Karoa 40

Hebogahisi Karana Ia Hadibadia

IESU be hanua ta dekenai ia noho, reana unai be Nain hanuana, vanegai vabu ta ena natuna ia hatorea isi hanuana, eiava unai hanua ena badibadinai hanuana ta. Unai neganai, Farisea tauna ta ladana Simona ese Iesu ia boiria ena ruma dekenai do idia aniani hebou totona, badina ia ura unai hoa karadia ia karaia tauna, Iesu, ia diba namonamo.

Iesu be Simona ena ruma dekenai ia lao, guna takisi gogoa taudia bona kara dika taudia haida edia ruma dekenai ia lao bamona, badina ia laloa unuseniai idia hebou taudia do ia haroro henidia diba. To Simona ena ruma lalonai ia vareai neganai, edia heabidae karadia korikoridia idia karaia lasi ia dekenai.

Edia kara korikori be inai: Laolao taudia be ruma dekenai idia ginidae neganai, ruma tauna ese ia kisi henidia, edia aedia be ranu keruma amo ia huridia badina be dala ena kahu be idia dekenai ia kamokau dainai, bona dehoro ia henidia edia huina totona, to Iesu ia ginidae neganai, ta ese unai bamona ia kara henia lasi.

Pata dekenai idia do aniani hebou neganai, idia boiria lasi hahinena ta ia raka vareai. Unai hanua taudia idia diba ia be ariara hahinena. Reana Iesu ena hahediba herevadia ia kamonai vadaeni, bona ia diba Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” Unai dainai, ia itaia karadia bona ia kamonai sivaraidia dainai, Iesu ia tahua.

Iesu ena murina kahana amo ia mai, ena aena badibadinai ia tui diho. Ena mata ranuna amo Iesu ena aena ia hapariparidia bena ena huina amo ia dahudia kaukau. Ena aena ia kisi henidia bena dehoro mai bonana namona ia bubua ena aena dekenai. Simona ese ena kara ia raraia mai ena badu ida. Ena lalona dekenai ia gwau: “Inai tau bema ia peroveta tauna, do ia diba inai ia dekenai ia kamokau hahinena be ariara hahinena.”

Iesu ese ena lalohadai ia diba dainai, ia gwau: “Simona e, lau be mai egu hereva sisina.”

Simona ia gwau: “Hadibaia tauna e, mani oi hereva.”

Iesu ia gwau: “Tau ta mai ena abitore taudia rua, ta ena abitore be 100 kina, ma ta ena abitore be 10 kina. Idia be gau ta lasi, edia abitore davana do idia karaia, vadaeni ia ese idia ruaosi edia abitore ia gwauatao. Idia ruaosi huanai be daika ese henitorehai tauna do ia lalokau henia bada?”

Reana Simona ia laloa Iesu ena henanadai be anina lasi. Vadaeni ia haere, ia gwau: “Sedira ena abitore badana ia gwauatao tauna.”

Iesu ia gwau: “Oibe, momokani.” Iesu ese ena kwarana ia giroa, unai hahine ia raraia, bena Simona ia hamaoroa, ia gwau: “Inai hahine oi itaia, a? Lau be emu ruma dekenai lau daekau, egu aena huria totona ranu oi mailaia lasi, to ia be ena matana ranu dekena amo egu aena ia hapariparia bona ena huina dekena amo ia dahua kaukau. Oi be oi kisi henia lasi lau dekenai, to lau be emu rumai lau daekau neganai ia mai bona hari, lauegu aena dekenai ia kisi henia noho. Oi be egu kwarana dehoro dekena amo oi dahua lasi, to ia be egu aena dehoro dekena amo ia hapariparia vadaeni.”

Unai hahine be ena kara amo ia hahedinaraia ena ariara karadia amo ia helalo-kerehai vadaeni. Unai dainai Iesu ia gwau: “Lau hamaoroa oi dekenai, inai hahine ena dika idia bada, to idia lau gwauatao vadaeni, badina be ena lalokau be ia bada. To ena dika idia maragi sibona ia gwauatao tauna be, ena lalokau danu ia maragi.”

Iesu ia gwau lasi ariara karadia be kerere lasi. Iena hereva amo ia hahedinaraia, idia kara kerere taudia bema idia helalo-kerehai momokani bona Keriso dekenai bema idia mai ia durudia totona, do ia bogadia hisi. Iesu ese unai hahine ena lalona ia hagoadaia, ia hamaoroa, ia gwau: “Oiemu dika be lau gwauatao vadaeni. . . . Oiemu abidadama ese ia hamauria oi. Mai maino danu oi lao.” Luka 7:​36-50; Mataio 11:​28-30.

▪ Iesu be Simona ena ruma dekenai ia ginidae neganai, Simona ese edena bamona ia kara henia?

▪ Daika ese Iesu ia tahua, bona badina be dahaka?

▪ Iesu ese edena parabole ia gwauraia, bona ena anina be edena bamona ia gwauraia?