Karoa 41

Iesu Idia Hepapahuahulaia

IESU be Simona ena ruma ai ia aniani dinana murinai, Galilea dekenai ia lou lao haroro totona, ena nega iharuana unai. Guna, unuseniai ia haroro loaloa neganai, ena hahediba taudia ginigunadia, Petro, Andrea, Iakobo, bona Ioane ese idia bamoa. To hari ena hahediba taudia 12 bona hahine haida, Maria, Magadala hahinena, Susana, bona Ioana, King Herod ena kohu naria tauna ena adavana, ese idia bamoa.

Iesu ese ena hesiai gaukara ia habadaia neganai, taunimanima ese ena gaukara idia hepapahuahulaia bada. Tau ta mai lauma dikana be Iesu dekenai idia mailaia, ia matakepulu bona ia mu danu. Iesu ese ia hamauria, bena ia hereva bona matana amo gau ia itaia danu, bona lauma dikana ese ia rakatania. Unai neganai, hutuma idia hoa maragi lasi, idia gwau: “Sedira, inai be Davida ena natuna, a?”

Iesu ese ia noholaia rumana dekenai hutuma idia hebou dainai, ia bona ena hahediba taudia be dala lasi do idia aniani. Idia hebou taudia haida ese Iesu idia abia dae “Davida ena natuna,” Dirava ese ia gwauhamatalaia tauna, to ma haida be taravatu hadibaia taudia bona Farisea taudia, Ierusalem amo idia mai Iesu gwauraia dika totona. Iesu dainai ia vara hepapahuahu sivaraina be ena varavara idia kamonai neganai, idia mai Iesu dogoatao totona. Badina be dahaka?

Badina be Iesu ena tadikaka idia do abia dae lasi ia be Dirava ena Natuna. Danu, idia diba Nasaret ai ia tubu daekau neganai unai bamona hepapahuahu bona heiriheiri ia havaradia lasi. Idia laloa Iesu ena kwarana ia dika; idia gwau: “Ia kavakava,” unai dainai idia ura idia dogoatao bona idia laohaia.

To ia hedinarai goevagoeva Iesu ese mai lauma dikana tauna ia hamauria. Taravatu hadibaia taudia bona Farisea taudia idia diba unai idia gorea diba lasi. Unai dainai, Iesu ena ladana hadikaia totona, taunimanima idia hamaorodia, idia gwau: “Lauma dika edia lohia tauna, Belesebulo, ese siahu ia henia dainai inai tau ese lauma dika ia lulua diba.”

Taravatu hadibaia taudia bona Farisea taudia edia lalohadai ia diba dainai, Iesu ese ia boiridia, bena ia hamaorodia, ia gwau: “Basileia ta sibona bema ia hapararaia, orea ta ese orea ta idia heatu henia dainai unai basileia do ia dika. Unai bamona danu hanua ta o iduhu ta sibona bema ia hapararaia, ia be do ia gini diba lasi. Bona bema Satani ese Satani ia lulua murimuri dekenai, unai be ia parara, ma sibona ia heatu henia, vadaeni ena basileia be edena bamona do ia gini diba?”

Unai hereva be maoromaoro momokani! Farisea taudia idia gwau edia orea taudia haida ese demoni be taunimanima amo idia luludia, unai dainai Iesu ese ia nanadaidia, ia gwau: “Umui gwau lau be Belesebulo ena siahu dekenai lauma dika lau lulua. To umui emui orea taudia be daika ena siahu dekenai lauma dika idia lulua?” Edia samani herevana Iesu dekenai be mai anina idia dekenai danu. Bena ia gwau: “To, bema lau be Dirava ena Lauma dainai lauma dika lau luludia, Dirava ena Basileia be umui dekenai ia ginidae vadaeni.”

Iesu ese demoni ia luludia neganai, ia hahedinaraia ena siahu ese Satana ena siahu ia hanaia. Unai ia haheitalaia totona, parabole ta ia gwauraia, ia gwau: “Tau ta ese edena bamona goada tauna ena ruma dekenai do ia raka vareai, vadaeni ena kohu do ia henaoa? Ia be goada tauna do ia kwatua guna, vadaeni ena ruma kohu do ia henaoa diba. Lau dekenai ia laloa momo lasi tauna be lau dekenai ia heatu noho, bona lau ia durua lasi tauna mamoe haboua totona, be ia ese mamoe ia negedia kava, idia boio.” Farisea taudia ese Israel taudia be Iesu ena amo idia luludia oho dainai, idia hahedinaraia goevagoeva Iesu idia inai henia bona idia be Satana ena hesiai taudia.

Unai dainai Iesu ese ia hamaorodia, ia gwau: “Lauma Helaga dekenai ia hereva dika tauna be ena dika do ia gwauatao lasi. Taunimanima ena Natuna dekenai do ia hereva dika tauna be ena dika do ia gwauatao. To Lauma Helaga dekenai ia hereva dika tauna be ena dika do ia gwauatao lasi, hari inai mauri lalonai bona mauri gabeai danu.” Unai taravatu hadibaia taudia bona Farisea taudia ese Dirava ia gwauatao diba lasi kererena ta idia karaia, idia gwau Dirava ena lauma helaga ese ia karaia siahu karana be Satana ese ia karaia. Mataio 12:​22-32; Mareko 3:​19-30; Ioane 7:5.

▪ Iesu ena laolao ginigunana bona iharuana Galilea dekenai be edena bamona idia idau?

▪ Badina be dahaka Iesu ena varavara ese ia idia dogoatao gwauraia?

▪ Farisea taudia ese edena dala amo Iesu ena hoa karadia idia gwauraia dika toho, bona edena bamona Iesu ese edia hereva ia hakoikoia?

▪ Farisea taudia edia kerere be dahaka, bona badina be dahaka?