Karoa 30

Idia Samania Taudia Ia Haere Henidia

IUDA tomadiho gunalaia taudia ese Iesu idia samania neganai, idia gwau ia ese Sabati taravatuna ia utua. Bena ia haere henidia, ia gwau: “Egu Tamana be ia gaukara noho ia mai bona hari, lau danu lau gaukara noho.”

Farisea taudia idia kerere, badina be Iesu ese unai kara amo Sabati taravatuna ia utua lasi. Dirava ese haroro gaukarana bona gorere hanamoa gaukarana ia henia, bona dina iboudiai ia karaia, Dirava be dina iboudiai ia gaukara hegeregerena. To Iuda taudia ese Iesu ena haere idia badulaia momokani bona hamasea dalana idia tahua. Badina be dahaka?

Badina be idia laloa Iesu ese Sabati taravatuna ia utua sibona lasi, to Dirava ia hadikaia danu, badina ia gwau ia be Dirava ena Natuna korikorina. Iesu ia gari lasi, to ma ia gwau: “Tamana ese ena Natuna ia lalokau henia, bona ena kara ibounai ia hedinarai henia ia dekenai.”

Bena Iesu ma ia gwau: “Tamana ese mase taudia ia hatorea isi bona ia hamauridia hegeregerena, Natuna danu ese ia lalokau henia taudia be ia hamauridia lou diba.” Momokani, lauma dalanai idia mase vadaeni taudia Iesu ese ia hatoredia isi noho! Iesu ia gwau: “Egu hereva ia kamonai, bona lau ia siaia Dirava dekenai ia abidadama henia, tauna . . . be mase ia rakatania vadaeni, mauri dekenai ia ginidae vadaeni.” Ma ia gwau: “Nega ta do ia mai, bona unai nega ia ginidae vadaeni, mase taudia ese Dirava ena Natuna ena gadona do idia kamonai, vadaeni kamonai taudia be do idia mauri.”

Ena be unai negai Iesu ese mase tauna ta ia do hatorea isi lou lasi, to idia samania taudia ia hamaorodia, mase taudia do idia toreisi lou. Ia gwau: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”

Ela bona unai nega, Iesu ese ena gaukara Dirava ena palani lalonai be taunimanima vairadiai ia do gwauraia hedinarai goevagoeva lasi. To idia samania taudia be ena gaukara ena anina idia diba vadaeni, badina Ioane ese ia hadibadia vadaeni. Iesu ia hamaorodia, ia gwau: “Ioane [dekenai] . . . emui taudia haida umui siaia vadaeni, bona . . . Ioane ena hereva lauegu kara dekenai be ia maoro.”

Lagani rua idia lao vadaeni, Ioane Bapatiso ese ia murinai do ia mai Tauna ia gwauraia idia dekediai. Iesu ese ia hamaorodia unai neganai Ioane idia laloa bada, ia gwau: “Nega sisina iena diari dekenai umui moale noho.” Iesu ese unai ia gwauraia, ia durudia bona ia hamauridia totona. To gau ta ese Ioane ena hereva ia hanaia.

Iesu ia gwau: “Lauegu gaukara [unai dina ai ia karaia hoa karana danu] . . . ese idia hedinaraia momokani, lauegu Tamana ese lau ia siaia vadaeni.” Ma ia gwau: “Egu Tamana ese lau ia siaia vadaeni, bona ia ese lau ia gwauraia hedinarai vadaeni.” Iesu ia bapatiso neganai, Dirava ese Iesu ia gwauraia hedinarai; ia gwau: “Inai be lauegu Natuna, egu lalokau.”

Momokani, Iesu idia samania taudia ese idia dadaraia be badina lasi. Idia tahua Buka Helagana ese ia ia gwauraia hedinarai! Unai dainai, dokonai Iesu ese ia hamaorodia, ia gwau: “Bema Mose umui abidadama henia momokani be lau danu do umui abidadama henia. Badina be ia ese lauegu sivaraina ia torea. To ia torea herevana bema umui abia dae lasi be lauegu hereva edena bamona umui abia dae diba?” Ioane 5:​17-47; 1:​19-27; Mataio 3:17.

▪ Dahaka dainai Iesu ena kara ese Sabati taravatuna ia utua lasi?

▪ Iesu ese ena gaukara badana Dirava ena palani lalonai edena bamona ia gwauraia?

▪ Iesu ese daika ena hereva ia gwauraia, unai amo ia hamomokania ia be Dirava ena Natuna?