Karoa 131

Ia Hedinarai Negadia Ginigabedia, bona Pentekoste 33 C.E.

IESU ese ena aposetolo 11 ia hamaorodia Galilea ena ororo ta dekenai ia ida do idia hebou. Bena idia ese ena hahediba taudia ma haida idia hamaorolaia, unai dainai idia 500 mai kahana be unuseniai idia hebou. Bena Iesu be idia dekediai ia hedinarai bona ia hadibadia matamaia neganai idia moale bada!

Ia hamaorodia Dirava ese siahu ibounai guba ai bona tanobada ai ia henia vadaeni. Bena ia haganidia, ia gwau: “Unai dainai do umui lao, bese ibounai be diba tahua taudia [ai] do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”

Inai mani oi laloa: Tatau, hahine, bona memero kekeni danu ia haganidia, taunimanima be hahediba taudia ai do idia halaodia. Edia inai taudia ese edia haroro bona hadibaia gaukaradia do idia koua toho, to Iesu ese edia lalona ia hagoadaia, ia gwau: “Do umui kamonai bona laloa noho, lau be hanaihanai umui danu ita noho ela bona tanobada dokona.” Lauma helaga amo Iesu be ena orea taudia ida ia noho, ia durudia edia haroro gaukarana do idia karaia ore totona.

Iesu ia toreisi lou murinai, dina 40 lalodiai ena hahediba taudia dekediai ia hedinarai loulou mai mauri ida. Unai negadiai Dirava ena Basileia ia hadibalaidia, bona ia hamaorodia idia be iena hahediba taudia dainai edia gaukara be dahaka. Iena tadina Iakobo ese guna ia abidadama henia lasi, to nega ta ia dekenai ia hedinarai, bena ia abia dae Ia be Keriso.

Aposetolo be Galilea ai idia do noho neganai, Iesu ese ia hamaorodia Ierusalem dekenai do idia lou lao. Unuseniai Iesu ida idia hedavari neganai, ia hamaorodia, ia gwau: “Ierusalema umui rakatania lasi, to egu Tamana ia gwauhamata gauna, guna lau hereva henia umui dekenai gauna, do umui naria. Badina be Ioane be, ranu dekenai bapatiso ia karaia, to dina momo do ia ore lasi neganai, Lauma Helaga dekenai bapatiso do umui abia.”

Gabeai, Iesu be ena aposetolo ida ia hebou lou bena ia hakaudia lao Betania dekenai, Olive Ororona ai. Hoa gauna be inai: Ena be ia hamaorodia vadaeni kahirakahira do ia rakatanidia bona do ia lao guba, to idia do laloa iena Basileia be tanobada ai do ia haginia. Unai dainai idia nanadaia, idia gwau: “Lohiabada e, inai negana be, basileia do oi henia lou Israela taudia dekenai, a?”

Iesu ese edia lalohadai kererena ia hamaoromaoroa toho lou lasi, to ia gwau: “Egu Tamana sibona ena siahu dekenai ia laloa dina bona nega, umui be diba lasi.” Bena ia henidia gaukarana ia gwauraia lou, ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”

Idia itaia noho lalonai, Iesu be guba dekenai ia daekau matamaia, bena ori ta ese ia koua, vadaeni idia itaia lou lasi. Ena tauanina ia haorea murinai, ena lauma-anina ai ia daekau lao guba dekenai. Aposetolo ese guba idia itaia noho lalonai, tatau rua mai dabua kurokurodia be idia dekediai idia hedinarai. Unai aneru, tauanina ai idia hedinarai, ese idia nanadaidia, idia gwau: “Galilea taudia e, badina dahaka umui gini bona guba dekenai umui itaia noho? Inai Iesu, hari umui ia rakatania bona guba dekenai ia daekau lao be dohore ia giroa mai, hari umui itaia ia daekau hegeregerena.”

Iesu ese tanobada ia rakatania neganai, kibi idia hiriridia lasi taunimanima hadibadia totona, to ena orea taudia mai edia kamonai sibodia ese idia itaia. Unai hegeregerena do ia lou mai; ena orea taudia mai edia kamonai sibodia do idia diba ia lou mai vadaeni bona Basileia siahuna ia abia vadaeni.

Vadaeni, aposetolo be Olive Ororona amo idia diho, Kidron Kourana idia hanaia, Ierusalem ai idia vareai lou. Unuseniai idia noho, Iesu ena oda hegeregerena. Dina 10 idia ore murinai, Iuda taudia edia Pentekoste dinana ai, lagani 33 C.E. lalonai, hahediba taudia 120 bamona be atai daiutuna ta lalonai idia hebou, Ierusalem ai. Bena karaharaga rege ta, lai bada regena hegeregerena, ese idia helai hebou rumana ia hahonua. Bona lahi maladia hegeregeredia idia hedinarai, hebou taudia ta ta edia kwarana latanai idia diho, bena idia iboudiai be idau gado idau gado ai idia hereva. Iesu ia gwauhamata vadaeni hegeregerena, lauma helaga ia bubua diho unai! Mataio 28:​16-20; Luka 24:​49-52; 1 Korinto 15:​5-7; Kara 1:​3-15; 2:​1-4.

▪ Galilea ena ororo ta dekenai Iesu ese daidia ia oda henidia, bona unai oda herevadia be dahaka?

▪ Iesu ese ena hahediba taudia edia lalona edena bamona ia hagoadaia, bona edena dala ai ia be idia ida do ia noho?

▪ Iesu ia toreisi lou bena dina hida lalodiai ena hahediba taudia dekediai ia hedinarai loulou, bona dahaka ia hadibadia?

▪ Iesu be daika dekenai ia hedinarai, ia do mase lasi neganai unai tau be ena hahediba tauna ta lasi?

▪ Iesu be ma nega rua ena aposetolo ida idia hebou. Edeseniai idia hebou, bona unai nega ruaosi ai dahaka ia vara?

▪ Aneru idia gwau Iesu be tanobada ia rakatania hegeregerena do ia lou mai; anina be dahaka?

▪ Pentekoste 33 C. E. ai dahaka ia vara?