Karoa 4

Ia Rogorogo to Ia Headava Lasi

MARIA ia rogorogo matamata neganai, Elisabeta ida ia noho, bena hua toi murinai ia lou lao ena hanua Nasaret dekenai. Ia diba nega sisina murinai hanua taudia iboudiai do idia diba ia rogorogo. Ia madi!

Maria ena hekwakwanai be bada, badina be ia be kapenta tauna Iosef ena maoheni. Ia diba Dirava ena taravatu Israel besena dekenai be, bema tau ta ena maoheni be ma tau ta ida ia mahuta hebou, nadi amo do idia hodoa mase. Vadaeni, ia rogorogo ena badina be edena bamona do ia gwauraia hedinarai diba Iosef dekenai?

Ruaosi idia hedavari lou neganai, Maria ese ia dekenai ia vara gauna ia hamaorolaia, ia gwau Dirava ena lauma helaga ese ia harogorogoa. To Iosef ese unai hereva ia abia dae haraga diba lasi.

Iosef ia diba Maria be mai ena ladana namona, bona ia lalokau henia bada. Ena be ena hereva ia hamomokania lasi, to ia ura lasi do idia hodoa mase eiava taunimanima vairadiai do idia hahemaraia. Unai dainai, iena lalohadai be do ia hadihoa hehuni. Unai nega lalonai taunimanima idia laloa maoheni taudia be headava taudia hegeregeredia, bona maoheni hadihoa dalana be adavana hadihoa dalana hegeregerena.

Gabeai, Iosef ese inai gau ia laloa noho lalonai, ia mahuta. Iehova ena aneru ta be nihi lalonai ia hedinarai ia dekenai, ia gwau: “Oiemu adavana Maria abia totona oi gari lasi, badina be inai mero, Maria ena bogana dekenai ia noho be, Lauma Helaga ese ia henia vadaeni. Ia be mero ta do ia abia. Ena ladana do umui hatoa Iesu, badina be ia ese ena bese taudia edia kara dika dekena amo do ia hamauridia.”

Iosef ia noga neganai ia moale bada! Kara haraga aneru ena hereva hegeregerena ia karaia. Taunimanima vairadiai Maria ia hakaua lao iena ruma dekenai; unai amo ia hahedinaraia ia adavaia vadaeni. To ruaosi idia mahuta hebou lasi ela bona Iesu ia vara.

Itaia! Maria ena bogana ia bada momokani, to Iosef ese doniki latanai ia hahelaia. Idia be edeseniai idia lao gwauraia, bona dahaka dainai idia laolao, Maria ena mara negana be kahirakahira neganai? Luka 1:​39-41, 56; Mataio 1:​18-25; Deuteronomi 22:​23, 24.

▪ Maria ese ena rogorogo ia hamaorolaia neganai Iosef be dahaka ia laloa, bona dahaka dainai?

▪ Idia do headava lasi neganai, edena bamona Iosef ese Maria ia hadihoa diba?

▪ Taunimanima vairadiai Iosef ese dahaka ia karaia, unai amo ia hahedinaraia Maria ia adavaia vadaeni?