Karoa 9

Iesu Ia Mero Neganai

IESU ia tubu daekau neganai, iena hanua Nasaret be bada lasi. Ia be Galilea tanona ena ororo kahanai, Iesrele taorana mai hairaina kahirakahira dekenai.

Guna, Iesu ena lagani be rua bamona neganai, Iosef bona Maria ese Aigupito amo idia mailaia Nasaret dekenai; unai neganai ia be Maria ena natuna tamona. To gabeai Iosef bona Maria ese Iakobo, Iosef, Simona, bona Iuda idia havaradia, bona kekeni haida danu. Iesu ena tadina bona taihuna iboudiai be 6 eiava unai namba ataiai.

Iesu be mai ena varavara ma haida danu. Ena kakana lahaina, gabu daudauna Iudea dekenai ia noho tauna, Ioane, ena sivarai ita diba vadaeni. Maria ena kakana Salome be kahirakahira dekenai ia noho, Galilea dekenai. Salome mai ena adavana Sebedeo edia natudia, Iakobo bona Ioane, be gabeai idia bada neganai Iesu idia bamoa loaloa.

Iosef be kapenta gaukarana dekenai ia hekwarahi bada, iena ruma bese badana naria totona. Ia ese Iesu ia naria, sibona ena natuna hegeregerena, unai dainai Iesu be ‘kapenta tauna ena natuna’ idia gwauraia. Iesu be kapenta gaukarana ia hadibalaia, unai dainai gabeai taunimanima ese Iesu idia gwauraia “kapenta tauna.”

Iosef mai ena ruma bese taudia ida ese Iehova Dirava tomadiho henia karana idia goadalaia. Dirava ena taravatu hegeregerena, Iosef bona Maria ese edia natudia Dirava ena hereva idia hadibalaidia, ‘ruma ai idia helai negadiai, bona idia toreisi negadiai’ danu. Ita diba momokani, Iosef ese ia hakaudia lao Nasaret ena dubu dekenai, unuseniai idia tomadiho totona. To idia moalelaia bada gauna be inai: Lagani iboudiai ia hakaudia lao Iehova ena dubu helagana dekenai, Ierusalem dekenai. Mataio 13:​55, 56; 27:56; Mareko 15:40; 6:3; Deuteronomi 6:​6-9.

▪ Iesu be mai ena tadina bona taihuna hida, bona idia haida edia ladadia be daika daika?

▪ Iesu ena varavara toi be daika daika?

▪ Gabeai Iesu ese dahaka moni gaukarana ia karaia, bona dahaka dainai?

▪ Iosef ese ena ruma bese dahaka ia hadibalaidia?