iesu dekenai, anina be dahaka?

▪ Edena negai Iehova ese vain ia hadoa, bona edena negai bona edena dala amo ma haida be unai vain ena rigi ai idia lao?

▪ Unai vain ena rigi iboudiai be hida?

▪ Dirava ia ura unai rigi ese dahaka huahua do idia atoa?

▪ Edena dala amo Iesu ena turana ai ita lao diba?

▪ Dahaka dainai tanobada taudia ese Iesu ena orea taudia idia inai henidia?

▪ Iesu ese dahaka ia gwauraia dainai ena aposetolo edia lalona idia hisihisi?

▪ Dahaka dainai aposetolo ese Iesu idia nanadaia lasi edeseni ia lao gwauraia?

▪ Aposetolo ese dahaka idia lalo-pararalaia lasi?

▪ Iesu ese dahaka hereva hegeregerena amo ia hahedinaraia aposetolo edia lalohisihisi be moale ai do ia lao?

▪ Iesu ia gwau nega sisina murinai aposetolo ese dahaka do idia karaia?

▪ Edena dala amo Iesu ese tanobada ia halusia?

▪ Dirava ese Iesu ‘siahu ia henia taunimanima ibounai do ia biagua’ totona, anina be dahaka?

▪ Dirava bona ena Natuna ita dibadia, anina be dahaka?

▪ Edena dala ai Iesu ese Dirava ena ladana ia gwauraia hedinarai?

▪ “Hereva momokani” be dahaka, bona ia ese Keristen taudia edena bamona ia “hahelagaia”?

▪ Dirava, iena Natuna, bona tomadiho momokani taudia iboudiai be edena dala ai idia tamona?