Karoa 71

Farisea Idia Ura Lasi Kamonai

ENA matana Iesu ese ia kehoa tauna ena tamana sinana idia gari, Farisea taudia ese idia boiridia neganai. Idia diba, bema ta ia gwau Iesu ia abidadama henia, dubu amo do idia lulua. Idia luludia taudia idia hekwarahi, bona bema idia be ogogami taudia idia hekwarahi bada. Unai dainai ena tamana sinana idia naria namonamo.

Farisea taudia ese idia nanadaidia, idia gwau: “Inai be umui emui natuna, a? Ena matana ruaosi mai kepulu danu ia vara umui gwau, a? To harihari ena matana be edena bamona idia kehoa?”

Idia haere, idia gwau: “Ai diba inai be aiemai natuna, mai matapelulu danu ia vara, to harihari ena matana edena bamona idia kehoa be ai diba lasi, ena matana idia kehoa tauna danu ai diba lasi.” Edia natuna ia hadibadia vadaeni dahaka ia vara, to idia naria namonamo dainai, idia gwau: “Ia do umui nanadaia, ia be tau badana vadaeni, ia sibona do ia hereva.”

Unai dainai Farisea taudia ese unai tau idia boiria lou. Idia hagaria toho, idia gwau: “Dirava do oi hanamoa, badina ai be ai diba vadaeni unai tau be kara dika tauna.”

Edia hereva ia gorea lasi, to ia gwau: “Ia be kara dika tauna o lasi lau diba lasi, gau tamona sibona lau diba, guna egu matana ruaosi idia kepulu, to harihari be lau itaia noho.”

Farisea taudia ese ena hereva ena kerere ta idia tahua, unai dainai idia nanadaia lou, idia gwau: “Ia ese oi dekenai be dahaka ia karaia? Oiemu matana be edena bamona ia kehoa?”

Ia haere, ia gwau: “Be! Umui lau hamaoroa momokani vadaeni, to umui be kamonai lasi lau dekenai. Dahaka dainai umui ura be do umui kamonai lou? Umui danu iena diba tahua taudia do umui lao gwauraia?”

Ena hereva ese Farisea taudia ia habadudia. Idia gwau dika henia, idia gwau: “Oi be iena diba tahua tauna, ai be Mose ena diba tahua taudia. Ai be ai diba Dirava ese Mose ia hereva henia, to unai tau be edeseni amo ia mai ai be ai diba lasi.”

Hari noinoi tauna ia gwau: “Ia! Lau be lau hoa, badina be umui diba lasi ia be edeseni amo ia mai, to ia ese lauegu matana ia kehoa.” Bena, idia hakoikoia diba lasi herevana ta ia gwauraia, ia gwau: “Ita diba Dirava ese kara dika taudia edia hereva ia kamonai henia lasi, to ia dekenai ia matauraia bona ena ura ia karaia tauna ena hereva be ia kamonai henia. Tanobada ia hamatamaia dekena amo tau ta ese mai matakepulu danu ia vara tauna ta ena matana ia kehoa ena sivarai ta ita do kamonaia lasi. Inai tau be Dirava dekena amo bema ia mai lasi, be ia ese gau ta do ia karaia diba lasi.”

Farisea taudia ese ena hereva idia hakoikoia diba lasi. To hereva momokani idia abia dae diba lasi dainai, idia gwau henia, idia gwau: “Oi be kara dika lalonai oi vara, to edena bamona ai dekenai oi hadibaia, a?” Bena dubu amo idia doria murimuriai.

Iesu be unai ia kamonai neganai, ena matana ia kehoa tauna ia davaria, ia nanadaia, ia gwau: “Taunimanima ena Natuna dekenai oi abidadama henia, a?”

Ia haere, ia gwau: “Lohiabada e, ia be daika? Mani oi hamaoroa lau dekenai, vadaeni ia dekenai do lau abidadama henia.”

Iesu ia gwau: “Ia be inai harihari ia hereva henia oi dekenai.”

Kara haraga, Iesu ia igo diho henia, ia gwau: “Lohiabada e, lau abidadama inai.”

Bena Iesu ia gwau: “Kota henia totona inai tanobada dekenai lau mai vadaeni, unai dainai matakepulu taudia be edia matana do idia kehoa, bona matana idia kehoa taudia be edia matana do idia kepulu.”

Ia dekenai idia noho Farisea taudia idia henanadai, idia gwau: “Ai danu aiemai matana idia kepulu, a?” Bema idia gwau edia lalodia idia kepulu, Iesu idia dadaraia neganai idia kerere lasi. Iesu ia hamaorodia, ia gwau: “Emui matana bema idia kepulu, umui be kerere lasi danu do umui noho.” To edia lalona idia auka bona idia gwau idia matakepulu lasi bona lauma gaudia idia diba vadaeni. Iesu ia gwau: “Umui gwau, ‘Ai itaia diba,’ unai dainai umui emui kerere be ia noho.” Ioane 9:​19-41.

▪ Dahaka dainai noinoi tauna ena tamana sinana idia gari Farisea taudia ese idia boiridia neganai, bona edena bamona idia haere henidia?

▪ Farisea taudia ese noinoi tauna edena bamona idia hagaria toho?

▪ Hari tau be dahaka ia gwau dainai Farisea taudia idia badu?

▪ Dahaka dainai Farisea taudia be ekskius lasi, Iesu idia dadaraia neganai?