Karoa 39

Hekokoroku Taudia bona Manau Taudia

IESU ese Ioane Bapatiso ena namo ia gwauraia, bena ia kahirakahira dekenai idia noho hekokoroku taudia ia gwauraidia, ia gwau: “Inai nega taudia . . . be memero maragimaragi bamona, hanua lalonai idia helai, edia turadia dekenai idia boiboi. Idia gwau: ‘Ai be gitara ai gadaralaia, to umui be umui mavaru lasi. Ai be mase guria ane ai abia, to umui be umui taitai lasi.’ ”

Iesu ena hereva ena anina be dahaka? Ia gwau: “Ioane Bapatiso ia mai, ia aniani lasi, ia inuinu lasi. To idia gwau, ‘Ia be kavakava.’ To Taunimanima ena Natuna be ia mai vadaeni. Ia aniani bona ia inuinu. Vadaeni idia gwau, ‘Inai be aniani momo bona uaina ia inua momo tauna. Ia be takisi gogoa taudia bona kara dika taudia edia turana.’ ”

Unai taudia idia hamoaledia diba lasi. Ioane be ogogami tauna bamona ia noho. Nasiri taudia edia taravatu hegeregerena, sibona ia ura henia gaudia ia dadaraidia. Aneru ena hereva, “uaina eiava kekero muramura do ia inua lasi” herevana, ia badinaia. To taunimanima idia gwau ia be mai lauma dikana. To Iesu be taunimanima oredia bamona ia noho, bena idia gwau ia be aniani momo tauna bona inuinu kekero tauna.

Unai taudia hamoaledia dalana be auka herea! Idia be gadara hebou memerodia bamona. Edia turadia ese gitara idia hataia neganai idia mavaru lasi, eiava mase guria ane idia abia neganai idia taitai lasi. Vadaeni, Iesu ia gwau: “Dirava ena aonega ese anina namona do ia havaraia.” Ioane bona Iesu edia “anina namona” karadia ese idia hahedinaraia, idia samani henidia taudia idia koikoi.

Bena Iesu ese Korasin, Betesaida, bona Kaperanaum, idia lalodiai siahu karadia momo ia karaia hanuadia, ia gwau henidia. Ia gwau, unai siahu karadia Turo bona Sidono ai bema ia karaia, do idia helalo-kerehai momokani, mai puse dabua bona lahi kahuna ida. Kaperanaum ia gwau henia, ia gwau: “Kota karaia dinana neganai Sodoma be do ia dika maragi, to oi be do oi dika bada.”

Unai murinai, Iesu ese ena Tamana guba dekenai ia hanamoa taunimanima vairadiai, badina be Dirava ese lauma ena hereva namodia be aonega taudia bona lalo-parara taudia edia amo ia hunidia, to manau taudia, beibi bamona taudia, dekediai ia hahedinaraidia.

Bena dokonai Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”

Edena bamona Iesu ese ia durudia do idia laga-ani totona? Tomadiho gunalaia taudia ese sibodia edia tomadiho taravatudia, hegeregere Sabati taravatudia bona ma haida, amo taunimanima idia hametaudia, to Iesu ese unai taravatu metaudia amo ia ruhadia. Danu, haida be gavamani ese idia hametaudia, bona haida be sibodia edia kara dika dainai idia lalo-metau, to Iesu ese unai metau kokia dalana ia hahedinaraia. Ia hahedinaraia edena dala amo Dirava ese edia dika do ia gwauatao bona edena bamona idia ese Dirava do idia tura henia diba.

Iesu ese ita ia henia gwauraia huaia auna namona be inai: Sibona eda mauri ibounai ita gwauhamatalaia Dirava dekenai, bona iseda Tamana mai hebogahisina bona mai lalokauna guba dekenai ena hesiai gaukarana ita karaia. Iesu ese ia dekenai idia mai taudia ia henidia gwauraia maduna haragana be inai: Mauri abia totona, Dirava ena taravatu Baibel lalonai idia badinadia. Unai taravatu idia metau lasi momokani. Mataio 11:​16-30; Luka 1:15; 7:​31-35; 1 Ioane 5:3.

▪ Edena dala ai Iesu ena negai idia noho hekokoroku taudia be memero maragidia bamona?

▪ Dahaka dainai Iesu ese ena Tamana guba dekenai ia hanamoa?

▪ Dahaka dahaka ese taunimanima idia hametaudia, bona Iesu ia ura dahaka heduru ia henidia?