Karoa 82

Iesu Ia Lou Lao Ierusalem

IESU be Perea tanona ai ia noho. Ena ura be Ioridane Sinavaina ia hanaia ia lao Ierusalem. Ierusalem ena dala ai ia raka neganai, hanua badadia bona hanua maragidia ai hadibaia gaukara ia karaia.

Iuda taudia idia laloa taunimanima haida sibodia ese hahemauri do idia abia, unai dainai tau ta ese Iesu ia nanadaia, ia gwau: “Lohiabada e, mauri do idia abia taudia be momo, o haida sibona, a?” Ena haere amo Iesu ese taunimanima ia doridia hahemauri abia dalana idia laloa namonamo totona; ia gwau: “Do umui raka goada [hekwarahi bada], iduara maragimaragi dekena amo do umui raka vareai.”

Gau badana be idia hekwarahi bada, badina be Iesu ma ia gwau: “Taunimanima momo do idia ura raka vareai, to idia be hegeregere lasi.” Dahaka dainai idia hegeregere lasi? Ia gwau, badina be ‘ruma biaguna ia toreisi bona iduara ia koua murinai, bema taunimanima idia mai ena ruma ena iduara dekenai idia pidipidi, idia gwau, “Lohiabada e, mani oi kehoa,” do ia gwau: “Edeseni amo umui mai lau diba lasi, umui dika karaia noho taudia, umui ibounai umui siri.” ’

Murimuri ai idia noho taudia be sibodia idia ura neganai ruma dekenai idia lao. To idia ginidae neganai iduara ia loka vadaeni. Idia vareai totona idia ginidae haraga be namo, herevana idia hekwarahi unai bamona idia karaia totona. Momokani, Iehova tomadiho henia karana idia tahua guna lasi taudia ese dika do idia davaria!

Dirava ese Iesu ia siaia Iuda taudia durudia totona, to idia momo ese Dirava ena hahemauri dalana idia abia dae lasi. Unai dainai Iesu ia gwau, murimuri ai do idia doridia lasi neganai do idia tai bona edia isedia do idia koria auka masemase. To, “dina ia daekau ena kahana amo bona dina ia diho ena kahana amo, mirigini ena kahana amo bona diho ena kahana amo,” oibe, bese iboudiai amo, taunimanima “do idia mai, Dirava ena Basileia lalonai aniani pata dekenai do idia helai” totona.

Iesu ma ia gwau: “To unai neganai gabeai taudia [idia lalo-dika henidia idau bese taudia bona idia hahisidia Iuda taudia] haida be do idia guna, bona guna taudia [Iuda ena tomadiho gunalaia taudia mai edia kohu] haida be do idia gabeai.” “Do idia gabeai” anina be, idia lalo-hesiku bona Dirava ena heduru idia laloa lasi taudia be Dirava ena Basileia lalonai do idia vareai lasi momokani.

Unai neganai Farisea taudia haida be Iesu dekenai idia mai, idia gwau: “Idau gabu dekenai oi lao, badina be Heroda [Antipa] ese oi ia tahua, oi do ia alaia mase gwauraia.” Reana Herod sibona ese unai hereva ia halasia badina ia ura lasi Iesu be ena tano dekenai ia noho. Guna, Herod ena hereva dainai Ioane Bapatiso idia hamasea, bona Dirava ena peroveta tauna ma ta be ia dainai do ia mase garina ia gari reana. To Iesu ese Farisea taudia ia hamaorodia, ia gwau: “Umui lao, unai uda sisia dekenai umui hamaoroa, lau be harihari bona kerukeru lauma dikadia do lau lulua murimuri dekenai bona gorere taudia do lau hanamoa, to dohore dina toi ia abia dekenai lauegu gaukara lau haorea momokani.”

Iesu ese ena gaukara Perea tanona ai ia haorea, bena Ierusalem dekenai ma ia raka lao noho, badina be, sibona ena hereva hegeregerena, “peroveta tauna be idau gabu dekenai do ia mase lasi, Ierusalema dekenai sibona.” Dahaka dainai ita laloa Ierusalem dekenai Iesu do idia hamasea? Badina be unai hanua badana ai kota badana mai ena memba 71 idia noho, bona unuseniai animal idia bouboulaidia. Unai dainai gabu idauna ta ai “Dirava ena Mamoe Natuna” do idia hamasea be hegeregere lasi.

Mai ena lalohisihisi ida Iesu ia gwau: “Ierusalema e, Ierusalema e, oi ese peroveta taudia oi alaia, bona idia siaia oi dekenai taudia be nadi dekenai oi alaia. Nega momo oiemu natuna do lau haboua, kokoroku hahine ese natuna ena huina dekena amo ia koua bamona, to umui be umui ura lasi. Unai dainai, emui ruma be do ia noho kava.” Dirava ena Natuna idia dadaraia dainai, edia bese ese dika do ia davaria!

Iesu be Ierusalem ia lao henia neganai, Farisea edia biaguna ta ese ia boiria ena ruma dekenai, do idia aniani totona. Unai be Sabati dinana, bona taunimanima ese Iesu idia raraia noho, badina rara gorere ese ia abia tauna ta be iena vairanai ia helai. Bena Iesu ese Farisea taudia bona taravatu idia diba momo taudia ia hereva henidia, ia gwau: “Gorere taudia Dina Helaga dekenai do ita hanamoa be mai taravatu o?”

Idia ta ia hereva lasi. Unai dainai Iesu ese gorere tauna ia hamauria, bena ia siaia. Bena ia nanadaidia, ia gwau: “Umui daika ena doniki o ena boromakau guri dekenai bema ia moru diho, be Sabati dinana dekenai do idia veria daekau lasi, a?” Idia haere henia lasi. Luka 13:22–14:6; Ioane 1:29.

▪ Iesu ia gwau, ta ese hahemauri ia abia totona, dahaka ia karaia be namo, bona dahaka dainai momo be vareai dalana lasi?

▪ Idia “gabeai” to do idia guna taudia be daidia, bona idia “guna” to do idia gabeai taudia be daidia?

▪ Dahaka dainai Farisea taudia idia gwau, Herod ia ura Iesu do ia hamasea?

▪ Dahaka dainai peroveta tauna be Ierusalem murimurinai idia hamasea be hegeregere lasi?