Karoa 81

Iesu Idia Alaia Toho Lou

UNAI be keru negana dainai, Iesu be gabu ta mai ena guhi, ladana Solomon ena dehe ai ia raka, Dubu Helaga badinai. Iuda taudia ese idia ginia hegege, idia nanadaia, idia gwau: “Oi totona do ai laloa daradara noho ia lao bona edena negai? Oi be Keriso o lasi? Mani oi hamaoroa momokani ai dekenai.”

Iesu ese ia haere henidia, ia gwau: “Umui lau hamaoroa vadaeni, to egu hereva umui abidadama henia lasi.” Idia dekenai Iesu ia gwau lasi, ‘Lau be Keriso,’ Samaria hahinena ia hamaoroa hegeregerena, to ia hamaorodia ia be atai amo bona Abraham ia do vara lasi neganai ia noho, unai amo ia hahedinaraia ia be daika.

Iesu ia ura taunimanima ese ia karaia karadia bona Baibel ena peroveta herevadia Keriso dekenai idia hahegeregeredia, bena sibodia edia lalona idia hadaia ia be Keriso. Unai dainai, guna ena hahediba taudia ia hamaorodia ia ura lasi taunimanima idia hadibaia ia be Keriso. Unai dainai, unai Iuda taudia mai edia badu ia hamaorodia, ia gwau: “Lauegu Tamana ena ladanai lau karaia gaudia ese lau idia hedinaraia. To umui abidadama henia lasi lau dekenai.”

Dahaka dainai idia abidadama henia lasi? Iesu be Keriso ia hamomokania gauna ta ia noho lasi, a? Lasi, edia kara ena badina be Iesu ese inai bamona ia gwauraia: “Badina umui be lauegu mamoe lasi. Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai, idia be do idia mase lasi, lasi bona lasi momokani. Bona tau ta ese lauegu imana dekena amo idia do ia kokia lasi. Idia be lauegu Tamana ese lau dekenai ia henia vadaeni. Lauegu Tamana ena goada ese gau ibounai ia hanaia. Unai dainai tau ta ia hegeregere lasi idia do ia kokia lauegu Tamana dekena amo.”

Bena Iesu ia gwau: “Lau bona egu Tamana, ai be tamona.” Unai neganai Iesu be tanobada ai ia noho bona ena Tamana be guba ai ia noho, unai dainai idia be tauanina tamona lalonai idia noho lasi. To ena hereva ena anina be idia lalo-tamona.

Iesu ena hereva dainai Iuda taudia idia badu, bena nadi idia abia idia hodoa mase totona, guna, Kalaga Ariana dekenai idia karaia hegeregerena. Mai ena boga-auka ida Iesu ese ia hamaorodia, ia gwau: “Kara namodia momo Tamana dekena amo umui dekenai lau hedinaraia vadaeni. Edena kara totona do umui hodoa lau?”

Idia gwau: “Kara namona ta totona do ai hodoa lasi oi, to Dirava ladana oi hadikaia dainai, badina oi be taunimanima sibona, to oi sibona be Dirava oi halaoa.” Dahaka dainai, ena be nega ta Iesu ia gwau lasi ia be Dirava, to Iuda taudia be unai bamona idia hereva?

Badina be Iesu ia gwau siahu be ia dekenai ia noho, to idia laloa unai siahu be Dirava sibona dekenai ia noho. Hegeregere, Iesu ese ena “mamoe” ia herevalaidia, ia gwau: “Mauri hanaihanai danu lau henia idia dekenai,” to taunimanima ta ese unai ia karaia diba lasi. Iuda taudia idia laloa lasi gauna be inai: Iesu ia gwau ena siahu be ena Tamana amo ia abia.

Iesu ia laloa lasi ia be Dirava ida ia hegeregere, unai dainai ia gwau: “Umui emui taravatu [Salamo 82:6] dekenai inai bamona ia torea, ani? ‘Lau gwau, umui be dirava? ’ . . . ena hereva idia abia taudia be Dirava ese ia gwauraia, idia be dirava. Dirava ese lau ia abia hidi bona lau ia siaia tanobada dekenai. Ia siaia tauna be umui gwau henia, umui gwau, ‘Oi be Dirava ladana oi hadikaia,’ badina be lau gwau, ‘Lau be Dirava ena Natuna,’ a? ”

Buka Helaga ese hahemaoro taudia dikadia tanobada dekenai ia gwauraidia “dirava.” Unai dainai, bema Iesu ia gwau, “Lau be Dirava ena Natuna,” Iuda taudia be unai dainai idia samania diba lasi, ani? Iesu ma ia gwau: “Bema egu Tamana ena kara lau karaia lasi, lau do umui abidadama henia lasi be namo. To ena kara be lau karaia noho. Bema lau umui abidadama henia lasi, namona be lau karaia gaudia dainai do umui abidadama henia, vadaeni emui lalona be do idia kehoa bona do umui diba lauegu Tamana be lauegu lalona dekenai ia noho, lau danu be lauegu Tamana lalona dekenai lau noho.”

Iesu be unai bamona ia hereva neganai, Iuda taudia idia dogoatao lou gwauraia, to edia imana amo ia heau oho, guna, Kalaga Ariana dekenai ia karaia bamona. Vadaeni, Ierusalem ia rakatania, Ioridane Sinavaina ia hanaia, lagani 4 gunanai Ioane ese bapatiso ia karaia gabuna dekenai ia lao. Unai be Galilea Gohuna ena diho kahana konena kahirakahira dekenai, Ierusalem amo dina rua ena raka bamona.

Hutuma be Iesu dekenai idia mai, idia gwau: “Ioane ese toa ta ia karaia lasi, to Ioane ese inai tau ia herevalaia gaudia ibounai be momokani vadaeni.” Bena unuseniai Iesu idia abidadama henia. Ioane 10:​22-42; 4:26; 8:​23, 58; Mataio 16:20.

▪ Iesu ia ura taunimanima be edena dala amo idia diba ia be Keriso?

▪ Edena dala amo Iesu bona ena Tamana be tamona?

▪ Dahaka dainai Iuda taudia idia gwau Iesu be sibona Dirava ai ia halaoa?

▪ Iesu ese Salamo ena hereva ia gwauraia neganai, edena bamona ia hahedinaraia ia laloa lasi ia be Dirava ida ia hegeregere?