Karoa 46

Ena Dabua Ia Daua Toho

KAPERANAUM taudia be sivarai idia kamonai, Iesu ese Hanua Gwauta amo ia lou mai, unai dainai hutuma bada be kone ai idia hebou idia abia dae lou totona. Iesu ese lai gubana ia koua bona mai lauma dikadia taudia ruaosi ia hamauridia sivaraidia idia kamonai vadaeni reana. Vanagi amo ia diho neganai, hutuma ia dekenai idia hebou, ena hereva idia naria.

Idia ta be Iairo, dubu biaguna ta. Iesu ena aena badinai ia goru diho, ia noia loulou, ia gwau: “Egu natuna kekeni maragina be kahirakahira ia mase, lau noinoi, mani oi mai, oiemu imana oi atoa ia latanai, oi hamauria.” Ena natuna be tamona mo, ena lagani be 12 sibona, unai dainai ia lalokau henia bada.

Iairo ena ura hegeregerena, Iesu be ena ruma dekenai ia raka lao. Ia raka neganai hutuma ese idia bamoa. Idia moale bada, badina idia laloa Iesu ese hoa karana ma ta do ia karaia. To hutuma bogaragidiai hahine ta be sibona ena lalo-hekwarahi gauna ia laloa.

Ia be mai ena rara moru gorerena, lagani 12 lalodiai ia hadikaia. Doketa momo edia heduru ia tahua, bona unai dekenai ena moni ibounai ia haorea, to ia namo lou lasi; ena gorere ia bada ia lao.

Unai gorere ese ena tauanina ia hamanokaia bada, bona unai gorere dainai ia hemarai. Unai bamona gorere idia davaria hahinedia ese idia herevalaia lasi taunimanima vairadiai. Danu, Mose ena Taravatu hegeregerena, hahine ena rara ia moru neganai ia miro, bona ia eiava ena dabua mai raradia ia daua toho tauna ia miro. Ena dabua do ia huridia bona do ia digu, bona do ia goeva lasi ela bona dina ia diho.

Hari hahine ese Iesu ena hoa karadia edia sivarai ia kamonai, unai dainai ia tahua. Ia miro dainai, hehuni dalana ai hutuma bogaragidiai Iesu ia tahua. Sibona ena lalona dekenai ia gwau: “Bema iena dabua mo lau dogoatao, mauri lau davaria.” Vadaeni, ia dogoatao neganai ena rara moru ia doko!

Iesu ia gwau: “Daika ese ia dogoatao lau?” Hahine ese ena hereva ia kamonai neganai ia hoa! Edena bamona ia diba ia dogoatao? Petro ia gwau: ‘Aiemai biaguna e, taunimanima momo herea oi danu idia raka hebou, oi dekenai danu idia kamokau. Badina be dahaka oi gwau, “Daika ia dogoatao lau?” ’

Iesu ia giroa, hahine ia tahua, ia gwau: “Ta ese ia dogoatao lau dekenai, badina be lau diba siahu lau dekena amo ia lao vadaeni murimuri dekenai.” Momokani, hahine ese Iesu ia daua toho neganai Iesu ena mamina be idau, badina siahu be iena amo ia lasi ia hamauria totona.

Hahine ese ena kara ia hunia diba lasi dainai, mai gari bona mai heudeheude ida Iesu vairanai ia goru diho. Taunimanima iboudiai vairadiai, ena gorere bona ia namo lou dalana ia gwauraia hedinarai.

Iesu ese ena hereva ia kamonai neganai, ena lalona ia hagoadaia, ia hamaoroa, ia gwau: “Lauegu natuna, oiemu abidadama dainai mauri oi davaria vadaeni, oi lao mai maino danu, bona oiemu gorere do oi davaria lou lasi.” Ita moale, badina be Dirava ese ia abia hidi tanobada do ia lohiaia totona Tauna be mai ena hebogahisi bada, bona taunimanima edia namo ia tahua, bona ia be mai ena siahu durudia totona! Mataio 9⁠:​18-22; Mareko 5⁠:​21-34; Luka 8⁠:​40-48; Levitiko 15⁠:​25-27.

▪ Iairo be daika, bona dahaka dainai Iesu dekenai ia lao?

▪ Hahine ta ena lalo-hekwarahi ta be dahaka, bona dahaka dainai Iesu dekenai ia lao be auka?

▪ Edena bamona hahine ia namo lou, bona edena bamona Iesu ese ena lalona ia hagoadaia?