Karoa 67

Idia Dogoatao Lasi

KALAGA Ariana ia do doko lasi neganai, tomadiho gunalaia taudia ese pulisi idia siaia Iesu dogoatao totona. Idia amo ia komu lasi, to taunimanima vairadiai ia haroro noho, ia gwau: “Nega sisina lau be umui dekenai do lau noho, vadaeni lau ia siaia Dirava dekenai do lau giroa lao. Vadaeni lau do umui tahua, to lau be do umui davaria lasi, badina be lau noho gabuna dekenai danu do umui lao diba lasi.”

Iuda taudia ese Iesu ena hereva ena anina idia diba lasi, unai dainai sibodia idia henanadai heheni, idia gwau: “Inai tau be edeseni do ia lao, vadaeni do ita davaria lasi ia gwau? Sedira Helene taudia edia hanua momo dekenai do ia lao, Iuda taudia idia noho gabudia, unuseni Helene taudia dekenai do ia hadibaia karaia, a? Inai be dahaka hereva inai tau ese ia gwauraia, ia gwau, ‘Lau do umui tahua, to lau be do umui davaria lasi bona do lau noho gabuna dekenai danu do umui lao diba lasi?’ ” To Iesu ese ia gwauraia gauna be inai: Mase amo do ia toreisi bena guba dekenai do ia lao, ena inai taudia idia lao diba lasi gabuna unai.

Aria ena dina namba 7, dina ginigabena, be ia ginidae. Dina ta ta ai, daba kahanai, hahelaga tauna ese ranu, Siloama gohuna amo ia abia bena ia bubua, boubou patana ena badina dekenai ia aru diho totona. Reana taunimanima ese unai kara idia laloa, Iesu be inai bamona ia boiboi neganai; ia gwau: “Ranu mase tauna be lau dekenai ia mai, ranu do ia inua. Buka Helaga dekenai ia torea bamona, ‘Lau dekenai do ia abidadama henia tauna be, iena kudouna dekena amo mauri ranuna be sinavai bamona do ia aru lao.’ ”

Iesu be lauma helaga do ia bubua neganai do idia vara gaudia namodia ia herevalaidia unai. Murina lagani ai, Pentekoste dekenai, lauma helaga ia bubua. Unai neganai mauri ranuna ia aru lasi, sinavai bamona, hahediba taudia 120 ese taunimanima idia haroro henidia matamaia neganai. To unai nega be do lasi neganai, Keriso ena hahediba taudia be lauma amo ia horodia lasi guba maurina idia abia totona.

Iesu ena hahediba herevadia dainai, haida idia gwau: “Momokani, ita naria noho Peroveta Tauna be inai.” Mose ia hanaia peroveta tauna, Dirava ese ia gwauhamatalaia tauna, idia herevalaia unai. Ma haida idia gwau: “Inai be Keriso.” To ma haida idia gwau: “Keriso be Galilea dekena amo do ia mai, a? Buka Helaga dekenai ia torea, ani, Keriso be Davida ena bese dekena amo do ia vara, Betelehema, Davida ena hanua lalonai.”

Unai dainai taunimanima idia parara. Haida idia ura Iesu idia dogoatao, to tau ta ena imana ia kamokau lasi ia dekenai. Pulisi ese Iesu idia hakaua lao lasi dainai, idia giroa neganai hahelaga taudia bona Farisea taudia ese idia nanadaidia, idia gwau: “Badina be dahaka umui hakaua mai lasi? ”

Pulisi idia haere, idia gwau: “Hamatamaia nega dekena amo ia mai bona hari tau ta ia hereva lasi inai tau ia hereva bamona.”

Tomadiho gunalaia taudia ese idia gwau dika henidia mai edia badu ida, idia gwau: “Be, umui danu ia koia vadaeni? Sedira hanua edia lohia ta o Farisea taudia ta ese ia dekenai idia abidadama vadaeni, a? Lasi momokani. Inai taunimanima be Mose ena taravatu idia diba lasi. Idia be Dirava dekena amo dika davana do idia davaria.”

Bena Nikodemo, Farisea tauna bona Iuda ena kaunsolo tauna ta, be Iesu dainai ia hereva, gari lasi. Lagani rua mai kahana gunanai, hanuaboi ai, Iesu dekenai ia lao bona ia hamaoroa ia abidadama henia. To hari, Nikodemo ia gwau: “Iseda taravatu ese tau ta do ia kota henia neganai, be ena hereva do idia kamonai guna, ani, bona ena kara do idia diba guna, ani?”

Farisea taudia idia badu dikadika, badina edia orea tauna ta ese Iesu ia durua. Idia gwau henia, idia gwau: “Oi danu Galilea tauna, a? Do oi tahua bona do oi diba, peroveta tauna ta Galilea dekenai do ia vara lasi.”

Ena be Buka Helaga ia gwau lasi peroveta tauna ta be Galilea ai do ia vara, to ia gwau “diari badana” be unai tano dekenai do ia hedinarai, anina be Keriso be unai tano amo do ia mai. Danu, Iesu be Betelehem ai ia vara, bona ia be David ena tubuna ta. Ena be Farisea taudia be unai idia diba, to reana taunimanima idia koidia dainai, idia be mai edia lalohadai kereredia Iesu dekenai. Ioane 7:​32-52; Isaia 9:​1, 2; Mataio 4:​13-17.

▪ Aria neganai, daba daba iboudiai dahaka ia vara, bona Iesu be dahaka ia gwauraia neganai unai kara idia laloa reana?

▪ Dahaka dainai pulisi ese Iesu idia dogoatao lasi, bona unai dainai tomadiho gunalaia taudia be edena bamona idia hereva?

▪ Nikodemo be daika, ia ese Iesu edena bamona ia laloa, bona ena orea taudia, Farisea taudia unai, ese edena bamona ia idia kara henia?

▪ Dahaka ese ia hahedinaraia Keriso be Galilea amo do ia mai?