Karoa 22

Hahediba Taudia Hani Ia Boiridia

NASARET dekenai Iesu idia hamasea toho negana murinai, Kaperanaum hanuana dekenai ia lao, Galilea Gohuna kahirakahira dekenai. Unai ese Isaia ena peroveta herevana ma ta ia hamomokania. Ia gwau unai gabu idia noholaia taudia ese diari bada do idia itaia.

Unuseniai, Iesu ese diari halasia gaukarana, Basileia harorolaia gaukarana unai, ia karaia neganai, ena hahediba taudia hani ia davaridia. Guna idia bamoa loaloa, to Iudea amo idia giroa mai neganai edia haoda gaukarana idia karaia lou. Reana Iesu ese ia tahudia, badina be nega ia ginidae vadaeni, ma haida ese do idia durua bona haroro gaukarana do ia hadibalaidia, bena do ia mase murinai do idia karaia noho diba.

Iesu be kone dekenai ia raka lao neganai, Simona Petro mai ena bamona danu ia itadia, edia reke idia huridia. Idia dekenai ia lao, Petro ena vanagi ai ia gui bona ia hamaoroa vanagi be sisina do ia doria lao kone dekena amo. Vanagi ai ia helai diho, bena kone dekenai idia noho taudia hutuma ia hadibadia matamaia.

Gabeai, Iesu ese Petro ia hamaoroa, ia gwau: “Dobu kahana dekenai ita lao, emui reke do umui atoa diho, gwarume do umui abia totona.”

Petro ia haere, ia gwau: “Egu biaguna e, ai be ai hekwarahi mase ia mai daba ia rere, gwarume ta ai abia lasi, to oiemu hereva dainai reke be do ai atoa diho.”

Reke idia atoa diho neganai, gwarume momo herea idia abia. Edia reke be kahirakahira idia darea. Edia turadia vanagi ta dekenai idia boiridia do idia mai durudia totona. Idia mai bena gwarume momo herea amo vanagi idia hahonudia, ruaosi be kahirakahira idia mutu. Simona Petro ese unai kara ia itaia, bena Iesu ena aena badinai ia tui diho, ia gwau: “Lohiabada e, lau dekena amo do oi raka siri, badina lau be dika tauna.”

Iesu ese ia hamaoroa ia gwau: “Oi gari lasi, inai murinai be do oi haoda, taunimanima do oi abia.”

Bena Iesu ese Petro ena tadina Andrea ia boiria danu, bena ruaosi ia hamaorodia, ia gwau: “Lauegu murinai umui raka, lau be taunimanima haoda henia totona do lau halaoa umui.” Idia ida idia haoda hebou taudia rua, Iakobo bona Ioane, ia boiridia danu. Bena maoromaoro hari tatau haniosi ese edia haoda gaukarana idia rakatania, Iesu murinai idia raka. Idia be Iesu idia gavaia taudia ginigunadia. Luka 5:​1-11; Mataio 4:​13-22; Mareko 1:​16-20; Isaia 9:​1, 2.

▪ Dahaka dainai Iesu ese ena hahediba taudia ia boiridia ia murinai idia raka totona, bona idia be daika daika?

▪ Edena hoa karana ese Petro ia hagaria?

▪ Iesu ese ena hahediba taudia ia boiridia, dahaka idia haoda henidia totona?