Karoa 115

Idia Hepapahuahu

ADORAHI ai, Iesu ese ena aposetolo edia aedia ia huria, lalo-manau karana hadibadia totona. Unai murinai, ena mase be kahirakahira dainai, Memorial ia hamatamaia, unai kara amo ena mase do idia laloatao. Unai murinai ena aposetolo idia hepapahuahu heheni, idia daika ia herea! Guna unai idia hepapahuahulaia vadaeni.

Guna, ororo dekenai Iesu ena oromana ia idau negana murinai, aposetolo idia hepapahuahu, idia daika ia herea. Danu, Iakobo bona Ioane ese dagi badadia Basileia lalonai Iesu idia noia neganai, aposetolo idia hepapahuahu lou. Bena Iesu be idia ida idia noho hanuaboina ginigabena ai, idia hepapahuahu lou, unai dainai ia lalohisihisi. Vadaeni, dahaka ia karaia?

Ia gwau henidia lasi, to mai ena haheauka ida ia hereva henidia, ia gwau: “Bese idauidau edia king ese idia lohia idia dekenai, bona hanua idauidau taudia ese edia lohia dekenai idia hanamoa. To umui be unai bamona lasi. . . . Badana be daika, aniani gabuna dekenai do ia helai diho tauna, o hesiai tauna? Aniani gabuna dekenai ia helai diho tauna, ani?” Bena sibona ena kara ia gwauraia, ia gwau: “Lau be umui emui huanai hesiai tauna bamona.”

Ena be aposetolo idia goevadae lasi, to Iesu ena hisihisi negadiai ia dekenai idia noho auka masemase. Unai dainai Iesu ese ia hamaorodia, ia gwau: “Egu Tamana ena Basileia ta ia henia lau dekenai hegeregerena, lau danu Basileia ta lau henia umui dekenai.” Iena gwauhamata ena anina be, ia idia badinaia taudia be ia ida do idia lohia hebou iena Basileia lalonai. Unai ahuna do idia abia taudia be 144,000 sibodia.

Ena be Iesu ese aposetolo unai helaro namona ia hamaorolaidia, to unai negai idia be manoka lauma dalana ai. Ia hamaorodia, ia gwau: “Hari hanuaboi umui ibounai lau do umui rakatania.” Petro ia hamaoroa ia dainai ia guriguri vadaeni, ma ia gwau: “Do oi giroa lou neganai be oiemu tadikaka dekenai goada do oi henia.”

Bena Iesu ia gwau: “Lauegu natudia e, nega daudau lasi umui danu do lau noho. Umui ese lau do umui tahua, to Iuda taudia dekenai lau hamaoroa hegeregerena, lau gwau, ‘Do lau lao gabuna dekenai do umui lao diba lasi,’ umui dekenai danu unai bamona lau hamaoroa. Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”

Petro ese ia nanadaia, ia gwau: “Lohiabada e, edeseni do oi lao?”

Iesu ia haere, ia gwau: “Do lau lao gabuna be harihari lauegu murina dekena amo do oi lao diba lasi, to gabeai do oi lao diba.”

To Petro ia gwau: “Badina be dahaka inai harihari oiemu murina dekena amo do lau mai diba lasi? Lauegu mauri be oi totona do lau atoa diho.”

Iesu ia gwau: “Oiemu mauri be lau totona do oi atoa diho, a?” “Momokani lau hamaoroa oi, hari hanuaboi, kokoroku nega rua ia do boiboi lasi, nega toi do oi hereva, oi diba lasi lau.”

To Petro ia gwau: “Oi danu do ita mase nega tamona, to do lau hereva lasi inai bamona, ‘Lau diba lasi Iesu.’ ” Aposetolo oredia danu be unai bamona idia hereva, bona Petro ia heagi, ia gwau: “Taunimanima ibounai oi do idia rakatania, to lau be lasi.”

Vadaeni, Iesu ese ena aposetolo Galilea dekenai ia siaidia lao haroro totona negana ia herevalaia. Ia gwau unai negai idia lao mai edia pusepuse lasi, bona mai edia dabua udaia gaudia lasi, bena ia nanadaidia, ia gwau: “Umui be gau ta dekenai umui dabu, a?”

Idia gwau: “Lasi.”

Iesu ia gwau: “To harihari ta mai ena pusepuse, do ia abia, ta mai ena dabua udaia gauna danu unai bamona, ta mai ena tuari kaia lasi, ena dabua dekena amo kaia do ia hoia. Badina be lau hamaoroa umui dekenai, inai idia torea herevana ena anina be lau dekenai do ia vara, ia gwau, ‘Ia be dika havaraia taudia danu idia haboua nega tamona.’ Momokani, unai hereva be lau dekenai do ia momokani.”

Kara dika taudia ida ia do idia hasatauroa negana ia herevalaia unai. Ia hahedinaraia danu unai nega murinai ena hahediba taudia ese dagedage bada do idia davaria. Idia gwau: “Lohiabada e, tuari kaia rua be inai.”

Iesu ia gwau: “Ia hegeregere vadaeni.” Idia be mai edia tuari kaiadia rua dainai, Iesu be mai ena dala ma gau badana ta do ia hadibadia. Mataio 26:​31-35; Mareko 14:​27-31; Luka 22:​24-38; Ioane 13:​31-38; Apokalupo 14:​1-3.

▪ Dahaka dainai aposetolo edia hepapahuahu ita hoalaia?

▪ Iesu ese edia hepapahuahu edena bamona ia koua?

▪ Iesu be iena hahediba taudia dekenai ia karaia gwauhamatana amo dahaka ia vara?

▪ Iesu ese dahaka hahegani matamatana ia henidia, bona dahaka dainai unai hahegani be mai anina bada?

▪ Petro be edena bamona ia heagi, bona Iesu be dahaka ia gwau?

▪ Dahaka dainai Iesu ese ena sisiba ia haidaua, pusepuse bona dabua udaia gaudia ia herevalaia lou neganai?