Karoa 45

Hahediba Tauna Idauna Ta

IESU be vanagi amo ia diho neganai, gari gauna ta ia itaia! Dagedage taudia rua be gara gabuna amo idia heau mai Iesu hedavari henia totona. Idia be mai lauma dikadia. Idia ta ia dagedage bada, badina nega sisina daudau ia be mai lauma dikadia.

Nega daudau kopina kavakava ia loaloa bona gara gabuna ai sibona ia noho. Dina ai, hanuaboi ai, ia boiboi loulou bona nadi amo sibona ia ivaia. Ia dagedage bada dainai, taunimanima be unai dala amo idia raka hanai diba lasi. Haida be auri bona seini amo idia kwatua toho, to ia hamakohidia. Ta ia goada lasi do ia hamanadaia.

Unai tau ese Iesu ia heau henia bena ia vairanai ia goru diho. Demoni ese idia hasiahua dainai ia boiboi badabada, ia gwau: “Dahaka oi ura karaia lau dekenai, Iesu, Dirava ataiai momokani ena Natuna? Dirava ena ladana dainai lau noinoi, lau oi hahisia lasi.”

Unai bamona ia hereva, badina be Iesu ese ia hereva henia vadaeni, ia gwau: “Lauma dikana e, inai tau oi rakatania, oi lao.” To unai murinai Iesu ma ia gwau: “Oiemu ladana be daika?”

Ia haere, ia gwau: “Lauegu ladana be Hutuma, badina ai be momo herea.” Demoni idia moale, idia bolodia taudia ese hisihisi idia ania neganai. Mai edia moale ida idia gaukara hebou, idia hahisidia totona. To Iesu idia itaia neganai, idia noia, guri dobu masemasena dekenai do ia siaidia lasi. Unai neganai danu Iesu ese ena siahu bada ia hahedinaraia. Unai demoni mai edia dagedage ia hadareredia diba. Unai ese ia hahedinaraia danu, demoni be Dirava ena hahemaoro herevana idia dekenai idia diba; idia mai edia biaguna Satana Diabolo ida be guri dobu masemasena lalonai do ia koudia.

Ororo kahanai boroma 2,000 bamona idia aniani noho. Unai dainai demoni idia gwau: “Oi siaia ai boroma dekenai, bona boroma lalonai ai vareai.” Demoni be taunimanima bona animal lalodiai idia vareai neganai, unai kara kererena ena mamina idia moalelaia. Iesu ese ia koudia lasi dainai, demoni be unai boroma 2,000 lalodiai idia vareai bena iboudiai idia heau, hagahaga amo idia roho diho gohu lalonai, idia maloa mase.

Boroma naria taudia ese unai idia itaia neganai, idia heau lao, hanua lalonai bona uma gabudia ai unai sivarai gwauraia totona. Bena taunimanima idia lao, ia vara gauna itaia totona. Idia ginidae neganai, lauma dikadia idia rakatania tauna idia itaia, Iesu ena aena badinai ia helai mai ena dabua, bona ena lalona ia namo lou!

Iesu ese kava tauna ia hanamoa lou karana bona boroma edia mase dalana idia itaia vadaeni taudia ese unai sivarai idia hamaorolaidia. Idia kamonai neganai idia gari dikadika, bona Iesu idia noia goadagoada edia gabu do ia rakatania. Unai dainai edia ura hegeregerena vanagi ai ia gui. Hari lauma dikadia idia rakatania tauna ese Iesu ia noia, do ia bamoa. To Iesu ia gwau: “Emu ruma dekenai oi giroa lou, Dirava ese oi dekenai ia karaia karadia ibounai do oi harorolaia.”

Iesu ese taunimanima ia hamauridia negadiai, idia momo ia hamaorodia unai do idia gwauraia hedinarai lasi, badina ia ura lasi taunimanima be unai sivarai dainai ia do idia lalohadailaia. To mai lauma dikadia tauna ia hamauria neganai, unai ia hamaoroa lasi, badina ia diba reana ia be dala lasi unai gabu taudia do ia haroro henidia, to unai tau do ia haroro henidia diba. Danu, bema boroma idia mase dainai haida ese Iesu idia gwauraia dika, unai tau ia namo lou dainai, ia hamomokania diba Iesu be mai ena siahu kara namo karaia totona.

Iesu ese ia hamaoroa bamona, unai lauma dikadia idia rakatania tauna be ena ruma ia lou henia. Hanua Gwauta tanona ai, Iesu ena kara ia dekenai ia harorolaia neganai, taunimanima idia hoa maragi lasi. Mataio 8:​28-34; Mareko 5:​1-20; Luka 8:​26-39; Apokalupo 20:​1-3.

▪ Ena be mai lauma dikadia taudia rua idia noho, to dahaka dainai Baibel ese tamona mo ia sivarailaia momo?

▪ Dahaka ese ia hahedinaraia, demoni idia diba Dirava ese guri dobu masemasena ai do ia koudia?

▪ Dahaka dainai demoni idia ura taunimanima bona animal lalodiai idia vareai?

▪ Dahaka dainai Iesu ese lauma dikadia idia rakatania tauna ia hamaoroa Ia durua karana be ma haida do ia hamaorolaidia, to guna ia hamauridia taudia be unai bamona ia hamaorodia lasi?