Karoa 130

Galilea Gohuna Ai

APOSETOLO idia lou lao Galilea dekenai, Iesu ese ia hamaorodia vadaeni hegeregerena. To idia diba lasi unuseniai dahaka do idia karaia be namo. Nega sisina murinai, Petro ese Toma, Natanael, Iakobo bona ena tadina Ioane, bona aposetolo ma rua danu ia hamaorodia, ia gwau: “Lau be do lau haoda.”

Idia 6 idia gwau: “Ai be oi danu ita lao.”

Unai hanuaboi ibounai lalonai gwarume ta idia davaria lasi. Daba ia rere neganai, Iesu be kone dekenai ia gini, to aposetolo idia diba lasi unai be Iesu. Ia boiboi henidia, ia gwau: “Lauegu natuna e, umui emui aniani ia noho, a?”

Idia boiboi, idia gwau: “Lasi.”

Bena Iesu ese ia hamaorodia, ia gwau: “Reke be vanagi ena idiba kahana dekenai umui negea diho, gwarume do umui abia.” Idia negea diho bena idia veria dae gwauraia neganai, edia goada ia hegeregere lasi gwarume momo dainai.

Ioane ia boiboi, ia gwau: “Lohiabada unai.”

Petro ese unai hereva ia kamonai neganai, ia kokia vadaeni dabuana ma ia karaia lou bena davara ai ia pau dobi, ia nahu lao kone dekenai; kone ena daudau be mita 90 bamona. Aposetolo oredia be vanagi maragina ai idia lao kone, gwarume ai ia honu rekena idia veria danu.

Kone dekenai idia kamokau neganai, lahi mai gidana unuseniai idia itaia, ia latanai gwarume haida idia noho, bona paraoa haida danu. Iesu ese ia hamaorodia, ia gwau: “Harihari umui abia gwarume haida umui mailaia.” Petro be vanagi ai ia gui kau, bena reke kone ai ia veria daekau. Reke lalonai be gwarume badadia 153!

Iesu ese ia boiridia, ia gwau: “Umui mai, umui aniani.”

Edia lalona idia hegeregere lasi do idia nanadaia, do idia gwau, “Oi be daika?” badina idia diba unai be Iesu. Ia toreisi lou murinai, unai be nega namba 7 ia hedinarai, bona nega ihatoina aposetolo haida dekediai, idia noho hebou negadiai. Vadaeni, paraoa bona gwarume ia henidia.

Idia aniani ore, bena reana unai gwarume momo ia itadia neganai, Iesu ese Petro ia nanadaia, ia gwau: “Simona, Iona ena natuna e, lau oi ura henia bada, to inai oi ura henia maragi, a?” (NW) Reana ena henanadai ena anina be inai: Oi ese haoda gaukarana oi ura henia bada, to oi lau henia gwauraia gaukarana oi ura henia maragi, a?

Petro ia haere, ia gwau: “Lohiabada e, oi diba lau ura henia oi dekenai.”

Iesu ia gwau: “Lauegu mamoe do oi ubua.”

Ma ia nanadaia lou, ia gwau: “Simona Iona e, lau oi lalokau henia, a?”

Petro ia haere, ia gwau: “Oibe, Lohiabada e, oi diba lau ura henia oi dekenai.”

Iesu ese ia hagania lou, ia gwau: “Lauegu mamoe do oi naria.”

Bena nega ihatoina ma ia nanadaia, ia gwau: “Simona Iona e, oi ura henia lau dekenai, a?”

Petro ena lalona ia hisihisi. Reana ia laloa Iesu ia laloa do ia badinaia lasi, badina be, vanegai, Iesu idia kota henia neganai, nega toi Petro ia gwau ia diba lasi ia. Vadaeni Petro ia gwau: “Lohiabada e, oi be gau ibounai oi diba, oi diba vadaeni lau ura henia oi dekenai.”

Bena nega ihatoina Iesu ese ma ia hagania, ia gwau: “Egu mamoe do oi ubua.”

Unai dala amo Iesu ese Petro bona ena aposetolo oredia ia hadibadia goevagoeva, ia ura dahaka gaukara do idia karaia. Nega sisina murinai tanobada do ia rakatania, bona ia ura idia ese Dirava ena mamoe edia magu lalonai do idia vareai taudia durudia gaukarana do idia gunalaia.

Bena Iesu ese Petro ia hamaoroa, Dirava ese ia henia gaukarana ia karaia dainai ia idia guia bena idia hamasea hegeregerena, Petro danu be unai bamona do idia kara henia. Ia gwau: “Oi be tau matamata neganai oi sibona oiemu dabua oi kwatua bona oiemu ura gabuna dekenai oi lao loaloa, to do oi buruka neganai oiemu imana do oi abia isi, vadaeni tau ta ese oiemu dabua do ia kwatua oi dekenai, vadaeni do oi ura henia lasi gabuna dekenai oi do idia abia lao.” Ena be Iesu ia diba Petro do idia hamasea iena abidadama dainai, to ia hamaoroa, ia gwau: “Egu murina dekenai oi raka mai.”

Petro ese ena vairana ia giroa, Ioane ia itaia, bena ia gwau: “Lohiabada e, unai tau be edena bamona do ia karaia?”

Iesu ese ia haere henia, ia gwau: “Bema lau ura ia be do ia noho ela bona do lau giroa mai, unai be edena bamona oi dekenai? To oi be lauegu murina dekenai oi raka mai.” Iesu ena hahediba taudia momo idia laloa unai hereva ena anina be aposetolo Ioane be do ia mase lasi. To unai murinai aposetolo Ioane ia gwau, Iesu ia gwau lasi do ia mase lasi, to Iesu ia gwau: “Bema lau ura ia be do ia noho ela bona do lau giroa mai, unai be edena bamona oi dekenai?”

Gabeai Ioane ia gwau: “Kara momo herea danu Iesu ese ma ia karaia. Ibounai bema idia torea, lau laloa tanobada ibounai be do ia hegeregere lasi unai buka ibounai haboua totona.” Ioane 21:​1-25; Mataio 26:32; 28:​7, 10.

▪ Dahaka ese ia hahedinaraia aposetolo idia diba namonamo lasi Galilea ai dahaka do idia karaia be namo?

▪ Galilea Gohuna dekenai aposetolo ese Iesu edena bamona idia diba?

▪ Ia toreisi lou murinai ela bona unai negai, Iesu be nega hida ia hedinarai?

▪ Edena bamona Iesu ese ia hahedinaraia goevagoeva ia ura aposetolo ese ena mamoe do idia naridia?

▪ Petro do ia mase dalana be Iesu ese edena bamona ia gwauraia?

▪ Iesu ese Ioane edena bamona ia herevalaia, bena hahediba taudia momo ese unai hereva dainai lalohadai kererena idia abia?