Karoa 20

Hoa Karana Iharuana Kana Ai

IESU be nega sisina daudau Iudea ai ia haroro loaloa, bena sibona ena provinsi, Galilea, dekenai ia lou henia neganai, ia laga-ani lasi, to ena haroro gaukara ia habadaia. Ena hahediba taudia ese idia bamoa lasi, to sibodia edia bese taudia dekenai bona edia gaukara gunadia dekenai idia lou lao.

Iesu ese dahaka hereva ia harorolaia matamaia? Gauna be inai: “Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.” Galilea taudia ese Iesu idia abia dae bona idia matauraia, ena haroro herevana dainai lasi, to guna, Ierusalem ai, Paseka Ariana dekenai idia lao neganai, Iesu ese ia karaia hoa karadia idia itaia dainai.

Iesu ese ena haroro gaukara badana Galilea tanona dekenai ia hamatamaia Kana hanuana dekenai; vanegai headava ariana ta dekenai ranu be uaina ai ia halaoa hanuana unai. Inai neganai King Herod Antipa ena gavamani lohiana ta ena natuna ia gorere bada. Unai lohia ia kamonai Iesu be Kana dekenai ia ginidae vadaeni, unai dainai ena hanua, Kaperanaum, ia rakatania, Iesu ia tahua. Ia lalohisihisi bada dainai Iesu ia noia, ia gwau: ‘Mani oi mai haraga, egu natuna ia mase gwauraia.’

Iesu ese ia haere henia, ia gwau: ‘Oi lou lao emu ruma dekenai. Emu natuna ia mauri vadaeni!’ Unai lohia ese Iesu ena hereva ia abia dae, ena hanua dekenai ia lou lao. Dala dekenai ia lao noho neganai, ena hesiai taudia idia mai, ia ida idia hedavari. Idia hamaoroa ena mero ia mauri vadaeni! Ia nanadaidia, ia gwau: ‘Edena hora ai ena tauanina ia namo?’

Idia haere, idia gwau: ‘Dina tubua kahanai.’

Unai lohia ia laloa, unai hora ai Iesu ese ia hamaoroa, ia gwau: ‘Emu natuna ia mauri vadaeni!’ Bena ia bona ena ruma taudia iboudiai be Keriso ena hahediba taudia ai idia lao.

Iesu ese hoa karana iharuana Kana dekenai ia karaia unai, Iudea ia rakatania bena Kana dekenai ia lou lao neganai. Guna, Iesu ese ma hoa karadia haida ia karaia, to Kana dekenai ia karaia karadia be toa bamona, idia hahedinaraia Galilea dekenai ia ginidae vadaeni.

Bena Iesu be ena hanua, Nasaret, dekenai ia lou lao. Unuseniai dahaka ia vara? Ioane 4:​43-54; Mareko 1:​14, 15; Luka 4:​14, 15.

▪ Iesu be Galilea dekenai ia lou lao neganai, ena hahediba taudia be dahaka idia karaia, bona Galilea taudia ese Iesu edena bamona idia laloa?

▪ Iesu ese dahaka hoa karana ia karaia, bona unai kara amo ia durudia taudia be edena bamona idia laloa?

▪ Edena bamona Iesu ese ia hahedinaraia Kana ia laloa bada?