Karoa 1

Hereva Haida Guba Amo

BAIBEL ibounai be iseda Tamana guba dekenai ese ita ia henia ita ia hadibaia totona. To, lagani 2,000 bamona idia lao vadaeni, hereva badadia rua be aneru ta ladana Gabriel, ‘Dirava vairanai ia gini’ aneruna, ese ia mailaidia. Iena mai negadia ruaosi edia sivarai mani ita tahua.

Lagani 3 B.C.E. ai, Iehova ena hahelaga tauna ta ladana Sekaria be Iudea ena ororo kahanai ia noho, Ierusalem kahirakahira dekenai. Ia bona ena adavana idia buruka vadaeni bona ruaosi be natudia lasi. Nega ta, Ierusalem dekenai Sekaria ese hahelaga gaukarana Dirava ena dubu helagana lalonai ia karaia neganai, Gabriel be muramura mai bonana gabua patana badinai ia hedinarai.

Sekaria ia gari dikadika, to Gabriel ese iena lalona ia hanamoa, ia gwau: “Sekaria, oi gari lasi, Dirava ese oiemu guriguri ia kamonai vadaeni. Oiemu adavana Elisabeta ese oiemu natuna ta do ia abia, iena ladana do oi hatoa Ioane.” Ma ia gwau Ioane be “Dirava ena hesiai tauna do ia lao, mai goadana bona mai siahuna” bona Iehova “ena bese taudia do ia abidia hegaegae.”

To Sekaria ese unai hereva ia abia dae diba lasi. Ia laloa ia bona Elisabeta idia buruka momokani dainai natuna ta do idia abia diba lasi. Unai dainai Gabriel ia gwau: “Egu hereva namona oi hamomokania lasi. Unai dainai oiemu uduna do ia koua, oi be do oi hereva diba lasi, ela bona lauegu hereva gaudia ibounai do idia vara.”

Unai neganai, murimuriai idia naria noho taudia idia laloa momo, badina be Sekaria be nega daudau dubu lalonai ia noho. Ia raka lasi neganai ia hereva diba lasi, to toa amo ia hadibadia. Bena idia diba ia matahanai vadaeni.

Sekaria ena gaukara dinadia idia ore neganai, dubu helagana ia rakatania, sibona ena hanua dekenai ia lou lao. Bena aneru ese ia gwauraia gauna be ia vara​—Elisabeta ia rogorogo! Bena hua 5 ia noho hehuni ena ruma dekenai.

Gabeai Gabriel ia hedinarai lou. Nasaret dekenai, haneulato ta ladana Maria dekenai ia hereva, ia gwau: “Oi dekenai Dirava ia moale vadaeni. Oi be do oi rogorogo, mero ta do oi abia, ena ladana do oi hatoa Iesu. Ia be do ia tau bada herea momokani, ia be Dirava Ataiai Momokani ena Natuna do idia gwauraia . . . Iakobo ena bese edia king do ia lao ela bona hanaihanai. Ena basileia be do ia doko lasi.”

Ita diba Gabriel ia moale badina Dirava ese unai hereva ruaosi mailaia gaukarana ia henia dainai. Ioane bona Iesu edia sivarai ma haida do ita duahia neganai, do ita diba goevagoeva dahaka dainai unai hereva guba amo be mai edia anina bada herea. 2 Timoteo 3:16; Luka 1:​5-33.

▪ Edena hereva badadia rua be aneru ta ese guba amo ia mailaidia?

▪ Unai aneru ena ladana be daika, bona ia ese daika daika ia hereva henidia?

▪ Dahaka dainai unai hereva idia abia dae haraga diba lasi?