Karoa 94

Guriguri bona Lalo-Manau edia Namo

GUNA, Iesu be Iudea dekenai ia noho neganai, parabole ta amo guriguri loulou karana ena namo ia gwauraia. Ierusalem ia lao henia noho negana ginigabena ai, unai kara ena namo ia gwauraia lou. Reana Samaria dekenai o Galilea dekenai, inai parabole ena hahediba taudia ia hamaorodia, ia gwau:

“Hanua ta dekenai kota naria tauna ta ia noho. Ia be Dirava dekenai ia gari lasi, bona taunimanima danu ia matauraia lasi. Unai hanua ena vabu ta inai kota naria tauna dekenai ia lao, ia gwau, ‘Lau dekenai ia badu henia tauna ena davana do oi henia.’ Dina haida inai kota naria tauna be ia kamonai lasi, to gabeai sibona ia laloa, ia gwau, ‘Lau be Dirava dekenai lau gari lasi bona taunimanima dekenai lau matauraia lasi. To inai vabu ese ia hereva momo dainai ena kota do lau karaia, do ia giroa mai, lau dekenai hekwarahi do ia henia garina.’ ”

Bena Iesu ese ena parabole ena anina ia gwauraia, ia gwau: “Unai kota naria tauna dikana ena hereva do umui laloa. Unai dainai, Dirava ese ia abia hidi taudia, hanuaboi bona dinai ia dekenai idia taitai taudia, idia dekenai idia badu taudia edia davana do ia henia lasi, a? Do ia durudia haraga lasi, a?”

Iesu ia gwau lasi Iehova Dirava be unai kota naria tauna dikana bamona. Ena hereva ena anina be inai: Bema kota naria tauna dikana ese ia noia loulou tauna ena hereva ia kamonai, ita diba momokani, kara maoromaoro Diravana ena taunimanima ese idia noia loulou neganai, edia hereva do ia kamonai. Unai dainai Iesu ia gwau: “Lau hamaoroa umui dekenai, [Dirava ese] edia davana do ia henia haraga idia dekenai.”

Nega momo kota naria taudia ese ogogami taudia idia durudia lasi, to siahu taudia bona taga taudia idia durudia. To, Dirava ese kara dika taudia edia davana do ia henidia, bona danu, iena hesiai taudia edia davana, mauri hanaihanai, do ia henidia. To taunimanima hida idia laloa Dirava ese edia davana do ia henidia haraga?

Iesu ese taunimanima edia abidadama guriguri ena siahu dekenai ia henanadailaia, ia gwau: “Taunimanima ena Natuna do ia mai neganai tanobada dekenai abidadama do ia davaria o?” Reana unai henanadai ena anina be, Keriso be mai Basileia siahuna ida do ia ginidae neganai, taunimanima momo be mai edia abidadama unai bamona lasi.

Iesu ena hereva idia kamonai taudia haida ese sibodia edia kara maoromaoro idia abidadama henia bona idia laloa idau taudia idia hereadia. Reana Iesu ena hahediba taudia haida danu be unai bamona idia laloa. Unai dainai Iesu ese inai parabole ia henidia:

“Tatau rua Dubu Helaga dekenai idia raka vareai, idia guriguri totona. Ta be Farisea tauna, ta be takisi gogoa tauna. Farisea tauna ia gini siri, sibona dekenai ia guriguri, ia gwau, ‘Dirava e, tanikiu, lau be haida bamona lasi, henaoa taudia, kara gagevagageva taudia, heudahanai taudia. Oibe, lau be inai takisi gogoa tauna bamona lasi. Lau be pura ta lalonai nega rua aniani ania lasi ena taravatu lau badinaia, kohu lau davaria, ibounai karoa be 10 lau karaia, karoa ta be harihari gauna dekenai lau halaoa.’ ”

Farisea taudia be taunimanima vairadiai edia kara maoromaoro idia hahedinaraia, sibodia edia ladana abia isi totona. Sibodia edia taravatu hegeregerena, Monday bona Thursday iboudiai idia anivaga, bona idia davaria kohudia iboudiai, aniani avadia maragimaragidia danu, karoa 10 idia karaia, karoa ta be harihari gauna ai idia halaoa. Hua haida idia ore vadaeni, Kalaga Ariana neganai, idia hahedinaraia hanua taudia idia matauraidia lasi, idia gwau: “Inai taunimanima be Mose ena taravatu [Farisea taudia edia lalohadai unai taravatu dekenai] idia diba lasi. Idia be Dirava dekena amo dika davana do idia davaria.”

Iesu ese unai bamona idia gwauraia tauna ta ia herevalaia, ia gwau: “To takisi gogoa tauna be idau gabu dekenai ia gini, ena kwarana ia atoa diho, ena kemena ia botaia, ia gwau, ‘Dirava e, lau be dika tauna, oi bogahisihisi lau dekenai.’ ” Takisi gogoa tauna be mai ena lalo-manau ida ena kerere ia gwauraia dainai, Iesu ia gwau: “Lau hamaoroa umui dekenai, unai tau be ena ruma dekenai ia giroa lou mai ena lalona maoro danu, to inai Farisea tauna be lasi. Badina be sibona ia hekokoroku tauna be henunai do ia noho, to sibona ia manau tauna be do idia hanamoa.”

Unai hereva amo Iesu ia hahedinaraia lou, namona be taunimanima idia lalo-manau. Unai negai, Farisea taudia be mai edia siahu bada bona nega ibounai taunimanima ese dagi idia laloa bada, unai dainai edia lalohadai ese iena hahediba taudia idia hakereredia. To unai parabole amo Iesu ese lalo-manau karana ia hadibadia namonamo! Luka 18:​1-14; Ioane 7:49.

▪ Dahaka dainai kota naria tauna dikana ese vabu ena noinoi ia kamonai, bona unai parabole amo Iesu ese dahaka ia hadibaia?

▪ Iesu ia ginidae neganai, dahaka abidadama ia tahua?

▪ Iesu ese Farisea tauna bona takisi gogoa tauna ena parabole be daidia totona ia gwauraia?

▪ Dahaka lalohadai, Farisea taudia edia, ita dadaraia be namo?