Karoa 23

Hoa Karadia Kaperanaum Ai

IESU ese ena hahediba taudia, Petro, Andrea, Iakobo, bona Ioane ia boiridia, bena gabeai, Sabati dinana ai, iboudiai be Kaperanaum ena dubu dekenai idia lao. Unuseniai Iesu ese taunimanima ia hadibadia matamaia, bona idia hoa bada, badina mai siahuna danu ia hereva, taravatu hadibaia taudia bamona lasi.

Unai dina ai, tau ta mai lauma dikana be dubu lalonai ia raka vareai. Ia boiboi badabada, ia gwau: “Iesu Nasareta hanua tauna, badina dahaka oi mai ai dekenai? Ai haorea totona oi mai? Lau diba oi. Oi be Dirava ena Helaga Tauna.”

Unai tau ia biagua laumana be Satana ena aneru ta. Iesu ese ia gwau henia, ia gwau: “Hereva lasi, inai tau oi rakatania lao.”

Vadaeni, unai demoni ese unai tau ia hamarerea bada herea. Mai boiboi bada herea ida iena amo ia raka lasi, to ia hadikaia lasi. Taunimanima iboudiai idia hoa maragi lasi! Idia gwau: “Inai be dahaka? . . . Inai tau ena siahu dekenai lauma dikadia danu ia gwau henia, bona iena hereva gauna idia karaia.” Bena Iesu ena kara sivaraina idia abia lao Galilea kahana ibounai dekenai.

Iesu bona ena hahediba taudia be dubu idia rakatania neganai, idia lao Simona Petro ena ruma dekenai. Unuseniai, Simona ena ravana hahinena ia hekure mai gorerena ida; ena kopina ia siahu bada. Iesu idia noia do ia durua. Unai dainai Iesu ia lao, hahine ena imana ia abia bena ia hahelaia tore. Haraga herea ena gorere ia doko, ia toreisi bena edia aniani ia karaia!

Gabeai, dina ia diho neganai, taunimanima ese edia gorere taudia iboudiai be Petro ena ruma dekenai idia mailaidia. Hanua taudia iboudiai be ena iduara ai idia hebou! Herevana edia gorere be dahaka, Iesu ese unai taudia ia hamauridia. Danu, lauma dikadia ia luludia, bena idia raka lasi neganai, idia boiboi, idia gwau: “Oi be Dirava ena Natuna.” Iesu ese ia gwau henidia, ia hamaorodia do idia hereva lasi, badina be idia diba ia be Keriso. Mareko 1:​21-34; Luka 4:​31-41; Mataio 8:​14-17.

▪ Iesu ese ena hahediba taudia hani ia boiridia murinai, Sabati dinana ai, dubu lalonai dahaka ia vara?

▪ Iesu ese dubu ia rakatania murinai, edeseni ia lao, bona dahaka hoa karana ia karaia unuseniai?

▪ Adorahi ai dahaka ia vara?