Karoa 119

Idia Abia Lao Ana Dekenai, Bena Kaiafa Dekenai

IESU idia guia bena hahelaga tauna badana gunana Ana dekenai idia hakaua lao. Guna, Iesu ena lagani be 12 neganai dubu lalonai ena hereva amo hahediba taudia ia hahoadia neganai, Ana be hahelaga tauna badana. Gabeai, ena natuna memerodia haida ese unai dagi idia abia, bona inai sivarai ena nega lalonai ena ravana Kaiafa ese unai dagi ia dogoatao.

Vadaeni, Iesu be Ana ena ruma dekenai idia hakaua lao guna, reana badina be nega daudau lalonai Iuda edia tomadiho lalonai Ana be mai ladana bada dainai. Danu, Iesu be unuseniai ia noho neganai Hahelaga Tauna Badana Kaiafa be mai ena nega, Sanhedrin taudia bona uitnesi koikoi taudia do ia haboudia. Sanhedrin be Iuda edia kota badana mai ena memba taudia 71.

Ana ese Iesu ia nanadaia, ena hahediba taudia bona ena hahediba herevadia ia nanadailaia. Iesu ia haere, ia gwau: “Tanobada taudia dekenai hereva lau gwauraia hedinarai. Nega ibounai dubu lalonai bona Dubu Helaga dekenai lau hadibaia, Iuda taudia idia haboua gabudia ibounai dekenai. Lauegu hereva be lau hunia lasi. Dahaka dainai lau umui nanadaia? Egu hereva idia kamonai taudia dekenai oi nanadaia, idia be idia diba lau be edena bamona lau hadibaia.”

Unai bamona ia haere, bena hesiai tauna ta ese ena vairana ia pataia, ia gwau: “Dubu biaguna badana unai bamona oi haere henia, a?”

Iesu ia haere, ia gwau: “Bema lau hereva kerere, mani inai hereva kerere oi gwauraia hedinarai, to bema lau hereva maoro, dahaka dainai oi botaia lau?” Unai murinai Ana ese Iesu mai guia ida ia siaia lao Kaiafa dekenai.

Hahelaga taudia badadia bona hanua tau badadia bona taravatu hadibaia taudia iboudiai be Kaiafa ena ruma ai idia hebou. Unai bamona kota Paseka hanuaboina ai idia karaia be Iuda taudia edia taravatu utua karana. To unai taravatu ese tomadiho gunalaia taudia edia palani dikana ia koua lasi.

Pura haida gunanai, Iesu ese Lasaro ia hatorea isi lou neganai, Sanhedrin taudia ese edia lalona idia hadaia, idia gwau Iesu do ia mase be namo. Bona varani vanegai, Wednesday ai, tomadiho gunalaia taudia idia gwau bou, tiriki dalana ta amo Iesu do idia dogoatao bona hamasea dalana do idia karaia. Madi, idia do kota henia lasi neganai, idia revaia mase vadaeni!

Idia samania totona, uitnesi taudia haida idia tahudia, Iesu do idia samania koikoi taudia unai. To uitnesi taudia haida mai edia hereva tamona idia davaridia diba lasi. Bena koikoi taudia rua idia toreisi, idia gwau: “Ai kamonai ia gwau inai bamona, ‘Inai taunimanima edia imadia dekenai karaia Dubu Helaga, lau be do lau hamakohia, bona dina toi murinai, imana dekenai karaia lasi gauna ta do lau haginia.’ ”

Kaiafa ese Iesu ia nanadaia, ia gwau: “Oi hereva lasi, a? Inai taunimanima idia samania oi. Edena kerere oi karaia?” To Iesu ia hereva lasi. Sanhedrin taudia be unai dala amo idia kwalimu lasi badina be uitnesi taudia ese edia hereva idia hahegeregeredia diba lasi. Unai dainai Kaiafa ese tiriki karana idauna ta ia karaia.

Ia diba bema ta ia gwau ia be Dirava ena Natuna, unai ese Iuda taudia ia habadudia. Guna, nega rua Iesu idia samania, idia gwau ia idia hamasea be namo, badina be idia laloa ia gwau ia be Dirava ida ia hegeregere bona unai amo Dirava ena ladana ia hadikaia. Unai dainai Kaiafa be hari ia gwau: “Mauri Dirava ena ladanai lau hereva oi dekenai, oi hamaoroa ai dekenai, oi be Keriso, Dirava ena Natuna, o?”

Herevana Iuda taudia be dahaka idia laloa, to Iesu be momokani Dirava ena Natuna. Bema ia haere lasi reana do idia laloa iena dagi, Keriso dagina unai, ia dadaraia. Unai dainai mai ena boga-auka ida ia haere, ia gwau: “Lau inai, bona gabeai Taunimanima ena Natuna do umui itaia, Siahu Ibounai ena idiba kahanai ia helai, guba ena ori lalonai do ia diho mai.”

Bena Kaiafa ese sibona ena dabua ia darea, ia boiboi, ia gwau: “Dirava dekenai hadikaia herevana ia gwauraia vadaeni, ma dahaka hereva ita tahua? Dirava dekenai hadikaia herevana ia gwauraia umui kamonai vadaeni. Umui be dahaka umui gwau?”

Sanhedrin taudia idia gwau: “Do ia mase be namo.” Bena idia haida ese idia hevaseha henia, bona hereva idauidau idia gwauraia ena ladana hadikaia totona. Ena vairana idia pataia bona idia kanudia. Ma haida ese ena vairana dabua amo idia koua bona idia botaia bena mai edia lalo-dika ida idia gwau: “Keriso e, bema oi be peroveta tauna, oi hamaoroa ai dekenai, daika ese ia botaia oi?” Unai kara dikadia, taravatu utua karadia unai, be hanuaboi ai idia karaia idia kota henia neganai. Mataio 26:​57-68; 26:​3, 4; Mareko 14:​53-65; Luka 22:​54, 63-65; Ioane 18:​13-24; 11:​45-53; 10:​31-39; Ioane 5:​16-18.

▪ Iesu be edeseniai idia hakaua lao guna, bona unuseniai dahaka ia vara ia dekenai?

▪ Unai murinai Iesu be edeseniai idia hakaua lao, bona dahaka totona?

▪ Edena dala amo Kaiafa ese Sanhedrin taudia edia lalona ia veria bena idia gwau Iesu ia mase be namo?

▪ Idia kota henia neganai, dahaka kara dikadia, taravatu utua karadia unai, idia karaia ia dekenai?