Karoa 95

Headava Hadokoa Karana bona Natu Lalokau Henidia Karana

LAGANI 33 C.E. ai, Iesu bona ena hahediba taudia be Paseka totona Ierusalem idia lao henia neganai, Ioridane Sinavaina idia hanaia, bena Perea tanona amo idia raka hanai. Vanegai Iesu be Perea ai ia noho neganai, idia boiria Iudea dekenai do ia lao, ena turana Lasaro ia gorere dainai. Unai neganai headava hadokoa karana be Farisea taudia dekenai ia gwauraia, bona inai negai danu ma idia gwauraia lou.

Farisea taudia edia orea idauidau taudia be mai edia lalohadai idauidau headava hadokoa karana dekenai. Mose ia gwau “hahine ena kara mirona ta dainai” ena tau ese ia hadihoa diba. Idia haida idia laloa “kara mirona” ena anina be heudahanai, to ma haida idia laloa ena anina be kara kerere maragidia danu. Iesu idia dibagania totona, idia nanadaia, idia gwau: “Tau ta ese ena adavana ia negea diba bema ia ura neganai, o bema mai badina?” Idia laloa, herevana Iesu be edena bamona do ia haere, to Farisea taudia be mai edia lalohadai idauna dainai ena hereva do idia heailaia.

Aonega dalana amo Iesu ese ia haere henidia. Taunimanima edia lalohadai ia gwauraia lasi, to Dirava ena palani headava totona ia gwauraia, ia gwau: “Buka Helaga umui duahia lasi, a? Ia torea, ‘Hamatamaia nega ia karaia neganai Dirava ese tau bona hahine ia karaia, ia gwau, “Inai dainai tau be ena tamana sinana do ia rakatania, ena adavana dekenai do ia hakapua, vadaeni idia ruaosi be tamona idia noho.” ’ Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.”

Iesu ese ia hahedinaraia, matamana neganai Dirava ena ura be tau mai adavana ida idia noho hebou, edia headava idia hadokoa lasi. Farisea taudia idia gwau, bema unai be maoro, “badina be dahaka Mose ena taravatu ia hereva, ia gwau, ‘Negea totona pepa do ia torea, hahine do ia henia, vadaeni do ia rakatania?’ ”

Iesu ia gwau: “Umui emui lalona idia auka dainai Mose ia hereva umui dekenai, ia gwau, ‘Umui emui adavana do umui rakatania.’ To hamatamaia neganai be unai bamona lasi.” Oibe, Eden umana dekenai, Dirava ese headava dalana maorona ia haginia neganai, headava hadokoa karana ia gwauraia lasi.

Bena Iesu ese Farisea taudia ia hamaorodia, ia gwau: “Bema ena adavana ia heudahanai [Greek gado, por·neiʹa] lasi, to adavana ia rakatania, vadaeni hahine ta ma ia adavaia, unai tauna be heudahanai tauna.” Unai amo ia hahedinaraia, matabodaga karana [por·neiʹa] sibona dainai ta ese ena adavana ia hadihoa diba, bena Dirava vairanai ia kerere lasi.

Unai hereva idia kamonai neganai, Iesu ena hahediba taudia idia gwau: “Bema headava ena dala be unai bamona, taunimanima idia headava lasi be namo.” Momokani, ia ura do ia headava tauna ese inai ia laloa namonamo be namo: Headava be noho hanaihanai gauna!

Unai murinai Iesu ese headava lasi karana ia gwauraia. Ia gwau memero haida idia vara kerere, unai dainai idia bada neganai headava karana idia karaia diba lasi. Ma haida be taunimanima ese edia abona idia utua dainai idia karaia diba lasi. To ma haida ese headava ena ura idia koua, guba Basileiana ena gaukara do idia karaia badabada diba totona. Ena hereva dokonai Iesu ia gwau: “Inai hereva do ia abia dae diba tauna ese do ia abia dae.”

Bena haida ese edia natudia Iesu dekenai idia laohaidia. To ena hahediba taudia ese unai maragidia idia gwau henidia bona idia luludia toho, badina idia ura lasi Iesu do idia hahekwarahia kava. To Iesu ia gwau: “Lau ura maragi idia mai lau dekenai, umui lulua lasi, badina idia bamona be Dirava ena Basileia taudia. Momokani lau hamaoroa umui, daika ese Dirava ena Basileia natuna maragina bamona ia abia dae lasi, ia be do ia vareai lasi unuseni.”

Unai hereva amo Iesu ese ia hadibaia gauna be inai: Dirava ena Basileia do ita abia totona, namona be maragidia edia lalo-manau ita tohotohoa. To danu, Iesu ese ena kara amo ia hahedinaraia, gau badana be tama sina ese edia natudia idia bamodia bona idia ida idia herevahereva. Bena Iesu ese maragidia ia rosidia bona ia hanamodia, unai amo ia hahedinaraia ia lalokau henidia. Mataio 19:​1-15; Deuteronomi 24:1; Luka 16:18; Mareko 10:​1-16; Luka 18:​15-17.

▪ Farisea taudia edia lalohadai idauidau headava hadokoa karana dekenai be dahaka dahaka, bona edena dala amo Iesu idia dibagania?

▪ Farisea taudia ese idia dibagania neganai, Iesu be edena bamona ia karaia, bona ia gwau headava hadokoa karana ena badina maorona tamona be dahaka?

▪ Dahaka dainai Iesu ena hahediba taudia idia gwau ta ia headava lasi be namo, bona Iesu ia gwau dahaka be namo?

▪ Iesu ese natudia maragidia dekenai ia karaia karadia amo dahaka ia hadibaia ita dekenai?