Karoa 83

Farisea Tauna ena Ruma Ai

IESU be Farisea edia biaguna ena ruma ai ia do noho. Rara gorere ese ia abia tauna ta ia hamauria vadaeni. Vadivadi taudia ia itadia, helai gabudia namo hereadia idia abidia hidi, unai dainai manau karana ia hadibadia.

Iesu ia gwau: “Bema tau ta do ia boiboi umui dekenai, headava aria totona do umui lao, gabu namo herea momokani do umui helai diho lasi, aria ena biaguna ese oi ia hereaia tauna ta dekenai do ia boiboi garina. Vadaeni do ia mai oi dekenai do ia hamaoroa, do ia gwau, ‘Oi siri, unai helai gabu be inai tau ena.’ Unai neganai oi be mai hemarai danu henunai gabu dekenai do oi helai diho.”

Iesu ena sisiba be inai: “Oi dekenai bema ia boiboi neganai be henunai gabu dekenai do oi helai diho, vadaeni oi dekenai ia boiboi tauna do ia mai hamaoroa oi dekenai, do ia gwau, ‘Egu turana e, oi be ataiai do oi daekau, vadaeni idia helai diho taudia ibounai ese oi do idia hanamoa.’ ” Bena dokonai ia gwau: “Badina be sibona ia habadaia tauna be Dirava ese do ia hamaragia, to sibona ia hamaragia tauna be Dirava ese do ia habadaia.”

Unai murinai, Iesu ese unai Farisea tauna ia hamaoroa, Dirava ena ura be inai: “Dina tubua aniani o adorahi aniani do oi karaia neganai, emu turana o emu varavarana o kohu momo herea taudia oiemu badibadinai idia noho taudia dekenai do oi boiboi lasi, kerukeru vanegai ena davana do idia karaia totona, oi dekenai do ma idia boiboi garina. To aniani do oi karaia neganai, ogogami taudia bona edia tauanina kahana idia dika taudia bona aena dika taudia bona matakepulu taudia dekenai do oi boiboi. Unai dekena amo do oi namo, badina idia be kohu lasi.”

Ogogami taudia bona gorere taudia aniani ia henidia tauna do ia moale, badina be Iesu ia hereva hegeregerena, “Kara maoromaoro taudia edia toreisi neganai oiemu davana do oi abia.” Ia ida idia aniani hebou taudia ta ese Iesu ena hereva ia kamonai bena aniani idauna ta ia herevalaia, ia gwau: “Dirava ena Basileia aria dekenai do ia helai diho tauna be do ia moale.” To, idia haida ese unai helaro namona idia laloa bada lasi dainai, Iesu ese parabole ta amo edia kerere ia gwauraia hedinarai.

Ia gwau: “Tau ta ese aria badana ta ia karaia, bona taunimanima momo herea dekenai ia boiboi. . . . ia ese ena hesiai tauna ta ia siaia, iena boiboi totona do idia mai taudia dekenai do ia hamaoroa, do ia gwau, ‘Vadaeni umui mai, gau ibounai ia atoa hegaegae vadaeni.’ To idia ibounai idia ura lasi dekenai idia koia gwauraia. Ta ia gwau, ‘Lau be tano ta lau hoia vadaeni, vadaeni itaia totona lau lao, mani emu biaguna do oi hamaoroa.’ Ma ta ia gwau, ‘Lau be boromakau 10 lau hoia vadaeni, vadaeni idia do lau itaia namonamo totona do lau lao, mani emu biaguna do oi hamaoroa.’ Ma ta ia gwau, ‘Lau be inai harihari lau headava, unai dainai do lau mai lasi.’ ”

Edia ekskius herevadia be anina lasi! Ta ese tano o boromakau ia hoidia gwauraia neganai, ia itadia namonamo guna, unai dainai gabeai ia itadia lou haraga be gau badana lasi. Unai hegeregerena, ta ia headava matamata neganai unai ese do ia koua lasi ta ena boiboi do ia abia dae. Biaguna ese unai ekskius herevadia ia kamonai neganai ia badu; ena hesiai tauna ia hamaoroa, ia gwau:

“ ‘Oi lao haraga, hanua edia huana dekenai bona dala dekenai, ogogami taudia bona edia tauanina idia dika taudia bona matakepulu taudia bona edia aena idia dika taudia do oi hakaua mai.’ Hesiai tauna ma ia mai, ia gwau, ‘Lohia tauna e, oi hereva hegeregerena lau karaia vadaeni, to ruma be do ia honu lasi.’ Vadaeni ena biaguna ese hesiai tauna dekenai ma ia hereva henia goada, ia gwau, ‘Do oi lao, uma dala dekenai bona ara ibounai dekenai noho taunimanima haida ma do oi haboua, mai hereva goada, egu ruma do idia hahonua. . . . lauegu boiboi dekenai do idia mai tauna ta egu aria sisina do [ia] ania diba lasi.’ ”

Unai parabole ena anina be dahaka? “Biaguna,” aria karaia tauna unai, anina be Iehova Dirava; “hesiai tauna,” taunimanima ia boiridia tauna, anina be Iesu Keriso; bona “aria badana” anina be, dala ia kehoa guba ena Basileia do idia abia totona.

Basileia do idia abia totona idia boiridia guna taudia, be Iuda ena tomadiho gunalaia taudia bona ma haida danu Iesu ena negai. To, unai tomadiho gunalaia taudia idia ura lasi. Unai dainai, Pentekoste 33 C.E. ai, ogogami Iuda taudia, unai gunalaia taudia ese idia dadaraidia taudia, idia boiridia matamaia. To idia amo kamonai taudia edia momo be hegeregere lasi Dirava ena Basileia guba dekenai ena gabu 144,000 do idia hahonudia. Unai dainai, lagani 36 C.E. ai, idau bese taudia idia boiridia matamaia, bena unai taudia idia gogodia noho ema bona iseda nega. Luka 14:​1-24.

▪ Iesu ese manau karana edena bamona ia hadibaia?

▪ Aria ia karaia tauna ese edena taudia ia boiridia be namo, Dirava ese do ia lalo-namo henia totona, bona dahaka dainai unai kara amo moale do ia davaria?

▪ Dahaka dainai idia boiridia taudia edia ekskius herevadia be anina lasi?

▪ Iesu be ena parabole lalonai ia gwauraia “aria badana” ese dahaka ia laulaulaia?