Karoa 129

Ia Hedinarai Loulou

IESU ena hahediba taudia idia do lalohisihisi noho. Idia diba lasi dahaka dainai Iesu ena tauanina be gara ai ia noho lasi, bona hahine edia sivarai idia abia dae lasi. Vadaeni, unai Sunday adorahi ai, Kleopa bona hahediba tauna ma ta ese Ierusalem idia rakatania idia lao Emausa; unai hanua ruaosi edia padana be kilomita 11 bamona.

Dala ai idia be unai dina ai idia vara gaudia idia herevalaia noho lalonai, tau ta be idia dekenai ia raka kahirakahira lao, ia bamodia. Ia nanadaidia, ia gwau: “Umui be dala dekenai dahaka umui herevalaia?”

Vadaeni idia ruaosi idia gini, edia vairana idia huaia, bena Kleopa ese ia haere henia, ia gwau: “Oi be Ierusalema dekenai sibona oi noho, unai dainai inai gaudia idia vara be oi diba lasi, a?” Ia gwau: “Dahaka gau?”

Idia gwau: “Iesu, Nasareta tauna, ena sivarai. . . . Dubu biagudia bona hanua lohia taudia ese ena mase dala idia karaia, idia hasatauroa. To ai laloa bona ai gwau ia be Israela edia hamauria tauna.”

Kleopa bona ena bamona ese unai dina ai idia vara gaudia badadia idia hamaorolaia, idia gwau haida ese aneru idia itadia bona gara lalonai tauanina be lasi, bena idia gwau idia vara gaudia edia anina idia daradaralaia. Bena hari tau ese ia gwau henidia, ia gwau: “Kavakava taudia, emui lalona be dibura, peroveta taudia edia hereva umui abia dae lasi. Ia maoro lasi a, Keriso unai bamona do ia hisihisi bona ena hairaina do ia abia?” Bena Buka Helaga ai Keriso ena sivarai idia torea herevadia iboudiai edia anina be ia ese ia hadibalaidia.

Idia lao henia hanuana Emausa be kahirakahira neganai, hari tau ia raka hanai gwauraia. Idia ruaosi idia ura hereva ma haida idia kamonai, unai dainai idia koua, idia gwau: “Do ita noho, badina be ia adorahi vadaeni, dina be kahirakahira do ia diho.” Unai dainai ia be idia ida ia noho. Idia aniani gwauraia neganai, ia guriguri, paraoa ia hamakohia, ruaosi ia henidia, bena edia matana idia papa, idia diba hari tau be Iesu, tauanina ai ia hedinarai. Bena edia vairana amo ia boio.

Unai neganai idia lalo-parara dahaka dainai ia bamodia tauna ese gau momo ia diba! Idia gwau: “Dala dekenai ia hereva ita dekenai, bona Buka Helaga ena anina ita dekenai ia hadibaia neganai, iseda lalona be idia siahu, ani?” Bena idia toreisi, Ierusalem idia lou henia, aposetolo mai edia bamodia ida idia hebou noho neganai idia davaridia. Kleopa mai ena bamona be hereva ta idia do gwauraia lasi neganai, unai taudia idia gwau: “Momokani, Lohiabada be ia toreisi vadaeni, bona Simona dekenai ia hedinarai.” Bena ruaosi ese idia hamaorodia Iesu be idia dekediai ia hedinarai danu. Nega namba 4 unai, ia be ena hahediba taudia dekediai ia hedinarai unai dina ai.

Bena kara haraga Iesu ia hedinarai lou, nega namba 5 unai. Ena be hahediba taudia ese ruma ena iduara idia lokaia vadaeni Iuda taudia garidia idia gari dainai, to ia vareai, idia bogaragidiai ia gini, bena ia gwau: “Maino umui abia.” Idia gari dikadika, idia laloa ia be lauma ta. Iesu ese ia hamaorodia ia be lauma ta lasi, ia gwau: “Badina dahaka umui emui kudouna idia hoa? Badina dahaka umui laloa daradara? Egu imana bona egu aena umui itaia, lau inai. Egu kopina dekenai do umui dogoatao, vadaeni do umui diba, badina be lauma be tauanina lasi bona turiana lasi, inai lau umui itaia hegeregerena.” To idia do daradara.

Edia daradara kokia totona, Iesu ia nanadaidia, ia gwau: “Emui aniani sisina ia noho, o?” Idia ese gwarume taina, idia gabua gauna, idia henia bena ia ania. Bena ia gwau: “Ita noho hebou neganai [lau do mase lasi neganai] umui lau hamaoroa, Mose bona peroveta taudia edia buka dekenai bona Salamo Buka dekenai lauegu sivarai idia torea herevadia ibounai be do idia momokani.”

Iesu ese Buka Helaga ena anina ia hadibalaidia noho, ia gwau: “Inai bamona ia torea vadaeni, Keriso be unai bamona hisihisi do ia abia, bona dina toi murinai mase dekena amo do ia toreisi lou. Vadaeni iena ladana dainai lalona giroa bona dika gwauatao do idia harorolaia gabu ibounai dekenai. Ierusalema dekenai inai gaukara do umui hamatamaia ia lao bona tanobada besedia ibounai dekenai do idia harorolaia.”

Unai Sunday hanuaboi ai Toma be idia ida ia hebou lasi. Unai dainai, gabeai idia be mai edia moale ida idia hamaoroa, idia gwau: “Ai be Lohiabada ai itaia vadaeni.”

To Toma ia gwau: “Iena imana dekenai ikoko edia bero bema lau itaia lasi, egu imana kwakikwakina be ikoko idia gwadaia gabuna dekenai bema lau atoa lasi, bona iena ohena dekenai bema lauegu imana lau atoa vareai lasi, lau be do lau hamomokania lasi.”

Vadaeni, dina 8 idia ore murinai hahediba taudia be ruma lalonai ma idia hebou lou, Toma danu idia ida. Ena be iduara idia lokaia vadaeni, to Iesu ia lao, idia bogaragidiai ma ia gini, ia gwau: “Maino umui abia.” Bena Toma ia hereva henia, ia gwau: “Oiemu imana kwakikwakina oi atoa mai, lauegu imana do oi dogoatao, bona oiemu imana danu lauegu ohena dekenai do oi atoa vareai. Vadaeni oiemu laloa daradara oi hadokoa, bona lau dekenai oi abidadama henia.”

Bena Toma ia gwau: “Egu Lohiabada! Egu Dirava!”

Iesu ia gwau: “Lau oi itaia dainai lau dekenai oi abidadama, ani? Lau idia itaia lasi to idia abidadama lau dekenai taudia be namo do idia davaria.” Luka 24:​11, 13-48; Ioane 20:​19-29.

▪ Emausa ena dala ai, tau ta ese hahediba taudia rua dahaka ia nanadailaidia?

▪ Unai tau be dahaka ia gwau bena ruaosi edia lalona idia siahu?

▪ Ruaosi be edena bamona idia lalo-parara unai tau be Iesu?

▪ Kleopa mai ena bamona ida be Ierusalem idia lou henia neganai, dahaka sivarai namona idia kamonai?

▪ Edeseniai Iesu be nega namba 5 ena hahediba taudia dekediai ia hedinarai, bona unai neganai dahaka ia vara?

▪ Ma dina 8 idia ore murinai dahaka ia vara, bona edena bamona Toma ese ia hamomokania Iesu ia mauri?