Karoa 69

Edia Tamana be Daika?

ARIA negana lalonai, Iesu be Iuda tomadiho gunalaia taudia ida idia herevahereva neganai, ia gwau: “Lau diba umui be Aberahamo ena besena, to umui ura be lau umui alaia, badina lauegu hereva be umui abia dae lasi. Lauegu Tamana ese lau dekenai ia hedinaraia gaudia lau herevalaia, to umui be emui tamana ese umui ia hamaoroa gaudia umui karaia.”

Ena be Iesu ese edia tamana ena ladana ia gwauraia lasi, to ia hahedinaraia goevagoeva edia tamana be idau bona iena tamana be ma idau. Iuda tomadiho gunalaia taudia idia diba lasi Iesu ese daika ia herevalaia, unai dainai idia gwau: “Aiemai tamana be Aberahamo.” Idia laloa edia abidadama be Abraham, Dirava ena turana, ena abidadama bamona.

To, idia hoa Iesu be inai hereva ia hamaorodia neganai; ia gwau: “Bema umui be Aberahamo ena natuna, umui ese Aberahamo ena kara do umui karaia.” Momokani, natu korikori ese ena tamana ia tohotohoa. Iesu ma ia gwau: “Lau be Dirava dekena amo lau kamonai herevana sibona lau gwauraia umui dekenai. To hari umui ura lau do umui alaia mase. Aberahamo be unai bamona ia karaia lasi.” Ma ia gwau lou: “Emui tamana ena kara umui karaia.”

Idia do diba lasi Iesu ese daika ia herevalaia. Idia gwau idia be Abraham ena natuna korikoridia; idia gwau: “Ai be ariara natuna lasi.” Idia laloa idia be tomadiho momokani taudia, Abraham bamona, unai dainai idia gwau: “Aiemai tamana be tamona, Dirava unai.”

To momokani, Dirava be edia Tamana korikorina, a? Iesu ia gwau: “Bema Dirava be umui emui Tamana, be lau do umui lalokau henia, badina be Dirava dekena amo lau mai, bona hari lau noho inai. Lau be sibona lau mai lasi, ia ese lau ia siaia. Edena bamona lauegu hereva anina umui diba lasi?”

Guna Iesu ia hadibadia, idia dadaraia dainai dahaka do idia davaria diba. Hari ia samanidia, ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.” Iesu ia gwau Satana be ala-ala tauna, ma ia gwau: “Ia be koikoi tauna, bona ia be koikoi ibounai edia tamana.” Hereva dokonai Iesu ia gwau: “Dirava ena natuna tauna ese Dirava ena hereva ia kamonai. Umui be umui kamonai lasi, badina umui be Dirava ena natudia lasi.”

Iesu ena hereva aukadia dainai Iuda taudia idia badu, unai dainai idia gwau: “Aiemai hereva be ia maoro lasi, a, ai gwau oi be Samaria tauna bona lauma dika oiemu lalona dekenai ia noho?” Iuda taudia ese Samaria taudia idia badu henidia dainai, ta idia gwauraia “Samaria tauna” neganai, unai hereva amo idia hadikaia.

Ia idia gwauraia Samaria tauna neganai Iesu be ia laloa lasi; ia gwau: “Lauma dika be egu lalonai ia noho lasi. Lau be egu Tamana lau matauraia, to umui ese lau umui matauraia lasi.” Bena ia gwauhamata, ia gwau: “Lauegu hereva do ia badinaia tauna be do ia mase diba lasi, ela bona hanaihanai.” Anina be, mase hanaihanai, eiava “mase iharuana,” ia amo do idia toreisi lou diba lasi gauna, do idia davaria lasi.

Vadaeni, Iuda taudia idia laloa Iesu ena hereva ena anina be unai bamona tauna do ia mase lasi, unai dainai idia gwau: “Hari ai diba momokani vadaeni lauma dika ese oiemu lalona dekenai ia noho. Aberahamo ia mase vadaeni, peroveta taudia danu idia mase vadaeni, to oi be oi gwau, ‘Lauegu hereva do ia badinaia tauna be do ia mase diba lasi ela bona hanaihanai.’ Iseda tamana Aberahamo be oi hanaia, a? Ia be ia mase vadaeni, peroveta taudia danu idia mase vadaeni. Oi be daika?”

Iena hereva amo Iesu ese unai taudia ia hadibadia ia be Mesia, Dirava ese ia gwauhamatalaia tauna. Ia haere henidia neganai, ia gwau: “Lau sibona bema lau hekokoroku, be do lau hekokoroku kava, to egu Tamana ese ladana bada ia henia lau dekenai, vadaeni umui gwau ia be umui emui Dirava. Umui be umui diba lasi ia, to lau be lau diba. Bema lau gwau lau diba lasi ia, do lau koikoi, umui hegeregerena.”

Bena Iesu ese Abraham ia gwauraia lou, ia gwau: “Emui tamana Aberahamo be ia ura dikadika lauegu nega ia itaia, vadaeni ia itaia, mai moale danu.” Oibe, Abraham be mai ena abidadama ida Mesia ena mai ia naria. Iuda taudia ese Iesu ena hereva idia abia dae lasi; idia gwau: “Oiemu lagani be 50 do ia abia lasi, oi be Aberahamo oi itaia, a?”

Iesu ia haere henidia, ia gwau: “Momokani, momokani umui lau hamaoroa. Aberahamo do ia vara lasi, lau be lau noho.” Iesu ese tanobada dekenai ia do mai lasi negana, guba dekenai ia noho negana, ia herevalaia unai.

Iuda taudia be Iesu ena hereva idia badulaia dikadika dainai, nadi idia abia isi, idia hodoa gwauraia. To Iesu be ia komu, bena dubu amo ia raka lasi. Ioane 8:​37-59; Apokalupo 3:14; 21:8.

▪ Iesu be edena bamona ia hahedinaraia iena tamana be idau bona ena inai taudia edia tamana be idau?

▪ Iuda taudia ese Iesu idia gwauraia Samaria tauna, anina be dahaka?

▪ Iesu ena hereva, “Lauegu hereva do ia badinaia tauna be do ia mase diba lasi ela bona hanaihanai,” ena anina be dahaka?