Karoa 98

Hahediba Taudia Idia Heai Iesu ena Mase Ia Kahirakahira Neganai

LAGANI 33 C.E. ai, Paseka Ariana be pura tamona bamona murinai do idia karaia dainai, Iesu bona ena hahediba taudia ese Perea tanona amo Ioridane Sinavaina idia hanaia bona Iudea tanona ai idia vareai. Taunimanima momo ese idia bamodia.

Iesu be hahediba taudia vairadiai ia raka lao, bona ena lalo-goada idia hoalaia. Inai mani oi laloa: Pura haida idia ore vadaeni, Lasaro ia mase neganai, Iudea dekenai do ia lao totona Iesu ese Perea ia rakatania gwauraia neganai, Toma ese hahediba taudia ia hamaorodia, ia gwau: “Ita danu ita lao, ia danu do ita mase hebou.” Danu, Iesu ese Lasaro ia hatorea isi lou murinai, Sanhedrin taudia ese palani idia karaia Iesu do idia hamasea totona. Unai dainai Iudea tanona dekenai idia lou lao neganai idia gari.

Aposetolo 12 hahegaegaedia totona, Iesu ese ia boiridia siri, ia hamaorodia, ia gwau: “Ita lao Ierusalema, unuseni tau ta ese Taunimanima ena Natuna do ia henia dubu biagudia bona taravatu hadibaia taudia dekenai. Do idia gwau ia be do ia mase, bona do idia henia idau bese taudia dekenai, alaia gwauraia. Do idia hevaseha ia dekenai, do idia dadabaia, do idia kanudi henia, bona do idia alaia mase. Dina toi murinai do ia toreisi lou.”

Hua haida idia ore vadaeni Iesu ese nega rua ena hahediba taudia ia hamaorodia, do ia mase bena do ia toreisi lou, bona inai negai danu ia hamaorodia lou. Ena be ena hereva idia kamonai, to idia lalo-pararalaia lasi, reana badina be idia laloa Israel basileiana be tanobada ai do ia haginia lou, bona edia helaro be tanobada basileiana lalonai Keriso ida hairai bona hemataurai do idia abia.

Paseka Ariana dekenai idia raka lao hahinedia ta be Salome, aposetolo taudia Iakobo bona Ioane edia sinana. Iesu ese ladana matamatana, “Guba regena natudia,” be ruaosi ia henidia, badina idia be badu haraga taudia. Nega taina daudau lalonai idia ruaosi idia ura dagi badadia do idia abia Keriso ena Basileia lalonai, bona unai ura be edia sinana idia hamaoroa. Unai dainai edia sinana be idia dainai Iesu dekenai ia lao, ia vairanai ia tui diho, bona ia noinoi henia.

Iesu ese ia nanadaia, ia gwau: “Dahaka oi ura?”

Ia gwau: “Mani oi hereva, lauegu natuna ruaosi inai, ta oiemu idiba kahanai, ta oiemu lauri kahanai do idia helai oiemu Basileia lalonai.”

Iesu ia diba unai be Iakobo bona Ioane edia noinoi, unai dainai ia hamaorodia, ia gwau: “Umui noinoi gauna be umui diba lasi. Do lau inua kapusi be do umui inua diba, a?”

Idia ruaosi idia gwau: “Do ai inua diba.” Ena be Iesu ese ia hamaorodia vadaeni haida ese do idia dagedage henia bona do idia hamasea, to idia lalo-parara lasi ia gwauraia ‘kapusina’ ena anina be unai.

Iesu ese ma ia hamaorodia, ia gwau: “Lauegu kapusi be do umui inua. To lauegu idiba kahanai bona lauegu lauri kahanai do idia helai taudia be lau ese do lau abia hidi lasi. Egu Tamana ese ia diba taudia dekenai do ia henidia.”

Gabeai, aposetolo oredia ese Iakobo bona Ioane edia noinoi idia diba neganai, idia badu. Guna, aposetolo be daika ia bada idia heailaia neganai, Iakobo bona Ioane be mai edia hereva momo reana. Unai neganai Iesu ese aposetolo ia sisiba henidia, to Iakobo bona Ioane ese dagi badadia idia noia lou neganai, idia hahedinaraia unai sisiba idia badinaia lasi.

Unai heai koua totona, Iesu ese aposetolo 12 ia boiridia, bena mai ena lalokau ida ia sisiba henidia, ia gwau: “Umui diba lohia taudia be mai siahu danu edia taunimanima idia biagua karaia, bona gunalaia taudia be do idia lohia edia taunimanima dekenai. To umui be unai bamona umui laloa lasi. Bema ta ia ura be do ia lohia gwauraia, ia be umui emui hesiai gaukara do ia karaia.”

Namona be Iesu ena kara idia tohotohoa. Iesu ia hamaorodia, ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia henia, taunimanima ibounai hamauria totona.” Iesu ese taunimanima ia hesiai henidia sibona lasi, to idia dainai ena mauri ia henia danu! Namona be Keriso hegeregerena, hahediba taudia ese taunimanima idia hesiai henidia mai edia ura ida bona dagi badadia idia tahudia lasi. Mataio 20:​17-28; Mareko 3:17; 9:​33-37; 10:​32-45; Luka 18:​31-34; Ioane 11:16.

▪ Dahaka dainai hahediba taudia idia gari?

▪ Edena dala amo Iesu ese ena hahediba taudia ia hahegaegaedia do ia vara gauna totona?

▪ Ta ese Iesu dahaka ia noia, bona unai noinoi dainai aposetolo oredia edia lalona ena mamina be edena bamona?

▪ Edena bamona Iesu ese ena aposetolo edia hekwakwanai ia hamaoromaoroa?