Karoa 55

Hahediba Taudia Momo ese Iesu Idia Rakatania

IESU be Kaperanaum ena dubu lalonai ia hadibadia, ia gwau ia be aniani momokani guba amo. Guna unai ia herevalaia matamaia, hoa dalana amo ia ubudia taudia ese idia davaria lou neganai.

Iesu ese unai ia herevalaia noho, bena ia gwau: “Lau ese do lau henia aniani be lauegu tauanina, inai dekena amo tanobada ese mauri do ia abia.” Lagani rua idia lao vadaeni, lagani 30 C.E. lalonai, Iesu ese Nikodemo ia hamaoroa, Dirava ese tanobada ia lalokau henia bada dainai, iena Natuna ia henia taunimanima hamauridia totona. Unai hegeregerena, Iesu ia gwau, iena tauanina ia ania tauna, anina be, do ia henia boubou gauna ia abidadama henia tauna, ese mauri hanaihanai do ia abia.

To, Iesu ena hereva dainai idia hekwakwanai. Idia gwau: “Inai tau ese ena tauanina be edena bamona do ia henia ita dekenai, vadaeni do ita ania?” Iesu ia ura idia diba, ena tauanina ania karana korikorina ia herevalaia lasi. Unai ia hadibaia totona, kara ma ta ia gwauraia; unai kara bema taunimanima idia laloa ia be kara korikorina, do idia ura henia lasi.

Iesu ia gwau: “Taunimanima ena Natuna iena tauanina bema umui ania lasi bona ena rarana danu bema umui inua lasi, mauri be umui emui lalona dekenai do ia noho lasi. To lauegu tauanina do ia ania, bona lauegu rarana do ia inua tauna ese mauri hanaihanai do ia abia, bona dokona dina dekenai lau ese do lau hatorea isi. Badina be lauegu tauanina be aniani momokani, bona lauegu rarana be inuinu gauna momokani. Egu tauanina do ia ania, bona egu rarana do ia inua tauna be lauegu lalona dekenai do ia noho, lau danu iena lalona dekenai do lau noho.”

Momokani, bema Iesu ena hahediba herevana amo taunimanima ania karana ia gwauraia, unai be dika momokani. To, tauanina ania bona rara inua karadia korikoridia ia herevalaidia lasi. Iena hereva amo ia hahedinaraia, taunimanima ese mauri hanaihanai abia totona, gau badana be do ia henia boubou gauna do idia abidadama henia. Sibona ena tauanina goevadaena do ia henia bona ena rara do ia bubua, boubou gauna bamona. To, iena hahediba taudia momo danu ese ena hereva idia lalo-pararalaia toho lasi; idia gwau: “Unai hereva be ia metau, daika ese do ia abia dae diba?”

Iesu ia diba ena hahediba taudia momo idia maumau, unai dainai ia gwau: “Inai hereva dekenai umui emui lalona ia metau a? To Taunimanima ena Natuna bema umui itaia, ia daekau, guna ia noho gabuna dekenai bema ia giroa lou, be edena bamona? . . . Lau ese umui lau hamaoroa herevadia be lauma bona mauri. To umui haida be umui abidadama henia lasi.”

Iesu ma ia gwau: “Unai dainai umui lau hamaoroa vadaeni, egu Tamana ese bema ia durua lasi tauna be lau dekenai do ia mai diba lasi.” Unai neganai ena hahediba taudia hutuma ese idia rakatania, bona ia ida idia raka hebou lou lasi. Unai dainai ena aposetolo 12 ia nanadaidia, ia gwau: “Umui danu do umui raka siri a?”

Petro ese ia haere henia, ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho. Ai be ai abidadama henia bona ai diba vadaeni, oi be Dirava ena Helaga Tauna.” Ena be Petro bona aposetolo oredia ese Iesu ena hahediba herevana ena anina idia lalo-pararalaia momokani lasi reana, to Iesu idia badinaia!

Ena be Iesu ese Petro ena hereva ia moalelaia, to ia gwau: “Lau be umui 12 lau abia hidi, ani? Gau tamona, umui ta be ia Satani vadaeni.” Iuda Iskariota ia herevalaia unai. Reana unai neganai Iesu ia itaia Iuda be dala kererena ai ia raka “hamatamaia.”

Taunimanima ese Iesu king ai idia halaoa gwauraia neganai ia ura lasi, unai dainai idia lalohisihisi, bona reana edia lalona dekenai idia gwau, ‘Bema ia be Mesia ena dagi ia abia dae lasi, reana ia be Mesia lasi.’ Vanegai sibona unai ia vara dainai, reana taunimanima ese unai danu idia laloa noho. Ioane 6⁠:​51-71; 3⁠:16.

▪ Iesu ese ena tauanina ia henia daidia totona, bona ‘ena tauanina idia ania’ ena anina be dahaka?

▪ Iesu be ma dahaka ia gwau dainai taunimanima idia hoa, to ena hereva ena anina be dahaka?

▪ Momo ese Iesu idia rakatania neganai, Petro be edena bamona ia hereva?