Karoa 50

Ia Hahegaegaedia, Dagedage Idia Haheaukalaia Totona

IESU ese ena aposetolo be haroro gaukarana karaia dalana ia hadibadia murinai, ia hamaorodia taunimanima haida ese do idia badu henidia. Ia gwau: “Lau ese lau siaia umui, mamoe, uda sisia edia huanai bamona. . . . To taunimanima dekenai do umui naria namonamo. Badina be idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai.”

Iesu ese edia lalona ia hagoadaia, unai dagedage do idia haheaukalaia totona. Ia gwau: “Umui idia kota henia neganai umui emui lalona do idia hekwarahi lasi, do umui gwauraia herevadia totona. Badina be unai neganai do umui gwauraia herevadia be Dirava ese do ia henia umui dekenai. Badina be gwauraia tauna be umui lasi, to umui emui Tamana ena Lauma umui emui lalona dekenai do ia hereva.”

Iesu ma ia gwau: “Kakana ese ena tadina do ia samania, do ia mase totona. Tamana ese ena natuna do ia samania, do ia mase totona. Memero do idia toreisi, edia tamana bona sinana do idia alaia mase. Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.”

Haroro gaukarana be mai anina bada. Unai dainai, Iesu ia hamaorodia namona be idia kara mai edia aonega, do idia haroro noho diba totona. Ia hamaorodia, ia gwau: “Hanua ta dekenai umui do idia dagedage henia neganai be idau hanua dekenai do umui heau lao. Badina be umui lau hamaoroa momokani, Israela edia hanua ibounai dekenai emui gaukara do umui haorea lasi neganai Taunimanima ena Natuna do ia giroa mai.”

Momokani, unai hereva be Iesu ese ena aposetolo 12 ia henidia, to idia be mai anina, Iesu be mase amo do ia toreisi lou murinai tanobada ibounai dekenai do idia haroro taudia dekediai. Unai ia hamomokania gauna be inai: Ia gwau “taunimanima ibounai,” aposetolo ese idia haroro henidia Israel taudia sibodia lasi, ese ena hahediba taudia “do idia badu henia.” Danu, aposetolo ia siaidia lao haroro totona neganai, lohia bona king vairadiai haida ese idia hakaudia lasi. Ma danu, unai neganai kamonai taudia edia varavara ese idia samanidia lasi, do idia mase totona.

Unai hegeregerena, Iesu ena hereva, ‘Israela edia hanua ibounai dekenai edia gaukara do idia haorea lasi neganai Taunimanima ena Natuna do ia giroa mai’ be peroveta herevana ta. Ena anina be, ena hahediba taudia ese Dirava ena Basileia sivaraina harorolaia gaukarana tanobada hegegemadai do idia haorea lasi neganai, Iehova ena hahemaoro davana henia tauna, King Iesu Keriso, be do ia ginidae, Aramagedono dekenai.

Bena Iesu ese ma ia hadibadia, ia gwau: “Diba tahua tauna ese ena hadibaia tauna do ia hanaia diba lasi. Hesiai tauna ese ena biaguna be do ia hanaia diba lasi.” Unai dainai Iesu murinai idia raka taudia idia diba, Dirava ena Basileia sivaraina idia harorolaia neganai dagedage do idia davaria, Iesu ese ia davaria hegeregerena. To Iesu ia gwau: “Tauanina be do idia alaia diba, to lauma be do idia alaia diba lasi taudia dekenai do umui gari lasi. To lauma bona tauanina ruaosi lahi ia araia gabuna dekenai do ia alaia mase diba Diravana dekenai be do umui gari, be namo.”

Gabeai Iesu ese unai dala ia hahedinaraia namo herea. Siahu ibounai Diravana, Iehova, badinaia karana ia negea lasi, bona mase garina ia gari lasi. Oibe, Iehova ese ta ena “lauma” ia alaia mase diba (unai siri lalonai unai ena anina be ena dala ia koua diba mauri gabena do ia abia lasi totona), eiava ia hatorea isi lou diba, do ia mauri hanaihanai totona. Iseda Tamana Iehova guba dekenai ena lalokau bona ena hebogahisi be bada!

Unai murinai, Iesu ese ena hahediba taudia edia lalona hagoadaia totona, Iehova ese ia naridia karana be parabole amo ia hamaorolaidia, ia gwau: “Manu maragidia rua be moni maragimaragi tamona dekenai do idia hoia, ani? To idia ta be tano dekenai do ia moru lasi, emui Tamana bema ia ura lasi neganai. To umui be emui kwarana huina ibounai be idia duahia ore momokani. Do umui gari lasi. Umui be manu maragi momo umui hanaia.”

Basileia sivaraina do idia harorolaia neganai, unai sivarai ese ruma bese taudia do ia hapararadia, badina haida ese do idia abia dae, ma haida ese do idia dadaraia. Ia gwau: “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona.” Unai dainai ta ese hereva momokani do ia abia dae totona, namona be ia boga-auka. Iesu ia gwau: “Bema tau ta ena tamana o ena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ena natuna mero o ena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi.”

Ena hereva dokonai Iesu ia gwau, ena hahediba taudia idia abia dae taudia ese ia danu idia abia dae. Ma ia gwau: “Bema tau ta ese ranu keruma kapusi tamona sibona ia henia lauegu murinai ia raka tau maragina ta dekenai, umui lau hamaoroa momokani, ia be davana do ia abia momokani.” Mataio 10⁠:​16-42.

▪ Iesu ese ena hahediba taudia edena bamona ia hadibadia hisihisi do idia ania?

▪ Edena heduru herevadia bona lalona hagoadaia herevadia ia henidia?

▪ Dahaka dainai Iesu ena hahediba herevadia be mai anina, hari inai negai idia noho Keristen taudia dekediai danu?

▪ Edena dala amo Iesu ena hahediba tauna ta ese ia ia hadibaia tauna ia hanaia lasi?