Karoa 76

Farisea Tauna ida Ia Aniani

IESU ese ena hanamoa siahuna idia gwauraia dika taudia unai bamona ia haere henidia murinai, Farisea tauna ta ese ia boiria ia ida do idia aniani hebou. Farisea taudia edia kara be, idia aniani gwauraia neganai edia imadia idia huridia ela bona edia diudia, bena aniani murinai unai bamona idia karaia lou. Ena be unai kara amo Dirava ena taravatu idia hadikaia lasi, to ia latanai ma taravatu ta idia atoa kau.

Iesu ese unai kara ia badinaia lasi neganai, Farisea tauna ia hoa. Ena be hereva ta ia gwauraia lasi, to Iesu ese mamina ia abia unai tau ia hoa, unai dainai ia gwau: “Umui Farisea taudia be kapusi bona disi edia murina kahana sibona umui huria namonamo, to emui lalona dekenai be dadia kara bona kerere havaraia kara ia honu momokani. Kavakava taudia e, Dirava ese murina kahana ia karaia be ia ese lalona kahana ia karaia lasi, a?”

Unai dala amo Iesu ese Farisea taudia edia koikoi ia hahedinaraia​—edia imadia idia huridia, to kara dika be edia kudoudia amo idia huria oho lasi. Bena ia sisiba henidia, ia gwau: “Emui kapusi bona mereki lalonai gaudia be ogogami taudia dekenai do umui harihari henia, vadaeni gau ibounai umui dekenai do idia goeva.” Namona be edia kudoudia dekenai idia ura momokani do idia harihari henia; taunimanima ese do idia hanamodia totona idia karaia koikoi be dika.

Iesu ma ia gwau: “To Farisea taudia e, madi umui be dika. Badina be aniani ava maragimaragi ibounai dekena amo karoa be 10 umui karaia, karoa ta be harihari gauna dekenai umui halaoa, to kara namo bona Dirava dekenai ura henia be umui badinaia lasi. Inai kara umui badinaia be namo, to namo lasi maoro karadia bona lalokau karadia umui rakatania.” Ena be Dirava ena Taravatu Israel taudia dekenai hegeregerena unai ava maragimaragi edia karoa ta idia henia, to Iesu ese ia gwauraidia dika, badina mai anina bada karadia​—lalokau, hebogahisi bona manau​—idia badinaia lasi.

Iesu ma ia gwau henidia, ia gwau: “Farisea taudia e, madi umui be dika. Badina be umui ura dubu dekenai helai gaudia namo herea dekenai umui helai, umui ura danu taunimanima haboua gabudia dekenai taunimanima ese do idia hanamoa umui. Madi umui be dika. Umui be mase guria gabu gunadia, hunia gaudia bamona, taunimanima ese edia latanai idia raka, idia diba lasi inai be guria gabudia dainai.” Edia miro ia hedinarai lasi. Farisea taudia edia tomadiho be koukouna sibona, anina be lasi! Idia karaia mai edia koikoi ida.

Iesu ena hereva ia kamonai tauna ta, loea tauna, Dirava ena Taravatu diba momo tauna unai, ia maumau, ia gwau: “Hadibaia tauna e, oi unai bamona oi hereva be ai dekenai danu oi hadikaia inai.”

Iesu ese unai Taravatu diba momo taudia danu ia gwau henidia, ia gwau: “Umui danu, taravatu taudia, madi umui be dika. Badina umui ese gau metauna taunimanima latanai umui atoa, to emui imana kwakikwakina ta amo unai gau metauna dekenai durua umui henia lasi. Madi umui be dika. Badina be emui sene taudia ese peroveta taudia idia alaia mase, to umui ese edia guria gabuna umui haginia.”

Iesu ese ia gwauraia gau metauna be sibodia edia taravatu idauidau. Loea taudia ese unai taravatu maragina ta idia kokia lasi taunimanima durudia totona. Iesu ia hahedinaraia peroveta taudia aladia mase karana idia abia dae, ma ia hamaorodia, ia gwau: “Peroveta taudia ibounai edia rarana idia habubua vadaeni, tanobada hamatamaia dekena amo, unai baduna be inai hari nega taudia edia latanai. Oibe, lau hamaoroa umui dekenai, Abela ena rarana ia bubua ia mai bona Sekaria ena rarana idia bubua, ia be pata helagana bona ruma helagana edia huanai idia alaia mase, inai ibounai baduna be inai nega taudia edia latanai.”

Abel, Dirava ese ia hoia lou diba taudia ginigunadia ta, be “tanobada hamatamaia” negana dekenai ia noho. Sekaria idia alaia mase murinai, Suria tuari oreana ese Iuda ia hadikaia. To Iesu ia gwau, iena uru taudia edia kara dika be bada herea dainai, dika bada herea do idia davaria, Iuda taudia gunadia idia davaria gauna do ia hanaia. Lagani 38 murinai, lagani 70 C.E. lalonai, unai dika ia vara.

Iesu be ma ia gwauraidia dika, ia gwau: “Taravatu hadibaia taudia, madi umui be dika. Badina be aonega ena ki umui abia siri vadaeni. Umui be umui raka vareai lasi, bona raka vareai ura taudia edia dala umui koua.” Taravatu hadibaia taudia edia maduna be, Dirava ena Hereva ena anina be taunimanima dekenai idia gwauraia hedinarai. To unai bamona idia karaia lasi, bona diba do idia abia dalana be idia koua.

Farisea taudia bona Taravatu diba momo taudia idia badu, badina Iesu ese edia kerere ia gwauraia hedinarai dainai. Ruma ia rakatania neganai, idia gwau dika henia bona henanadai momo idia henia. Unai amo idia dibagania toho, do ia hereva kerere bena do idia samania diba. Luka 11:​37-54; Deuteronomi 14:22; Mika 6:8; 2 Sisiga 24:​20-25.

▪ Dahaka dainai Iesu ese Farisea taudia bona Taravatu diba momo taudia ia gwauraidia dika?

▪ Loea taudia ese edena maduna metaudia be taunimanima dekenai idia atodia?

▪ “Tanobada hamatamaia” negana be edena negai?