Karoa 34

Ena Aposetolo Ia Abidia Hidi

LAGANI ta mai kahana ia lao vadaeni, Ioane Bapatiso ese Iesu be Dirava ena Mamoe Natuna ia gwauraia bona Iesu ese ena haroro gaukarana ia hamatamaia. Unai neganai, Andrea, Simona Petro, Ioane, bona reana Iakobo (Ioane ena kakana), bona Filipo bona Natanael (iena ladana ta be Batolomeo) be Iesu ena hahediba taudia ginigunadia ai idia lao. Gabeai taunimanima momo be idia ida Keriso murinai idia raka.

Vadaeni, nega ia ginidae, Iesu ia hegaegae ena aposetolo do ia abidia hidi. Ia do idia bamoa hanaihanai bona ia ese do ia hadibadia namonamo. Ororo dekenai ia daekau guna, hanuaboi ibounai ia guriguri, reana ia ese Dirava ia noia do ia ha-aonegaia bona do ia hanamoa. Daba ia rere neganai, ena hahediba taudia ia boiridia bona aposetolo 12 ia abidia hidi. To unai murinai Iesu ese ia hadibadia noho dainai, hahediba taudia ia gwauraidia noho.

Ia abidia hidi taudia 6 be ena hahediba taudia ginigunadia, edia ladadia be paragraf ginigunana dekenai ai toredia. Ia abidia hidi taudia oredia 6 be inai: Mataio (Iesu ese ena takisi opesi amo ia boiria tauna), Iuda (iena ladana ma ta be Tadeo), Iuda Iskariote, Simona Kana tauna, Toma, bona Iakobo Alfeo. Hari Iakobo ena ladana idia hatoa Iakobo Maragina, badina be aposetolo ma ta ena ladana be Iakobo.

Hari tatau 12 be nega daudau Iesu idia bamoa vadaeni, bona idia ia diba namonamo. Iakobo bona iena tadina Ioane bona reana Iakobo Alfeo danu be Iesu ena varavara.

Iesu ese ena aposetolo edia ladadia ia laloatao be auka lasi, to oi ese oi laloatao a? Inai dala amo oi laloatao diba: Rua edia ladana be Simona, rua edia ladana be Iakobo, bona rua edia ladana be Iuda, bona Simona be mai ena tadina Andrea bona Iakobo be mai ena tadina Ioane. Oredia 4 be inai: takisi gogoa tauna (Mataio), gabeai ia daradara tauna (Toma), Iesu ese au ta henuna amo ia boiria tauna (Natanael), bona iena turana Filipo.

Aposetolo 11 be Galilea taudia, Iesu ena gabu unai. Natanael ena hanua be Kana. Filipo, Petro, bona Andrea edia hanua be Betesaida. To gabeai Petro bona Andrea idia lao Kaperanaum, Mataio ena hanua unai. Iakobo bona Ioane be haoda taudia, bona reana idia be Kaperanaum dekenai idia noho. Iuda Iskariote, gabeai Iesu ia hadikaia tauna, ia sibona be Iudea tauna. Mareko 3:​13-19; Luka 6:​12-16.

▪ Edena aposetolo be Iesu ena varavara reana?

▪ Daika daika be Iesu ena aposetolo, bona edena bamona edia ladadia oi laloatao diba?

▪ Aposetolo be edena gabu idauidau amo idia mai?