Karoa 84

Hahediba Tauna ena Maduna

IESU ese Farisea edia biaguna ena ruma ia rakatania murinai, Ierusalem ena dala dekenai ia raka lao. Hutuma be ia murinai idia raka lao. To dahaka dainai? Ta be Iesu murinai ia raka momokani ena anina be dahaka?

Edia laolao ai, Iesu ese ia hereva henidia, ia gwau: “Bema ta lau dekenai do ia mai, to ena tamana, ena sinana, ena adavana, ena natuna, ena tadikakana, bona ena mauri danu, bema ia laloaboio lasi, ia be hegeregere lasi lauegu diba tahua tauna ia lao.” Reana unai hereva dainai idia hoa.

Iesu ena hereva ena anina be dahaka? Iesu ia ura lasi ia murinai idia raka taudia ese edia varavara idia laloaboio vaitani, to ia ura idia ese ia idia ura henia bada, edia varavara idia ura henia maragi. Baibel ia gwau Iakobo ese Lea ia “ura henia lasi,” to ena hereva ena anina be, ia ura henia maragi, ena tadina Rahela ia ura henia bada.

Danu, Iesu ia gwau namona be hahediba tauna ese ia sibona “ena mauri danu” ia laloaboio. Unai hereva ena anina be, hahediba tauna ese Iesu ia ura henia bada, sibona ia ura henia maragi. Unai amo Iesu ia hahedinaraia, ta be iena hahediba tauna ai ia lao be gau maragina lasi, unai dainai namona be ena maduna ia laloa namonamo.

Iesu ena hahediba tauna ai ia lao tauna ese hekwarahi bona dagedage do ia davaria. Iesu ia gwau: “Ena satauro bema ia huaia lasi bona lauegu murina dekenai bema ia raka lasi tauna be lauegu diba tahua tauna lasi.” Dirava ena inai taudia ese Iesu idia gwauraia dika bona idia hamasea neganai, unai ibounai ia haheaukalaia; unai hegeregerena, namona be hahediba tauna korikorina ena lalona ia hegeregere, unai bamona hisihisi do ia haheaukalaia.

Namona be Iesu murinai idia raka taudia hutuma ese inai idia laloa namonamo: Keriso ena hahediba taudia ai do idia lao ena anina korikorina be dahaka? Unai ia hahedinaraia totona Iesu ese parabole ta ia henidia; ia gwau: “Bema tau ta ia ura kohoro ruma do ia haginia, ia be guna do ia helai diho bona ena davana do ia laloa, bema ia be ruma do ia karaia haorea diba, o lasi? Ia be ruma ena badina bema ia hamatamaia, to bema ia haorea lasi, vadaeni do idia itaia taudia ibounai ese do idia kirikirilaia, do idia gwau, ‘Inai tau ese kohoro ruma haginia totona ia hamatamaia, to ia goada lasi, ia haorea lasi.’ ”

Unai parabole amo Iesu ese ia hadibadia, namona be ena hahediba taudia ai idia lao gwauraia taudia be edia lalona dekenai idia diba momokani guna, idia hegeregere hahediba tauna ena maduna do idia huaia eiava. Unai be kohoro ruma ia haginia gwauraia tauna hegeregerena; ia laloa namonamo guna, ena moni ia hegeregere ruma do ia haginia ore eiava. Bena Iesu ese ma parabole ta ia henidia, ia gwau:

“O, edena hanua ena king, idau hanua king dekenai do ia tuari henia gwauraia, do ia helai diho guna lasi, do ia laloa karaia lasi, iena tuari taudia 10,000 do idia hegeregere ia mai noho tauna ena tuari taudia 20,000 dekenai do ia kwalimu diba o? Bema lasi, edia padana be do ia daudau dekenai ia ese ena hesiai taudia maino gwauraia totona do ia siaia.”

Bena Iesu ese ena parabole edia anina ia gwauraia, ia gwau: “Unai dainai, umui be emui gau ibounai bema umui rakatania lasi, umui be lauegu diba tahua taudia lasi.” Iesu murinai idia raka taudia hutuma, bona Keriso idia diba taudia oredia danu, bema idia ura ena hahediba taudia ai idia lao, namona be edia lalona idia hegeregere, edia gau iboudiai​—edia kohu, bona edia mauri danu​—do idia henia o do idia rakatania. Oiemu lalona ia hegeregere unai bamona do oi karaia, a?

Iesu ma ia gwau: “Damena be gau namona.” Ororo dekenai ia haroro neganai, ia gwau ena hahediba taudia be “tanobada taunimanima edia damena,” anina be idia be mai edia siahu taunimanima naridia totona. Bena dokonai Iesu ia gwau: “To bema ena mamina be damena lasi, edena bamona damena ena mamina ia abia lou? Ia be tano ena hanamoa muramura gauna lasi, hadoa gaudia dekenai hanamoa lasi gauna, vadaeni inai be negea gauna sibona.”

Unai amo Iesu ia hahedinaraia, nega taina daudau lalonai ia idia badinaia vadaeni taudia idia naria namonamo be namo, do idia manoka garina. Bema idia manoka idia lao, idia be anina lasi, taunimanima ese do idia kirikirilaidia, Dirava vairanai do idia hegeregere lasi, bona edia kara dainai haida ese Dirava ena ladana do idia hadikaia. Unai dainai, ia ese do ia negedia, ia tadika lasi damena bamona, bona do ia hamasedia. Luka 14:​25-35; Genese 29:​30-33; Mataio 5:13.

▪ Ta ese ena varavara bona ena mauri ia “laloaboio” ena anina be dahaka?

▪ Iesu ese edena parabole rua ia gwauraidia, bona edia anina be dahaka?

▪ Iesu ese damena ia herevalaia herevana ena anina be dahaka?