Karoa 128

Iesu Ia Mauri Lou!

HAHINE ese Iesu ena gara idia itaia ia lalonai tauanina be lasi, bena Maria, Magdala hahinena, ia heau lao Petro bona Ioane hadibadia totona. To, hahine oredia be gara dekenai idia noho. Nega sisina murinai, aneru ta ia hedinarai bona ia boiridia gara ai idia vareai totona.

Gara lalonai ma aneru ta idia itaia, bena unai aneru ta ese ia hamaorodia, ia gwau: “Umui gari lasi, badina lau diba umui be Iesu, idia hasatauroa tauna, umui tahua noho. Ia be ia noho lasi iniseni. Ia toreisi lou vadaeni, ia hamaoroa umui dekenai hegeregerena. Vadaeni, umui mai, idia atoa gabuna mani umui itaia. Vadaeni do umui lao haragaharaga, iena diba tahua taudia dekenai do umui hamaoroa ia be mase dekena amo ia toreisi vadaeni.” Vadaeni, hahine idia heau oho, mai edia gari bona mai edia moale bada ida.

Vadaeni, Maria ese Petro bona Ioane ia davaridia vadaeni, ia hamaorodia, ia gwau: “Idia ese Lohiabada be guria gabuna dekena amo idia kokia vadaeni, edeseni idia atoa be ai diba lasi.” Nega tamona aposetolo ruaosi idia heau lao. Ioane ia heau haraga, Petro ia heautania, bena gara ai ia ginidae guna. To ia ginidae neganai taunimanima be lasi, hahine idia lao vadaeni dainai. Ia igo vareai, dabua aukadia ia itadia, to gara lalonai ia vareai lasi.

Petro ia ginidae neganai, maoromaoro gara lalonai ia raka vareai. Ia ese dabua aukadia ia itadia, tano ai idia noho, bona taoele danu, Iesu ena kwarana idia kumia gauna. Ia heloku, sibona ena gabu dekenai ia noho. Bena Ioane danu be gara lalonai ia raka vareai, bona Maria ena hereva ia abia dae. Ena be nega momo Iesu ese ia hamaorodia vadaeni do ia toreisi lou, to Petro bona Ioane ruaosi idia lalo-parara lasi Dirava ese ia hatorea isi lou vadaeni. Maria be gara dekenai ia lou mai murinai, idia ruaosi ese idia rakatania, idia lou lao edia ruma dekenai.

Aneru ese idia hamaorodia hegeregerena, hahine oredia idia lao, hahediba taudia idia hamaorodia gwauraia Iesu ia toreisi lou vadaeni. Idia heau lao neganai, dala ai Iesu be idia ida ia hedavari, ia hereva henidia, ia gwau: “Do umui mauri!” Hahine be ena aena vairanai idia goru diho, idia tomadiho henia. Bena Iesu ia gwau: “Umui gari lasi. Umui lao, lauegu varavara taudia do umui hamaoroa, do idia lao Galilea. Unai kahana dekenai do idia itaia lau.”

Guna, tano ia marere bona aneru idia hedinarai neganai, gara idia gimaia tuari taudia idia heudeheude, mase taudia hegeregeredia ai idia lao. Idia namo lou neganai, kara haraga idia lao hanua, idia vara gaudia iboudiai be hahelaga taudia badadia idia hamaorolaidia. Bena idia be Iuda ena “tau badadia” ida idia hereva hebou murinai, edia lalona idia hadaia, tuari taudia moni do idia henidia, ia vara gauna do idia koikoilaia totona. Idia haganidia, idia gwau: “Do umui gwau, ‘Iena diba tahua taudia be hanuaboi idia mai, ai mahuta neganai iena tauanina idia henaoa.’ ”

Bema Roma tuari taudia be edia gima negana lalonai idia mahuta, edia davana be mase reana. To hahelaga taudia ese idia gwauhamata henidia, idia gwau: “Bema gavana ese inai sivarai [umui mahuta sivaraina] do ia kamonai, ai ese do ai hereva henia, ena lalona do ai hanamoa, kerere ta do umui davaria lasi.” Tuari taudia ese moni momo herea idia abia dainai, idia hadibadia hegeregerena idia hereva. Unai dainai, Iesu ena aposetolo ese ena tauanina idia henaoa sivaraina koikoina be Iuda taudia ese idia gwauraia loaloa.

Gara ai ia noho hahinena, Maria, Magdala hahinena, ia taitai. Iesu be edeseni? Maria ia igo vareai, gara lalonai aneru rua mai dabua kurokurodia ida ia itadia, Iesu ena tauanina idia atoa gabuna ai; ta be ena aena gabuna ai, ma ta be ena kwarana gabuna ai, idia helai noho. Maria idia hereva henia, idia gwau: “Hahine e, dahaka dainai oi tai?”

Maria ia gwau: “Egu Lohiabada be idia abia siri vadaeni, idia atoa gabuna be lau diba lasi.” Bena ena vairana ia giroa, tau ta ia itaia, ia danu ia gwau: “Hahine e, dahaka dainai oi tai? Daika oi tahua?”

Unai gara be imea ta lalonai, bona Maria ia laloa unai tau be imea naria tauna, unai dainai ia gwau: “Tau badana e, bema inai be oi ese idau gabu ta dekenai oi abia lao be mani gabuna oi hamaoroa lau dekenai, vadaeni do lau lao abia.”

Hari tau ia gwau: “Maria e!” Bena nega tamona Maria ia diba unai be Iesu ena gadona. Ia gwau: “Rabouni!” (Unai hereva ena anina be “Hadibaia Tauna!”) Bena mai ena moale bada ida Iesu ia dogoatao. To Iesu ia gwau: “Lauegu tauanina oi dogoatao lasi, badina be Tamana dekenai do lau daekau lasi. To lauegu varavara taudia dekenai oi lao, idia do oi hamaoroa egu Tamana bona emui Tamana, egu Dirava bona emui Dirava dekenai do lau daekau.”

Bena Maria ia heau lao aposetolo bona hahediba taudia idia hebou gabuna dekenai. Ia hamaorodia Iesu ia itaia mase amo ia toreisi lou vadaeni, hahine oredia idia hereva vadaeni hegeregerena. To Maria ena hereva idia abia dae lasi, unai hahine edia hereva idia abia dae lasi hegeregerena. Mataio 28:​3-15; Mareko 16:​5-8; Luka 24:​4-12; Ioane 20:​2-18.

▪ Maria, Magdala hahinena, ese gara lalonai tauanina ia davaria lasi neganai dahaka ia karaia, bona iena bamodia dekenai dahaka ia vara?

▪ Petro bona Ioane ese gara lalonai tauanina idia davaria lasi neganai, edena bamona idia karaia?

▪ Hahine oredia be Iesu ia toreisi lou vadaeni sivaraina hahediba taudia hadibadia totona dala dekenai idia heau lao neganai, daika idia davaria?

▪ Gara idia gimaia tuari taudia dekenai dahaka ia vara, bona hahelaga taudia ese edia sivarai idia kamonai neganai dahaka idia karaia?

▪ Maria, Magdala hahinena, sibona be gara ai ia noho neganai dahaka ia vara, bona hahediba taudia ese hahine edia sivarai idia kamonai neganai edena bamona idia laloa?