Karoa 65

Ierusalem Ia Lao Hehuni

PASEKA negana lagani 31 C.E. ai Iuda taudia ese Iesu idia hamasea toho negana amo ela bona lagani 32 C.E., Galilea tanona ai ia gaukara. Reana unai nega lalonai Ierusalem dekenai ia lao, Iuda taudia edia aria toi totona sibona.

October 32 C.E. lalonai, Kalaga Ariana be kahirakahira neganai, Iesu ena tadina ese idia hereva henia, idia gwau: “Inai gabu do oi rakatania, Iudea dekenai do oi lao.” Ierusalem be Iudea ena hanua badana bona tomadiho ena hedikwota. Ena tadina idia gwau: “Bema tau ta be sibona ia ura hedinaraia neganai ia be gau ta lasi hunia dalana dekenai do ia karaia.”

Ena be Iakobo, Simona, Iosep, bona Iuda idia laloa edia kakana, Iesu, be Mesia lasi, to idia ura ena siahu be hoa karadia amo ia hahedinaraia, aria dekenai idia hebou taudia dekediai. To Iesu ia diba reana kerere do ia vara, unai dainai ia gwau: “Tanobada be do ia badu henia diba lasi umui dekenai, to lau dekenai be ia badu henia, badina be tanobada ena kara lau ese lau hedinaraia vadaeni ia be dika. Umui be do umui daekau, unai aria dekenai do umui vareai, to lau be do lau daekau lasi.”

Kalaga Ariana be dina 7 lalodiai idia karaia. Dina namba 8 ai, aria hadokoa totona, hebou helagana idia karaia. Uma ena anina haboua gaukarana ena dokona be unai aria dekenai idia moalelaia bona Dirava idia tanikiu henia. Iesu ena tadina be laolao taudia momo ida idia lao Ierusalem, bena dina haida murinai ia mai ena hahediba taudia ida be Samaria ena dala amo idia lao hehuni.

Iesu ese haida ia siaidia guna Samaria ena hanua ta lalonai mahuta gabuna tahua totona. Hanua taudia idia kamonai Iesu be Ierusalem dekenai ia lao gwauraia neganai, idia abia dae lasi. Mai edia badu ida Iakobo bona Ioane idia gwau: “Lohiabada e, oi ura lahi guba dekena amo do ai gwauraia, do ia diho, idia do ia hadikaia ore, a?” Iesu ese ruaosi ia gwau henidia, bena hanua idauna ta dekenai idia lao.

Vadaeni, dala dekenai idia raka neganai, taravatu hadibaia tauna ta ese Iesu ia hereva henia, ia gwau: “Hadibaia tauna e, do oi lao gabu ibounai dekenai lau danu ita lao.”

Iesu ia haere henia, ia gwau: “Uda sisia be mai edia nadi matuna, bona atai manudia danu mai edia ruma, to Taunimanima ena Natuna be mai ena mahuta gabuna lasi.” Unai amo Iesu ese ia hahedinaraia bema unai tau be ia murinai do ia raka, hekwarahi do ia davaria. Bona reana Iesu ia laloa unai tau be ia hekokoroku dainai unai bamona mauri dalana ia ura henia lasi.

Ma tau ta dekenai Iesu ia gwau: “Lauegu murinai oi raka.”

Ia haere, ia gwau: “Mani emu kara egu tamana do lau lao guria guna.”

Iesu ia hamaoroa: “Mase taudia sibona edia mase do idia guria, to oi be oi lao, Dirava ena Basileia do oi harorolaia.” Unai tau ena tamana ia do mase lasi, badina bema ia be vanegai sibona ia mase, unai tau be Iesu dekenai ia noho lasi ena hereva kamonai totona. To ia ura do ia naria ela bona ena tamana do ia mase. Ia ura lasi Dirava ena Basileia ia tahua guna.

Ierusalem ena dala dekenai idia raka lao neganai, ma tau ta be Iesu dekenai ia gwau: “Lohiabada e, lau be oiemu murinai do lau raka, to mani egu ruma taudia dekenai do lau lao bamahuta karaia guna.”

Iesu ia haere henia, ia gwau: “ Tau ta ese tano makohia gauna ena imana dekenai do ia dogoatao, vadaeni ena matana do ia negea murina kahana dekenai, ia be Dirava ena Basileia do ia abia diba lasi.” Iesu ena hahediba taudia ai idia lao taudia ese Basileia ena gaukara idia itaia tao. Tau ta be tano makohia masinina ia gaukaralaia neganai, bema vaira kahana ia itaia namonamo lasi, laini gagevagagevana do ia karaia. Unai hegeregerena, bema tau ta ese ena vairana ia giroa, inai tanobada oromana dikana ia raraia totona, mauri hanaihanai ena dala amo do ia raka siri reana. Ioane 7:​2-10; Luka 9:​51-62; Mataio 8:​19-22.

▪ Iesu ena tadina be daidia, bona edena bamona Iesu idia laloa?

▪ Dahaka dainai Samaria taudia ese Iesu idia abia dae lasi, bona Iakobo bona Ioane idia ura dahaka do idia karaia?

▪ Dala dekenai Iesu ese ia davaridia tataudia toiosi ta ta dekenai dahaka ia herevalaia, bona edena dala amo ia hahedinaraia sibodia edia ura idia laloa lasi be namo?