Karoa 57

Gorere Taudia Ia Bogadia Hisi

IESU ese Farisea taudia ia gwau dika henidia, sibodia edia taravatu idia badinaia dainai, bena ia mai ena hahediba taudia ida idia raka oho. Guna idia ura lao gabu ta dekenai laga-ani totona, to hutuma ese idia davaridia. Unai dainai, Farisea taudia ia rakatanidia murinai, ia mai ena hahediba taudia ida idia lao Turo bona Sidono edia tano dekenai, mirigini kahanai. Unai nega tamona sibona Iesu be idia ida Israel tanona ena hetoa idia hanaia.

Mahuta rumana idia davaria murinai, Iesu ese hahediba taudia ia hamaorodia ia ura ta ia diba lasi idia be unuseniai idia noho. To, ena be unai be idau bese taudia edia gabu, to taunimanima ese Iesu idia itaia neganai idia diba ia be daika. Greek hahinena ta, Foenikia Suria ai ia vara hahinena, ese Iesu ia davaria neganai, ia noia, ia gwau: “Lohiabada e, Davida ena Natuna e, oi bogahisihisi lau dekenai, egu natuna kekeni be lauma dikana ese ia abia momokani.” To Iesu ese ia haere henia lasi.

Ena hahediba taudia ese Iesu idia hamaoroa, idia gwau: “Mani oi lulua, badina be iseda murina dekenai ia boiboi noho.” Iesu ese ia dadaraia ena badina ia gwauraia, ia gwau: “Dirava ese lau ia siaia, Israela besena ena mamoe idia boio sibona dekenai.”

To, unai hahine ese ia rakatanidia lasi. Iesu dekenai ia mai, ia vairanai ia goru diho, ia noinoi, ia gwau: “Lohiabada e, oi durua lau.”

Ena noinoi ese Iesu ena kudouna ia hamarerea! To, iena gaukara badana, Dirava ena taunimanima Israel lalonai durudia gaukarana, ia gwauraia lou. Danu, hahine ena abidadama tohoa totona, Iuda taudia edia lalohadai idau bese taudia dekenai ia gwauraia, ia gwau: “Ia namo lasi memero edia aniani do idia abia, sisia dekenai do idia negea lao.”

Iesu ia hereva henia mai ena hebogahisi ida, unai amo ia hahedinaraia Iuda lasi taudia ia bogadia hisi. Iuda taudia edia lalohadai ia gwauraia neganai hahine ia badu lasi, to unai hereva hegeregerena ia gwau: “Lohiabada e, momokani, to sisia be biaguna ena pata dekena amo idia moru momorudia be idia ania diba.”

Bena Iesu ese ia haere henia, ia gwau: “Hahine e, oiemu abidadama be ia bada herea, oiemu ura gauna do oi abia.” Bena ia abia! Ruma dekenai ia giroa lao neganai, ena natuna kekenina ia namo vadaeni.

Iesu bona ena hahediba taudia be Sidono ena kone kahana idia rakatania, idia raka lao, Ioridane Sinavaina idia hanaia Galilea Gohuna ataiai, bena Hanua Gwauta tanona ai idia vareai, gohu ena mairiveina kahanai. Ororo ta dekenai idia daekau, idia helai diho, to hutuma ese idia davaridia bena aena dika taudia, matakepulu taudia, mu taudia, bona gorere idauidau taudia idia mailaidia Iesu dekenai. Iesu ena aena badinai idia atodia, bena ia hamauridia. Unai dainai, hutuma idia hoa, badina be idia itaia, mu taudia idia hereva, aena dika taudia idia raka, bona matakepulu taudia idia itaia diba. Bena Israel ena Dirava idia hanamoa.

Iesu ese taia kudima bona hereva diba lasi tauna ta dala idauna amo ia durua. Reana badina be Iesu ia itaia unai tau be hutuma bogaragidiai ia hemarai. Unai dainai ia hakaua siri mai ena hebogahisi ida. Idia ruaosi sibodia idia noho, bena Iesu ese ena ima kwakikwakidia tau ena taiana lalonai ia atodia, bena ia kanudi murinai, tau ena malana ia daua toho. Bena Iesu guba dekenai ena matana ia negea, ia ganagana, bena ia gwau: “Oi kehoa.” Vadaeni, unai tau ia kamonai diba bona ia hereva namonamo diba.

Iesu ese gorere taudia ia hamauridia neganai, hutuma idia moale bada. Idia gwau: “Gau ibounai ia karaia namo herea, taia kudima tauna ena taiana ia kehoa, hereva diba lasi tauna ena malana ia hanamoa.” Mataio 15:​21-31; Mareko 7:​24-37.

▪ Dahaka dainai Iesu ese Greek hahinena ena natuna ia hanamoa haraga lasi?

▪ Unai murinai, Iesu bona ena hahediba taudia idia lao edeseni?

▪ Iesu ena hebogahisi karana taia kudima bona hereva diba lasi taudia dekenai be dahaka?