Karoa 47

Guna Idia Tai Gabeai Idia Moale Bada

IAIRO ese Iesu ia itaia, rara gorere hahinena ia hamauria. Unai neganai, ena abidadama Iesu ena siahu dekenai ia bada ia lao. Daba kahanai, Iairo ese Iesu ia noia ena ruma ai do ia lao, ena natuna lalokauna, laganina 12 kekenina, hamauria totona, badina ia mase gwauraia. To Iesu be gorere hahinena ia do hereva henia noho neganai, Iairo ena ruma amo haida idia mai, idia hamaoroa, idia gwau: “Oiemu natuna ia mase vadaeni. Badina dahaka hadibaia tauna dekenai oi noinoi noho? ”

Lalohisihisi sivaraina unai! Hari tau mai ladana bada be unai hereva ia kamonai neganai ia dara doko momokani. To Iesu ese ia kamonai neganai, Iairo ena lalona ia hagoadaia, ia gwau: “Oi gari lasi, oi abidadama henia mo.”

Iesu be hari dara doko tauna ida idia lao ena ruma dekenai. Idia ginidae neganai, idia itaia taunimanima momo idia hebou vadaeni, idia taitai bona edia kemedia idia botaia idia lalohisihisi dainai. Iesu be ruma lalonai ia vareai neganai, ia gwau: “Badina dahaka umui boiboi bona tai momo? Kekeni ia mase lasi, ia mahuta.”

Unai hereva dainai taunimanima ese Iesu idia kirikirilaia, badina idia diba kekeni ia mase momokani. To Iesu ia gwau, kekeni ia mahuta sibona. Iesu ia ura Dirava ese ia henia siahuna do ia gaukaralaia, unai amo do ia hahedinaraia mase taudia ia hamauridia lou diba, mahuta mase taudia idia hanogadia diba hegeregerena.

Iesu ese iboudiai ruma murimurinai ia doridia lasi. Iena bamodia, Petro, Iakobo, bona Ioane, bona kekeni ena sinana bona ena tamana sibodia idia noho. Hari taunimanima 5 ia hakaudia lao kekeni ia hekure gabuna dekenai. Kekeni ena imana ia abia, bena ia gwau: “Talita kumi,” anina be “Kekeni e, oi toreisi.” Bena kekeni be maoromaoro ia toreisi, ia raka! Ena tamana sinana ese unai idia itaia neganai idia moale dikadika.

Iesu ese Iairo bona ena adavana ia hamaorodia aniani do idia henia edia natuna dekenai, bena ia haganidia ta do idia hamaorolaia lasi. To unai sivarai be unai tano ibounai dekenai ia lao. Iesu ese ia hatorea isi lou tauna iharuana be unai kekeni. Mataio 9⁠:​18-26; Mareko 5⁠:​35-43; Luka 8⁠:​41-56.

▪ Iairo be edena sivarai ia kamonai, bona Iesu ese ena lalona edena bamona ia hagoadaia?

▪ Iairo ena ruma dekenai idia ginidae neganai, dahaka idia itaia?

▪ Dahaka dainai Iesu ia gwau, ia mase kekenina be ia mahuta sibona?

▪ Iesu ese kekeni ia hatorea isi lou neganai, edena taunimanima 5 ese unai idia itaia?