Karoa 103

Dubu Dekenai Ia Lou Lao

IESU bona ena hahediba taudia ese Ieriko idia rakatania murinai, hanuaboi haida Betania ai idia mahuta. Hanuaboi ihatoina murinai, Monday, Nisan 10 ai, daba ia rere neganai, Ierusalem dekenai idia lou lao. Dala ai idia raka neganai, Iesu ia hitolo. Fig auna ta mai rauna ia itaia, bena ia lao ena huahua abia totona.

Fig audia edia huahua atoa negana korikori be June, to Iesu ia laloa, ena be unai be March sibona, to ena raurau idia tubu vadaeni dainai, reana ena huahua danu ia atoa vadaeni. To ena huahua be lasi. Au ena raurau edia toana ese Iesu ia koia. Bena Iesu ese unai au ia gwau henia, ia gwau: “Oiemu huahua tau ta do ia ania lasi ela bona hanaihanai.” Gabeai Iesu ena kara ena anina ia hedinarai.

Iesu bona ena hahediba taudia idia raka lao, bena Ierusalem dekenai idia ginidae neganai, Iesu be dubu lalonai ia vareai lou, bona kara ta ia karaia, lagani toi idia lao vadaeni, lagani 30 C.E. ena Paseka negana ai ia karaia bamona. Dubu lalonai idia hoihoi taudia ia luludia lasi bona moni idia senisia taudia edia pata bona pune idia hoia taudia edia helai gaudia ia uhedia hebubu. Dubu lalonai kohu huaia taudia ia koudia danu.

Dubu lalonai moni idia senisia taudia bona animal idia hoia taudia be Iesu ese ia gwau henidia, ia gwau: “Buka Helaga lalonai ia torea vadaeni, ‘Lauegu ruma be guriguri rumana do idia gwauraia.’ To umui ese henaoa taudia edia ruma dekenai umui halaoa.” Idia be henao taudia badina be idia hoia gaudia edia davana idia habadaia kava, bona taunimanima be dala lasi ma gabu ta amo animal do idia hoidia, boubou totona. Unai dainai Iesu ia laloa edia hoihoi karadia be henaohenao karadia.

Hahelaga taudia badadia, taravatu hadibaia taudia, bona hanua ena tau badadia ese Iesu ena kara ena sivarai idia kamonai neganai, do idia hamasea dalana idia tahua. Unai amo idia hahedinaraia idia helalo-kerehai diba lasi. To Iesu hamasea dalana idia davaria lasi, badina be taunimanima iboudiai ese idia gavaia ena hereva kamonai totona.

Iuda taudia korikoridia sibodia lasi, to idau bese taudia danu, Iuda tomadiho idia badinaia taudia, be Paseka Ariana dekenai idia lao. Helene taudia haida be Filipo dekenai idia lao, idia hamaoroa idia ura Iesu do idia itaia. Filipo be Andrea dekenai ia lao, reana ia nanadaia Iesu do idia itaia be hegeregere eiava lasi. Iesu be dubu dekenai ia do noho, unuseniai Helene taudia ese idia itaia diba.

Iesu ia diba, dina haida murinai do idia hamasea, unai dainai parabole ta amo ena mase ia gwauraia, ia gwau: “Nega ia ginidae vadaeni, Taunimanima ena Natuna ese ena hairaina do ia abia. Momokani, momokani umui lau hamaoroa, bema uiti ena uhena be tano dekenai do ia moru lasi, bema ia mase lasi, ia be sibona do ia noho kava. To bema ia mase, anina momo do ia atoa.”

Uiti nadinadina tamona be anina bada lasi gauna. To bema ta ese ia hadoa, gabeai do ia “mase” bamona, bena iena amo uhe do ia tubu, bena gabeai anina momo do ia atoa. Unai hegeregerena, Iesu be taunimanima goevadaena tamona. Bema Dirava ia badinaia ela bona mase, iena kara idia tohotohoa taudia be iena amo mauri hanaihanai do idia abia diba. Unai dainai Iesu ia gwau: “Ena mauri ia ura dogoatao tauna ese mauri do ia halusia, to ena mauri inai tanobada dekenai ia laloa lasi tauna be mauri do ia abia ia lao bona hanaihanai.”

Iesu be sibona mo ia laloa lasi; ia gwau: “Tau ta bema ia ura lauegu hesiai gaukara do ia karaia, ia ese lauegu murina dekenai do ia raka. Vadaeni do lau noho gabuna dekenai egu hesiai tauna danu do ia noho. Bema tau ta ese lauegu hesiai gaukara do ia karaia, egu Tamana ese do ia hanamoa.” Iesu murinai idia raka bona idia hesiai henia taudia ese unai davana namona do idia abia​—Keriso ida Basileia lalonai do idia noho hebou!

Iesu ese do ia ania hisihisina bona ena mase dikana ia laloa dainai, ia gwau: “Harihari lauegu kudouna ia hisihisi. Dahaka do lau gwauraia?” Unai dika amo ia roho mauri toho lasi. Ia gwau: “Lasi, badina be hari inai nega totona lau mai ginidae vadaeni.” Iesu ese Dirava ena palani ibounai ia abia dae, bona ena lalona ia hegeregere sibona do ia henia boubou gauna bamona. Mataio 21:​12, 13, 18, 19; Mareko 11:​12-18; Luka 19:​45-48; Ioane 12:​20-27.

▪ Ena be unai be fig auna ena huahua atoa negana lasi, to dahaka dainai Iesu ia laloa ena huahua do ia davaria?

▪ Dahaka dainai Iesu ese dubu lalonai idia hoihoi taudia ia gwauraidia “henaoa taudia”?

▪ Edena dala ai Iesu be uiti nadinadina ta, ia mase gauna ta, bamona?

▪ Iesu ese do ia ania hisihisina bona ena mase edena bamona ia laloa?