Karoa 2

Ia Do Vara Lasi Neganai Idia Hanamoa

ANERU Gabriel ese Maria ia hamaoroa vadaeni mero ta do ia abia bona unai mero be noho hanaihanai pavapavana ai do ia lao. Bena Maria ese ia nanadaia, ia gwau: “Lau be tau lau diba lasi, inai be edena bamona do ia vara?”

Gabriel ia haere, ia gwau: “Lauma Helaga be oi dekenai do ia diho, bona Dirava ena siahu oi dekenai do ia atoa. Vadaeni, oi dekena amo do ia vara, inai mero helagana be Dirava ena Natuna do idia gwauraia.”

Maria ese unai hereva do ia abia dae totona, Gabriel ia gwau: “Oi laloa, oiemu varavara hahine Elisabeta. Ia be buruka neganai ia rogorogo vadaeni. Ibounai idia gwau ia be natuna ia havaraia diba lasi, to iena hua namba 6 be inai. Badina be Dirava ese gau ibounai ia karaia diba.”

Maria ese Gabriel ena hereva ia abia dae. Ia gwau: “Lau be Lohiabada ena hesiai hahine. Oiemu hereva hegeregerena lau dekenai do ia vara, be namo.”

Gabriel ia raka oho, bena nega sisina murinai Maria ia toreisi, Nasaret ia rakatania, Elisabeta bona ena adavana Sekaria dekenai ia lao, Iudea tanona ororo kahana dekenai; unai be dina toi o hani edia laolao.

Maria be edia ruma lalonai ia vareai bona Elisabeta ia hanamoa. Elisabeta ese ena hereva ia kamonai neganai, lauma helaga ese ia hahonua, bena Maria ia hereva henia, ia gwau: “Hahine ibounai huanai oi sibona be namo herea! Oi do oi havaraia merona danu be do namo bada herea! Lauegu namo be dahaka be lauegu Lohiabada ena sinana ese lau dekenai ia vadivadi inai? Be, oiemu hanamoa ena mamina lauegu taiana dekenai ia vareai neganai, lauegu natuna be egu bogana dekenai ia marere, mai moale danu.”

Unai ia kamonai neganai Maria ia gwau: “Lauegu lalona ese Lohiabada ia hanamoa noho. Lauegu laumana danu be Dirava, egu Hamauria Tauna dainai ia moale bada noho. Badina be lau, iena hesiai hahine ogogamina, ia laloa vadaeni, bona unai dainai, hari ela bona hanaihanai taunimanima ibounai ese lau do idia hanamoa bada. Badina be Siahu Diravana ese hoa kara lau dekenai ia havaraia vadaeni.” Ena be Maria ese unai hahenamo ia abia, to ia heagi lasi; Dirava ia hanamoa, ia gwau: “Iena ladana be ia helaga. Iena bogahisihisi be ia dekenai idia gari taudia ibounai edia latanai do ia noho, bona edia natudia latanai danu nega hanaihanai.”

Ane amo Maria ese Dirava ia hanamoa noho, ia gwau: “Iena imana ese iena goada ia hedinaraia vadaeni, bona hekokoroku taudia ia ese ia luludia idau gabu dekenai. Ia ese lohia taudia edia helai gabudia dekena amo ia doridia diho, to ogogami taudia be ia ese ia abidia isi vadaeni. Hitolo taudia, ia ese gau namodia dekenai edia bogana ia hahonua vadaeni, to kohu momo taudia be ia ese imadia kavakava ia siaidia lao. Iena hesiai besena Israela dekenai ia ese durua ia henia vadaeni. Bona iseda sene taudia dekenai ia henia gwauhamata ia badinaia vadaeni. Iena bogahisihisi ia henia noho Aberahamo mai ena bese taudia dekenai. Inai kara do ia laloaboio lasi ela bona hanaihanai.”

Maria be Elisabeta ida idia noho hua toi bamona. Unai be Elisabeta ena rogorogo negana ena hua ginigabedia, unai dainai Maria ese ia durua bada. Unai hahine ruaosi mai edia kamonai, Dirava ena heduru amo idia rogorogo hahinedia, be unai nega namona lalonai idia noho hebou be namo herea!

Iesu ia do vara lasi neganai idia hanamoa dalana be oi laloa vadaeni, a? Elisabeta ese “lauegu Lohiabada” ia gwauraia, bona ena bogana lalonai ia noho merona ia marere mai ena moale ida, Maria ia ginidae neganai. To taunimanima haida ese Maria bona ena natuna, iena bogana lalonai ia noho merona, idia matauraidia lasi, sivarai gabedia ese do idia hahedinaraia hegeregerena. Luka 1:​26-56.

▪ Gabriel ese Maria ia hadibaia edena bamona do ia rogorogo?

▪ Iesu ia do vara lasi neganai, edena bamona idia hanamoa?

▪ Ane amo Maria ese Dirava edena bamona ia hanamoa?

▪ Maria be Elisabeta ida idia noho hebou hua hida, bona dahaka dainai idia ruaosi be unai nega lalonai idia noho hebou be namo?