Karoa 16

Iehova Tomadiho Henia Karana Ia Ura Henia Bada

UNAI murinai Iesu ena tadina, Iakobo, Iosef, Simona bona Iuda be ia bona ena hahediba taudia ida idia lao Kaperanaum, Galilea Gohuna ena kone dekenai.

Dahaka dainai Iesu be Kana o Nasaret o Galilea hanuana ma ta dekenai ia haroro lasi to ia lao Kaperanaum? Badina ta be inai: Kaperanaum be hanua badana, bona Iesu ena hahediba taudia matamatadia momo be Kaperanaum dekenai o ia kahirakahira dekenai idia noho dainai, sibodia edia hanua dekenai ia hadibadia diba.

Iesu be Kaperanaum dekenai ia noho neganai, hoa karadia momo ia karaia. Bena nega sisina murinai, ia mai ena bamodia ida be Kaperanaum idia rakatania. Gara lou neganai, lagani 30 C.E. lalonai, Ierusalem idia lao henia Paseka Ariana karaia totona. Unuseniai, Iesu ena hahediba taudia ese iena kara idauna ta idia itaia.

Dirava ena Taravatu hegeregerena Israel taudia ese animal idia bouboulaidia. Idia abidia haraga diba totona, Ierusalem dekenai hoihoi taudia ese boromakau, mamoe bona manu idia hoihoilaidia. To Dubu Helaga lalonai idia hoihoi, bona unai animal edia davana idia habadaia mai edia koikoi ida.

Iesu ia itadia neganai ia badu dikadika, kwadia kwanauna ia karaia bona ia luludia lasi. Moni idia senisia taudia danu edia moni ia bubua nege bona edia pata ia bubudia. Pune hoihoilaia taudia ia boiboi henidia, ia gwau: “Unai be umui kokia lao, egu Tamana ena ruma be hoihoi rumana dekenai umui halaoa lasi.”

Iesu ena hahediba taudia ese unai idia itaia neganai, Dirava ena Natuna ia gwauraia peroveta herevana idia laloa: “Oiemu ruma lau lalokau henia bada, inai lalokau be lauegu lalona dekenai ia siahu, lahi bamona.” To Iuda taudia ese idia nanadaia, idia gwau: “Dahaka hoa kara do oi hedinarai ai dekenai, vadaeni do ai diba oi be mai emu siahu inai bamona kara do oi karaia diba?” Iesu ia haere, ia gwau: “Inai Dubu Helaga do umui kokia, vadaeni lau ese dina toi lalonai do lau haginia lou.”

Iuda taudia idia laloa Iesu ese dubu korikori ia herevalaia, unai dainai idia nanadaia, idia gwau: “Inai Dubu Helaga be lagani 46 lalonai idia gaukara, haginia totona. To oi ese dina toi lalonai ma do oi haginia lou, oi gwau, a?” To ia be ena tauanina ia herevalaia unai. Lagani toi murinai, Iesu be gara gabuna amo ia toreisi lou neganai, ena hahediba taudia ese unai hereva idia laloa lou. Ioane 2:​12-22; Mataio 13:55; Luka 4:23.

▪ Kana ia rakatania murinai, Iesu be edeseniai ia lao?

▪ Dahaka dainai Iesu ia badu, bona dahaka ia karaia?

▪ Iesu ena kara idia itaia neganai, ena hahediba taudia ese dahaka idia laloa?

▪ Iesu ese “inai Dubu Helaga” edena bamona ia gwauraia, bona ena hereva ena anina be dahaka?