Karoa 10

Ierusalem Dekenai Idia Lao

NEGA ia ginidae, Iosef mai ena ruma bese taudia bona edia turadia bona varavara ida, be Ierusalem dekenai do idia raka lao mai edia moale ida, vaia edia kara hegeregerena, Paseka Ariana unuseniai do idia karaia totona. Edia laolao ena daudau be kilomita 105 bamona. Iesu ena lagani be 12, bona unai aria ia naria mai ena moale ida.

Paseka be dina tamona gauna lasi Iesu bona ena ruma bese dekediai. Idia laloa Hatubua Lasi Paraoana Ariana be ena kahana ta, unai dainai ma dina 7 lalodiai Ierusalem dekenai idia noho unai aria totona. Unai dainai, edia ruma Nasaret dekenai idia rakatania negana amo ela bona idia ginidae lou negana, be pura rua bamona. To unai lagani ai, Iesu ena kara ta dainai unai nega ena daudau ese pura rua ia hanaia.

Ierusalem idia rakatania bona dala dekenai idia raka lao neganai, Iosef bona Maria idia laloa Iesu be ena varavara o ena turadia ida idia raka hebou. To hanuaboi ai idia mahuta gwauraia neganai, Iesu idia davaria lasi. Laolao taudia bogaragidiai idia tahua, to idia davaria lasi. Unai dainai ruaosi idia lou lao Ierusalem dekenai, idia tahua totona.

Dina rua lalodiai idia tahua, to idia davaria lasi. Dina ihatoina ai, Dubu Helaga dekenai idia lao bona daiutu ta lalonai Iesu idia davaria. Ia be Iuda hahediba taudia bogaragidiai ia helai, edia hereva ia kamonai bona ia nanadaidia danu.

Maria ese ia nanadaia, ia gwau, “Egu natuna e, dahaka dainai inai bamona oi karaia ai dekenai? Lau bona emu tamana be mai tai danu oi ai tahua noho.”

Iesu ia hoa badina iena tamana sinana be ia noho gabuna idia diba lasi. Ia nanadaidia, ia gwau: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?”

Bena Iesu be idia ida ruma dekenai idia lou lao, bona ia kamonai henidia noho. Unai murinai ia tubu daekau noho mai ena aonega ida, bona Dirava bona taunimanima ese idia ura henia bada. Oibe, ia be mero maragi negana amo Iesu ese ena kara namodia ia hahedinaraia; lauma gaudia ia tahua bona ena tamana sinana ia matauraidia. Luka 2:​40-52; 22:7.

▪ Lagani iboudiai Iesu mai ena ruma bese taudia ida be edeseniai idia lao, bona edia laolao be edena daudau?

▪ Iesu ena lagani be 12 neganai, unai laolao ai dahaka ia vara?

▪ Edena dala ai Iesu be haheitalai namona ai ia lao, hari inai negai idia noho memerodia bona kekenidia ese idia tohotohoa totona?